Njambi nalanya banu boshe balombele kuli ikeye mangana balikute nendi busamba. (Myaso 65:2) Njambi kesi kutolilila nambe kutaba malombelo oshe. Cakumwenako, munalume uje ayandesa munakazi wendi alingisa malombelo endi onwe kweta kuli Njambi. (1 Petulu 3:7) Omwo Baisalele batwaleleleho kulinga bubi, Njambi wabyanene kutolilila ku malombelo abo. Nameme ngoco, Njambi asa kutaba malombelo a baka-bubi baje batenguluka ku bubi bwabo. Kulombela kuli Njambi kunapu kubezika kwakama manene.​—Tandeni Isaya 1:15; 55:7.

Kulombela kunapu ngila imo ya kulemeselamo Njambi. Ngeci tunapande kulombela lika kuli Ishamatanga yetu, Yehova. (Mateo 4:10; 6:9) Co lalo kutwalumbunukile, ngeci tunapande kulombelela mu lizina lya Yesu mwafwa ikeye watutsililile ku bubi bwetu. (Yowano 14:6) Yehova kashaka ngwendi twilukile-ilukile malombelo amolika, nambe kuwasoneka ha mapapelo embwe. Ashaka tulombele kutundilila kwisi ya bimbunge byetu.​—Tandeni Mateo 6:7; Filipu 4:6, 7.

Njambi asa kuziba malombelo atwendekela mu mbunge yetu. (1 Samwele 1:12, 13) Ashaka ngwendi tulombele kuli ikeye simbu yoshe yoshe. Twasa kulombela omwo tuya mu kulala na butsiki nomwo twinduka na mutondo, na ha simbu ya kulya, nambe omwo tuliwana na bukalu.​—Tandeni Myaso 55:22; Mateo 15:36.

Kunapu kwakukalu kulikuta busamba na Njambi, mwafwa tuli na kuyoya na banu baje kubakulahelele Njambi na kubyana ngwabo kakanene kwoloka hano hasi. (2 Timateo 3:1, 4; 2 Petulu 3:3, 13) Ngeci tunapande kulikungulula hamolika na bakwetu baka-kukulahela mangana tulitakamese umo na mukwabo.​—Tandeni Vahevelu 10:24, 25.

Kulikwatasana na banu baje bazema Njambi kutukwasa tulikute busamba na Njambi. Kuya ku biwano bya Bakaleho ba Yehova kutukwasa mwafwa likulahelo lya bakwetu litutakamesa.​—Tandeni Loma 1:11, 12.

Mulikuta busamba na Yehova nga musinganyekesesa ha byuma bimunalilongesa mu Lijwi lyendi, Mbimbiliya. Singanyekeni ha bipangi byendi, ha mashiko endi na ha byuma byanatukulahesa. Nga tulombela na kusinganyekesesa kutukwasa tuzibuke mwamubwa cizemo ca Njambi na mana endi.​—Tandeni Yoshwa 1:8; Myaso 1:1-3.

Nga mukulahela Njambi, co busamba bweni butwalelelaho. Likulahelo linapu ngwe bintemo bije bishaka libu lya bwilo na mema mangana bikole. Neni munapande kukolesa likulahelo lyeni mu kusinganyeka ha byuma bije byamilingisa mukulahele.​—Tandeni Mateo 4:4; Vahevelu 11:1, 6.

Yehova akanyungu baje bamuzema. Asa kubanyunga ku byuma bije bibonowesa kukala na likulahelo na lilabelelo lya kukayoya myaka yoshe. (Myaso 91:1, 2, 7-10) Ali na kutunangula mangana tujenjuke ku bilinga bije bibiisa mibila yetu, nambe kutwonowesa kupwa ba kubwahelela. Yehova ali kutulongesa ngila yaibwa ya kuyoyelamo.​—Tandeni Myaso 73:27, 28; Yakomba 4:4, 8.