CILONGESA 7
Bumwene bwa Njambi Bwapwa Buka?
1. Bumwene bwa Njambi bwapwa buka?
Mwafwa bika Yesu nafwila kupwa Mwene? —MAKO 1:40-42.
Bumwene bwa Njambi bunapu fulumende ya mwilu. Obu Bumwene bukainga bifulumende byoshe bya hasi. Njambi akapangesa obu Bumwene mu kulinga cizango cendi mwilu na hano hasi. Muzimbu wa byuma bibukalinga Bumwene bwa Njambi unapu waubwa kuli yetu. Ololo Bumwene bwa Njambi bunena ciyulo cacibwa cibashaka banu. Bukanena likwatasano ku banu boshe hano hasi.—Tandeni Ndanyele 2:44; Mateo 6:9, 10; 24:14.
Bumwene bwoshe bunapande kukala na mwene. Yehova wangwile Munendi Yesu Kilistu, kupwa Mwene wa Bumwene bwendi.—Tandeni Kujombolola 11:15.
2. Mwafwa bika Yesu nafwila kupwa Mwene?
Muna Njambi nafwila kupwa Mwene mwafwa wakala na ngozi, co washaka kulinga byuma byabibwa. (Mateo 11:28-30) Co lalo ali na nzili ya kukwasa banu mwafwa akayula hasi hoshe. Yesu mwasangukile, waile mwilu na kukatumbama ku liboko lya cilyo lya Yehova mu kubandamena kumwana nzili ya kuyula. (Vahevelu 10:12, 13) Co Njambi wamwanene nzili ya kushangumuka kuyula.—Tandeni Ndanyele 7:13, 14.
3. Beya bakayula hamo na Yesu?
Yesu akayula hamo na cibunga ca banu babatumbula ngwabo “banu ba Njambi,” nambe banu ba kujela. (Ndanyele 7:27) Banu ba kujela babalibangele kwangula bapwile tupositolo ba Yesu. Yehova acili na kwangula banalume na banakazi ba kulongwa kupwa banu ba kujela. Aba banu bali na kubasangula na mibila ya ku sipilitu, ngwe muje mubasangwile Yesu.—Tandeni Yowano 14:1-3; 1 Kolinte 15:42-44.
Banu bangahi bakaya mwilu? Yesu wabatumbwile ngwendi “mbunga yaindondo.” (Luka 12:32) Bungi bwabo bapwa 144,000. Co bakayula lino lifuti hamo na Yesu.—Tandeni Kujombolola 14:1.
4. Bika byalingiwile omwo Yesu washangumukile kuyula?
Bumwene bwa Njambi bwashangumukile kuyula mu 1914. * Yesu mwashangumukile kuyula, wabangele kusheka Satana na bandemone bendi mwilu na kubombila hano hasi. Satana walubalele na kushangumuka kunena tuyando hano hasi. (Kujombolola 12:7-10, 12) Kushwa bene ha simbu ije, tuyando tunalibwezelela. Binzita, binjala, mishongo ya kulitambwisa na mandunduma binapu “cizibukiso” ca kumwesa ngwaco Bumwene bwa Njambi ololo buyula hasi hoshe.—Tandeni Luka 21:7, 10, 11, 31.
5. Bumwene bwa Njambi buli na kulinga byuma muka?
Kwitila mu cipangi ca kwambulula, Bumwene bwa Njambi buli na kukungulula mbunga yakama ya banu ba ku mafuti oshe. Banu babangi bababotsi bimbunge banataba kubayula kuli Yesu. Bumwene bwa Njambi bukabanyungilila omwo bakatundisako futisi yaibi hano hasi. Boshe baje bashaka ngwabo Bumwene bwa Njambi bubabezikise banapande kwononoka Yesu.—Tandeni Kujombolola 7:9, 14, 16, 17.
Ha myaka 1,000, Bumwene bwa Njambi bukalinga byuma byayongwele kulingila banu Njambi ha kulibanga. Hasi hoshe hakapwa paladaisi. Mamaneselelo, Yesu akelwisa Bumwene kuli Ishe. (1 Kolinte 15:24-26) Iya imushaka kulekako ou muzimbu wa Bumwene bwa Njambi?—Tandeni Myaso 37:10, 11, 29.
^ par. 6 Nga mushaka kuzibuka mubwendekele bupolofweto bwa mu Mbimbiliya ha mwaka wa 1914, co taleni liputa 217-220 mu libulu lya Vika Viyitulongetha Mbimbiliya?
