CILONGESA 14
Njambi Wakela Bika na Munga Yendi ya Banu?
1. Bika Njambi wangwililile Baisalele kupwa banu bendi?
Njambi wakungulwile batekulwila ba Abilahama kupwa muyati, co wabanene mashiko. Njambi watumbwile uje muyati ngwendi “Isalele.” Co wabanene cipangi ca kukundwiya kulemesa kwa busunga na lijwi lyendi. (Myaso 147:19, 20) Ngeci, banu ba ku mafuti oshe bawanene kubezika kwitila muli Baisalele.—Tandeni Kushangumuka 22:18.
Njambi wangwile Baisalele bapwe bakaleho bendi. Buyoye bwabo bwamwesele ngwabwo kwononoka mashiko a Njambi kwasa kubezikisa banu. (Kwituluka mu Mashiko 4:6) Baka-miyati yeka bazibukile Njambi wa busunga kwitila muli Baisalele.—Tandeni Isaya 43:10, 12.
2. Bika Njambi wangwililile cikungulukilo ca baka-Kilistu?
Mu kwita kwa simbu, Yehova wabyanene uje muyati wa Isalele, co wengisilemo cikungulukilo ca baka-Kilistu. (Mateo 21:43; 23:37, 38) Baka-Kilistu ba busunga bakebo honi bakaleho ba Yehova, keti Baisalele embwe.—Tandeni Vilinga 15:14, 17.
Yesu watumine baka-mukabangeya baye mu kwambulula na kupwisa banu ba ku miyati yoshe kupwa bandongesi. (Mateo 10:7, 11; 24:14; 28:19, 20) Tuli honi mu matangwa a kukotoka, ngeci eci cipangi ololo cihwa. Yehova nakungulwila banu ba ku miyati yoshe mu kulemesa kwa busunga. Aba banu babangi manene kutubakana baje bakungulwile kunima. (Kujombolola 7:9, 10) Njambi nakungulula baka-Kilistu ba busunga mangana balikanyamese na kulikwasa umo na mukwabo. Bali na kulikuwa bilongesa bya mu Mbimbiliya bya kulifwa ku biwano byabo mu kaye koshe.—Tandeni Vahevelu 10:24, 25.
3. Munga ya Bakaleho ba Yehova ya mu matangwa etu yashangumukile bati?
Mu ma 1870, kacibunga ka baka-kulilongesa Mbimbiliya kashangumukile kuwana busunga bwa mu Mbimbiliya buje bwazimbalele. Banangukile ngwabo Yesu washangumukile cikungulukilo ca baka-Kilistu mangana cambulule muzimbu. Ngeci baputukile cipangi ca kwambulula muzimbu wa Bumwene mu kaye koshe. Kweta mu 1931, bashangumukile kulitumbula ngwabo Bakaleho ba Yehova.—Tandeni Vilinga 1:8; 2:1, 4; 5:42.
4. Bakaleho ba Yehova bali na kutwamenena bati cipangi cabo ca kwambulula?
Mu simbu ya tupositolo, kwakele cibunga ca kutwamenena cije catalele bikungulukilo bya baka-Kilistu mu mafuti a kulisezaseza. Bakulunu bakele muje mu cibunga bakulahelele Yesu kupwa Mutwe wa cikungulukilo. (Vilinga 16:4, 5) Ano matangwa, Bakaleho ba Yehova mu kaye koshe banabezika kukala na Cibunga ca Kutwamenena. Eci cibunga cili na kwendesa maofisi a minango a Bakaleho ba Yehova aje ali na kunungulula na kupulinta mabulu mu bindaka bya kutubakana 900. Cibunga ca Kutwamenena cili na kupangesa eyi ngila mu kukanyamesa na kutwamenena bikungulukilo bya kutubakana 120,000 mu kaye koshe. Omu mu bikungulukilo muli banalume ba kuhya baje babanangula kupwa bakulunu. Aba bakulunu bali na cipangi ca kunyunga butanga bwa Njambi.—Tandeni 1 Petulu 5:2, 3.
Yetu Bakaleho ba Yehova tuli na kwambulula muzimbu waubwa na kupwisa banu bapwe bandongesi. Tukai mu kwambulula ku njubo na njubo ngwe mubalingile tupositolo. (Vilinga 20:20) Co lalo tukalilongesa Mbimbiliya na baje bazema busunga. Yetu Bakaleho ba Yehova kutwapwile munga ya baka-kulemesa lika embwe. Oloni twapwa naanga imo, co tuli na Tate yetu wamubwa, Yehova. Tubandolome na bandokazi baje balyaka mbunge. (2 Tesalonika 1:3) Bakaleho ba Yehova bali na kuzibisa Njambi kubwaha na kukwasa bakwabo. Ngeci banapu naanga ya kubwahelela manene hano hasi.—Tandeni Myaso 33:12; Vilinga 20:35.
