Bubi bwashangumukilile hano hasi omwo Satana wendekele makuli. Ha kulibanga, Satana wapwile kangelo wa kulumbunuka, oloni “kapwile muka-busunga embwe.” (Yowano 8:44) Washakele ngwendi bamulemese ikeye kutubakana kulemesa Njambi. Wakwisile munakazi wa kulibanga Eva. Washongangeyeye Eva mangana amwononoke kutubakana kwonoka Njambi. Adama watolililile Eva, co nendi kononokele Njambi. Cuma calingile Adama cinanenesa tuyando na kutsa.​—Tandeni Kushangumuka 3:1-6, 19.

Satana wakwisile Eva mangana keti ononoke Njambi. Oku kwamwesele ngwabo Satana nashangumuka kutengulukila ciyulo ca Njambi. Banu babangi banalikwatasana na Satana, co banabyana kubayula kuli Njambi. Satana ikeye honi ali na kuyula kano kaye.​—Tandeni Yowano 14:30; 1 Yowano 5:19.

Byoshe byatangele Njambi byapwile bya kulumbunuka. Banu na tungelo baje batangele Njambi bakele na cashu ca kumwononoka mu byuma byoshe. (Kwituluka mu Mashiko 32:4, 5) Njambi watutangele na nzili ya kulyangwila kulinga byuma byabibwa nambe byabibi. Eyi nzili ya kulyangwila, itukwasa tumwese indi twazema Njambi.​—Tandeni Yakomba 1:13-15; 1 Yowano 5:3.

Yehova necelela Satana na banu batengulukile ciyulo cendi ha kasimbu kakandondo lika. Mwafwa bika? Ashaka kumwesa ngwendi banu kubasa kuliyula mwamubwa kwa kujeneka ikeye. (Muka-kwambulula 7:29; 8:9) Ha myaka 6,000 ibanaliyulu banu,  banamwesa ngwabo kubasa kuyula mwamubwa. Banu banonwa kutundisako binzita, butozi, bilinga byabibi na mishongo.​—Tandeni Njelemiya 10:23; Loma 9:17.

Ciyulo ca Njambi cacibwa kutubakana ciyulo ca banu mwafwa cikabezikisa baje bacikabangeya. (Isaya 48:17, 18) Ololo Yehova atundisako bifulumende bya banu byoshe. Oloni baje bashaka kubayula kuli Njambi bakebo lika bakakala hano hasi.—Isaya 11:9.​—Tandeni Ndanyele 2:44.

Satana wendekele ngwendi banu bali na kupangela Yehova mwafwa ya byuma byanabana. Mwasa kumwesa ngweni Satana wapwa muka-makuli ndi? Eyo mwasa. Mbunge ya Njambi ya kubandamena inatwana simbu ya kumwesa ngwetu tushaka kutuyula kuli Njambi indi ku banu. Yoyesi yetu imwesa iya itushaka ngwetu atuyule.​—Tandeni Yombi 1:8-12; Visimo 27:11.

Nga tushakezeka kulemesa kwa busunga kuje kunemana ha Lijwi lya Njambi, Mbimbiliya, co tumwesa ngwetu tunangula Njambi mangana atuyule. (Yowano 4:23) Tumwesa lalo ngwetu tunabyana kututwamenena kuli Satana nga tubyana biñanda bya bupolitiki nameme kuya ku nzita, ngwe mwalingile Yesu.​—Tandeni Yowano 17:14.

Satana ali na kupangesa nzili yendi mu kukundwiya bilinga byabibi bisholoke ngwe byabibwa. Babusamba betu na babushoko bwetu bamo banasa kutujola, nambe kutulwisa nga tubyana bilinga bya cifwa eci. (1 Petulu 4:3, 4) Ngeci tuzibukeni byakulinga. Tulikwatasana na banu baje bazema Njambi ndi? Tukabangeya mashiko endi amabwa ndi? Nga tulinga ngoco, tumwesa ngwetu Satana walikwisile mwendekele ngwendi kutwasa kwononoka Njambi nga tuli mu bukalu.​—Tandeni 1 Kolinte 6:9, 10; 15:33.

Njambi akatundisako bubi na tuyando mwafwa wazema banu. Baje bamwesa ngwabo banakulahela bakayoya myaka yoshe hano hasi.​—Tandeni Yowano 3:16.