Tunakulahela ngwetu ebi byuma bimunalilongesa laja mu Mbimbiliya binamikwasa muzeme Yehova. Ngeci, lifwiteni mangana muzeme manene Yehova. (1 Petulu 2:2) Nga mushaka ngweni mukayoye myaka yoshe, co munapande kutwalelelaho kulilongesa Lijwi lya Njambi mangana mukanyamese busamba bweni.​—Tandeni Yowano 17:3; Yunda 21.

Omwo mulilongesa byabingi hali Njambi, likulahelo lyeni likanyama. Co likulahelo limikwasa muzibise Njambi kubwaha. (Vahevelu 11:1, 6) Limikwasa lalo mutenguluke ku bubi bweni na kuyoya mu ngila yaibwa.​—Tandeni Vilinga 3:19.

Yetu banu twashaka kulekako bakwetu mizimbu yaibwa. Ngeci neni mulekako bakweni byuma bimunalilongesa. Omwo mutwalelelaho kulilongesa Mbimbiliya, munanguka mwakupangesela Mbimbiliya. Oku kumilingisa mulekeko bakweni muzimbu waubwa na byuma bimwakulahela hali Yehova.​—Tandeni Loma 10:13-15.

Mwasa kushangumuka kulekako babusamba beni nambe babushoko bweni muzimbu waubwa. Oloni munapande kwendeka mu kunyanyama. Keti mubaleke ngweni bulombelo bwabo bwa makuli embwe. Balekeni lika byuma byanatukulahesa Njambi. Anukeni lalo ngweni bifwa byeni byabibwa bikebyo bizibisa banu kubwaha, keti byuma bimwendeka lika embwe.​—Tandeni 2 Timateo 2:24, 25.

Nga mulilongesa Lijwi lya Njambi, co mukola ku sipilitu. Mu kwita kwa simbu, mukala mu busamba bwabubwa na Yehova.  Mulikwatasana nendi na kukala mu naanga yendi.​—Tandeni 2 Kolinte 6:18.

Mukanyamesa busamba bweni na Njambi nga mutwalelelaho kulilongesa Lijwi lyendi. (Vahevelu 5:13, 14) Lekeni umo wa Bakaleho ba Yehova mangana mulilongese nendi Mbimbiliya mu libulu lya Bika Biitulongesa Mbimbiliya? Nga mulilongesa manene Lijwi lya Njambi, co muyoya mwamubwa.​—Tandeni Myaso 1:1-3; 73:27, 28.

Muzimbu waubwa ukatundu kuli Yehova, Njambi wa kubwahelela. Nga mulikuta busamba na banu ba Njambi, co kumilingisa mulikute musamba nendi. (Vahevelu 10:24, 25) Lifwiteni kuzibisa Yehova kubwaha, co mukawana kuyoya kwa myaka yoshe. Mulinga mwamubwa manene nga mulikuta busamba na Njambi.​—Tandeni 1 Timateo 1:11; 6:19.