Mu bulombelo bwoshe muli banu bamo ba bimbunge byabibwa. Njambi namono aba banu, co ashaka kubakwasa. Ou unapu muzimbu waubwa. Calubinda, bulombelo bali na kubupangesa mu ngila yaibi. (2 Kolinte 4:3, 4; 11:13-15) Mizimbu inamwesa ngwayo bulombelo buli na kukundwiya binzita na bilinga bya bukenya. Co bantwama ba mu bulombelo bali na kuyandesa banike na kulinga nabo bukwizi. Bubi bwa cifwa eci buli na kuzibisa kubihya baje bashaka kulemesa Njambi.​—Tandeni Mateo 24:3-5, 11, 12.

Bulombelo bwa busunga buli na kuzibisa Njambi kubwaha, oloni bulombelo bwa makuli buli na kumuzibisa kubihya. Bulombelo bwa makuli buli na kulongesa byuma bije kubyesi mu Mbimbiliya na bilongesa byeka bya makuli bije binendeka hali Njambi na ha batsi. Oloni Yehova ashaka banu bazibuke busunga bwendi.​—Tandeni Ezekiyele 18:4; 1 Timateo 2:3-5.

Baka-bulombelo baje bali na kulishasha ngwabo twazema Njambi, oloni bazema kaye ka Satana kubasa kukwisa Njambi. (Yakomba 4:4) Mbimbiliya inatumbula bulombelo bwoshe bwa makuli ngwayo “Mbambilone Wakama.” Mbambilone yapwile nganda ya kusañulu. Co bulombelo bwa makuli bwashangumukilile omu mu nganda munima ya Libazi lya Nowa. Ololo Njambi anyongesa bulombelo buje buli na kukwisa banu na kubayandesa.​—Tandeni Kujombolola 17:1, 2, 5, 16, 17; 18:8.

Yehova kebalele banu ba bimbunge byabibwa baje bali mu bulombelo bwa makuli mu kaye koshe. Ali kubalongesa busunga, co bali na kutunda mu bulombelo bwa makuli. Ou unapu muzimbu waubwa.​—Tandeni Mika 4:2, 5.

Yehova naka mbunge baje bashaka kuzibuka busunga na kulinga byuma byabibwa. Ali na kubashongangeya baseze bulombelo bwa makuli. Baje bazema Njambi banaseze bulombelo bwa makuli na bilinga byabo byabibi mangana bazibise Njambi kubwaha.​—Tandeni Kujombolola 18:4.

Mu simbu ya tupositolo, banu ba bimbunge byabibwa babwahelelele mubazibile muzimbu waubwa ubambulwile tupositolo. Yehova wabalongesele ngila yaiha ya kuyoyelamo, ngila ije yabazibisile kubwaha na kubalingisa bakale na lilabelelo. Baje banu banapu mwanja waubwa kuli yetu mwafwa batabele muzimbu waubwa na kwaka Yehova kulutwe mu kuyoya kwabo.​—Tandeni 1 Tesalonika 1:8, 9; 2:13.

Yehova ali na kutambula boshe baje baseza bulombelo bwa makuli na kwija mu munga yendi. Neni Yehova namilanya. Nga mutaba, co mupwa kabusamba kendi, mulikwatasana na naanga yaiha ya baje bali na kumulemesa. Co lalo mukayoya myaka yoshe.​—Tandeni Mako 10:29, 30; 2 Kolinte 6:17, 18.

Njambi ololo anyongesa bulombelo bwa makuli. Ou unapu muzimbu waubwa, mwafwa kubukayandesa banu mu kaye. Bulombelo bwa makuli kubukongumuna lalo banu nambe kubangununa embwe. Banu boshe bakalikwatasana hamo mu kulemesa Njambi umolika wa busunga.​—Tandeni Kujombolola 18:20, 21; 21:3, 4.