CILONGESA 6
Batsi Bakasanguka Ndi?
1. Muzimbu muka waubwa unendeka ha batsi?
Yesu wetele ku Mbetaniya kuyehi na Yelusalema. Ha simbu eyi, te muneti matangwa awana kutunda ha kutsa kwa kabusamba kendi Lazalu. Yesu waile ku mbumbo na bandokazi ba Lazalu, ba Mata na Maliya. Co banu babangi bakungulukile. Acisinganyekeni kubwaha kubazibile ba Mata na Maliya omwo Yesu wasangwile ndolome yabo Lazalu.—Tandeni Yowano 11:21-24, 38-44.
Mata wazibukile laja biwendekele muzimbu waubwa ha batsi. Wazibukile ngwendi Yehova akasangula batsi mangana bakayoye lalo hano hasi.—Tandeni Yombi 14:14, 15.
2. Cifwa muka cibalimo batsi?
Njambi walekele Adama ngwendi: “Watundile ku libu, co ukeluka lalo ku libu.”—KUSHANGUMUKA 3:19.
Banu babatangele kutunda ku libu. (Kushangumuka 2:7; 3:19) Kutwakele na mibila ya ku sipilitu embwe. Twakala na mibila ya situ, ngeci nacimo cahi cikatundu kuli yetu nga tunatsi. Nga tunatsi, bwongo bwetu bukalikele kupanga, co matumbe etu lalo akahu. Mukemwo Lazalu kendekele bimo kukundama ku kutsa kwendi, mwafwa batsi kubazibuka cuma nambe cimo.—Tandeni Myaso 146:4; Muka-kwambulula 9:5, 6, 10.
Kuma Njambi akayandesa banu mu tuhya nga banatsi ndi? Mbimbiliya inamwesa ngwayo batsi kubazibuka cuma cimo. Ngeci, cilongesa ca kuyandesa banu mu mbulu ya tuhya capwa ca makuli, co lalo cishawisa Njambi. Njambi wamona kuyandesa banu mu tuhya kupwa kwa bunyengwe.—Tandeni Kwituluka mu Mashiko 12:31.
3. Batsi basa kwendeka netu ndi?
Batsi kubasa kwendeka nambe kuziba. (Myaso 115:17) Oloni tungelo bababi basa kwendeka na banu na kulikwisa ngwe banu baje batsa. (2 Petulu 2:4) Yehova natubindika kwendeka na batsi.—Tandeni Kwituluka mu Mashiko 18:10, 11.
4. Banu muka baje bakasanguka?
Banu babangi baje banatsi bakasanguka na kuyoya lalo hano hasi. Ha banu aba, hakakala na bamo baje balingile bubi mwafwa ya kujeneka kuzibuka Njambi.—Tandeni Luka 23:43; Vilinga 24:15.
Baje bakasanguka bakabalongesa mangana bakazibuke Njambi na kwononoka Yesu na kumukulahela. (Kujombolola 20:11-13) Co baje bakalinga byuma byabibwa bakayoya myaka yoshe hano hasi.—Tandeni Yowano 5:28, 29.
5. Lilabelelo lya kusanguka litulongesa bika hali Yehova?
Tunamono ngwetu Yehova wakala na cizemo na ngozi manene mwafwa akasangula batsi. Njambi wamwesele ngwendi akasangula batsi omwo watumine Munendi kwa kwija mu kututsila. Mubakasanguka batsi, iya imushaka manene kukamona?—Tandeni Yowano 3:16; Loma 6:23.
