Njambi wa busunga ikeye watangele byuma byoshe. Kesi na maputukilo nambe mamaneselelo. (Myaso 90:2) Ikeye babenya muzimbu waubwa wa mu Mbimbiliya. (1 Timateo 1:11) Tunapande kulemesa Njambi lika mwafwa ikeye natwana kuyoya.​—Tandeni Kujombolola 4:11.

Kukwesi munu wamona laja Njambi mwafwa wapwa Sipilitu. Co wakala na nzili na mana manene kutubakana banu hano hasi. (Yowano 1:18; 4:24) Nameme ngoco, twasa kunanguka bifwa bya Njambi ku byuma byatangele. Cakumwenako, bushuka bwa kulisezaseza na bintemo bimwesa ngwabyo Njambi wakala na cizemo na mana. Byuma byatangele mwilu na hasi bimwesa nzili yendi.​—Tandeni Loma 1:20.

Twasa kulilongesa bifwa bikwabo bya Njambi mu kutanda Mbimbiliya. Cakumwenako, inatuleke byuma byashaka Njambi na bije kashakele. Inatuleke byakalingi Njambi ku banu, nomwo mwakalizibila nga kunasholoka bukalu.​—Tandeni Myaso 103:7-10.

Yesu wendekele ngwendi: ‘Obe Tate yetu uli mwilu, balemese lizina lyobe.’ (Mateo 6:9) Njambi bakamusana na majwi amangi, oloni wakala na lizina limo lika. Lizina lyendi balitumbula mu bingila bya kulisezaseza kweseka na ndaka ya munu. Mu Mbunda tulitumbula ngwetu “Yehova.” Bamo balitumbula ngwabo “Yawe.”​—Tandeni Myaso 83:18, NWT.

Mu Bimbimbiliya byabingi, lizina lya Njambi banalitundisamo na kwingisamo majwi a kufwa ngwe Shukulu, nambe Njambi. Oloni mubasonekele Mbimbiliya, lizina lya Njambi  balisonekelemo lwa kupwa 7,000. Yesu wazibukisile lizina lya Njambi mwalongesele banu.​—Tandeni Yowano 17:26.

Kuma bukalu butuli na kumona bumwesa ngwabwo Yehova katwakele mbunge ndi? Embwe. Nameme banu bamo bakendeka ngwabo Njambi ali na kutuyandesa mangana atweseke, oloni keti mukemwo.​—Tandeni Yakomba 1:13.

Njambi natusingimika mu kutwana nzili ya kulyangwila byakulinga. Co tunakandelela kutwana eyi nzili ya kulyangwila kupangela Njambi. (Yoshwa 24:15) Oloni babangi banangula kulinga bubi ku bakwabo mukemwo tuyando tunatumu. Yehova akazibi kubihya kumona bubi bya cifwa eci.​—Tandeni Kushangumuka 6:5, 6.

Yehova Njambi watwaka mbunge. Ashaka ngwendi tuyoye mwamubwa. Co ololo atundisako tuyando na baje bali na kutunena. Oloni mu simbu ino necelele banu bayande. Mu Cilongesa 8, tusimutwiya cuma cinalingisa Njambi ecelele tuyando.​—Tandeni 2 Petulu 2:9; 3:7, 13.

Yehova natulanya tulombele kuli ikeye mangana tulikute nendi busamba. Njambi watwaka mbunge munu na munu. (Myaso 65:2; 145:18) Co ashaka kutusambesa. Bisimbu bimo, tukonwa kuzibisa Njambi kubwaha. Nameme ngoco, ali na kumona mutuli na kulifwita mangana tumuzibise kubwaha. Ngeci, twasa kupwa babusamba ba Njambi nameme kutwalumbunukile.​—Tandeni Myaso 103:12-14; Yakomba 4:8.

Yehova natwana kuyoya. Ngeci, tunapande kumuzema manene kutubakana byuma byoshe. (Mako 12:30) Nga mulilongesa byabingi hali Njambi na kulinga byuma byashaka, co mumuzema manene. Oku kumilingisa mukanyamese busamba bweni na Njambi.​—Tandeni 1 Timateo 2:4; 1 Yowano 5:3.