CILONGESA 59
Mwasa Kutwalelelaho Kupwa ba Kulongwa Nameme Bamilwisa
Ha kupwa baka-Kilistu, tubaboshe tunapande kuzibuka ngwetu basa kutulwisa simbu yoshe-yoshe. Kuma tunapande kuzeya ndi?
1. Mwafwa bika banu basa kutulwisa?
Mbimbiliya ngwayo: “Woshe uje ashaka kuyoya buyoye bwa bunjambi buje buli muli Kilistu Yesu akamona mapakeso.” (2 Timateo 3:12) Yesu bamuyandesele mwafwa ya kujeneka kulikwatasana na kaye ka Satana. Netu keti tu baka-kaye. Ngeci, kutukomoka nga bifulumende nambe bimunga bimo bya bulombelo bituyandesa.—Yowano 15:18, 19.
2. Twasa kulibwahesela bati mangana tukolese omwo batulwisa?
Ino ikeyo simbu itunapande kukulahela manene Yehova. Tunapande kuwana simbu ya kulombela kuli ikeye na kutanda Lijwi lyendi ha litangwa na litangwa. Co lalo tunapande kukunguluka simbu yoshe. Kulinga ebi byuma kutukwasa tukolese nga batulwisa, nameme nga baka-naanga yetu bakebo balinga ngoco. Kapositolo Paulu uje ibalwisile manene wendekele ngwendi: ‘Yehova ikeye mukwasi wange, co kunjizibi lyoba.’—Vahevelu 13:6.
Twasa kulibwahesela lalo kupwa ba kusimpa nga twambulula simbu yoshe. Kwambulula kutukwasa tukulahele Yehova na kujeneka kutewa banu. (Visimo 29:25) Nga tupwa ba kusimpa ha simbu ino na kutwalelelaho kwambulula, co tukapwa ba kusimpa na kutwalelelaho kwambulula nga fulumende inashoko cipangi cetu.—1 Tesalonika 2:2.
3. Bubwa muka butunda mu kukolesa nga batulwisa?
Wahi washaka kumuyandesa. Oloni nga tukolesa omwo batuyandesa, co likulahelo lyetu likanyama. Busamba bwetu na Yehova bukanyama mwafwa tulimwena mwatukwasela ha simbu ituliziba ngwetu kutwasa kutwalelelaho kukolesa. (Tandeni Yakomba 1:2-4.) Yehova kesi kuliziba bwino mwakatumono tuyanda. Oloni akabwahelela mwakatumono tukolesa. Mbimbiliya ngwayo: “Nga mukakateya mu kuyanda nambe omwo munalingi mwamubwa, Njambi akamibezikisa.” (1 Petulu 2:20) Nga tukolesa na kutwalelelaho kupwa ba kulongwa kuli Yehova, co tukalikuwa kuyoya myaka yoshe mu kaye kakaha, muje naumo wahi akatulwisa omwo tukalemesa Yehova.—Mateo 24:13.
TONDESESENI
Bika bitwendekela ngwetu twasa kutwalelelaho kupwa ba kulongwa kuli Yehova nameme batulwisa? Co bubwa muka butunda mu kulinga ngoco?
4. Mwasa kukolesa nga baka-naanga yeni bamilwisa
Yesu wendekele ngwendi bisimbu bimo baka-naanga yetu kubasa kubwahelela nga batumona tulemesa Yehova. Tandeni Mateo 10:34-36, na kusimutwiya ha cihula cinatako:
-
Bika bibasa kulinga bamo mu naanga nga umo alyangwila kupangela Yehova?
Cakumwenako, kengeni VIDIO na kusimutwiya ha cihula cinatako.
-
Mulinga bati nga kabusamba nambe kabushoko ashaka kumyonowesa kupangela Yehova?
Tandeni Myaso 27:10 na Mako 10:29, 30. Munima ya kutanda cisoneka na cisoneka, simutwiyeni ha cihula cinatako:
-
Eci cisoneka cimikwasa bati nga kabusamba nambe kabushoko ashaka kumyonowesa kupangela Yehova?
5. Twaleleleniho kulemesa Yehova nameme bamilwisa
Tunapande kupwa ba kusimpa nga banu bamo bashaka kutwonowesa kupangela Yehova. Kengeni VIDIO na kusimutwiya ha cihula cinatako.
-
Myanja imunamono mu vidio yamikwasa bati?
Tandeni Vilinga 5:27-29 na Vahevelu 10:24, 25. Munima ya kutanda cisoneka na cisoneka, simutwiyeni ha cihula cinatako:
-
Mwafwa bika kunapu kwa seho kutwalelelaho kulemesa Yehova nga bashoka cipangi cetu ca kwambulula nambe biwano byetu?
6. Yehova amikwasa mukolese
Bakaleho ba Yehova ba myaka ya kuliseza-seza mu mafuti a kuliseza-seza banatwalelelaho kupangela Yehova mu kulongwa nameme banakala na kubalwisa. Kengeni VIDIO mangana mumone byabakwasele. Kutundaho, simutwiyeni ha cihula cinatako.
-
Kwesekesa na vidio, bika byakwasele baje Bakaleho bakolese?
Tandeni Loma 8:35, 37-39 na Filipu 4:13. Munima ya kutanda cisoneka na cisoneka, simutwiyeni ha cihula cinatako:
-
Ou mukanda unamikwasa bati mumone ngweni mwasa kukolesa nga muliwana na ceseko?
Tandeni Mateo 5:10-12, na kusimutwiya ha cihula cinatako:
-
Bika bitulingisa tubwahelele nameme batuyandesa?
Bakaleho ba Yehova banakolesa nameme banakala na kubalwisa. Neni mwasa kukolesa!
BAMO BAKENDEKA NGWABO: “Kunjasa kukolesa nga banjiyandesa.”
-
Cisoneka muka casa kukwasa munu aliziba ngoco mangana akolese?
SIMPI YAKAMA
Yehova akabwahelela manene mwakatumono tutwalelelaho kumupangela nameme bali na kutulwisa. Co atukwasa mangana tutwaleleleho kukolesa!
Kwitulukamo
-
Mwafwa bika baka-Kilistu banapande kuzibuka ngwabo babayandesa?
-
Bika bimunapande kulinga mangana mulibwahesele simbu kanda bamiyandese?
-
Bika bimikwasa mukulahele ngweni mwasa kutwalelelaho kupangela Yehova nameme muliwana na byeseko?
WANENI BIKWABO
Ndolome umo bamwakele mu kamenga mwafwa ya kujeneka kulikobelesa mu byuma bya kaye. Kengeni vidio ije imwesa mwanamukwaselele Yehova mangana atwaleleleho kukolesa.
Nangukeni byakwasele ndolome na munakazi wendi batwaleleleho kupangela Yehova mu kulongwa nameme babalwisile ha myaka yaingi.
Bika bimikwasa mukolese nga bamiyandesa?
“Libwaheseleni Byakulinga Simbu Kanda Bamiyandese” (Kaposhi ka Kukengela ka July 2019)
Bika bitunapande kulinga mangana tutwaleleleho kukala mu kwoloka na kupwa ba kulongwa kuli Yehova nga baka-naanga yetu batulwisa?
“Busunga ‘Kubwanenele Kwoloka Embwe, Oloni Moko ya Mukwale’” (Kaposhi ka Kukengela ka October 2017)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
