CILONGESA 10
Mwasa Bati Kuzibuka Bulombelo bwa Busunga?
1. Kuli bulombelo bumo lika bwa busunga ndi?
‘Nyanyameni na tupolofweto bamakuli.’—MATEO 7:15.
Yesu walekele baka-kumukabangeya bulombelo bumo lika bwa busunga. Obu bulombelo bunapu ngwe ngila ije iya ku kuyoya kwa myaka yoshe. Yesu wendekele ngwendi: “Baje baiwana banapu babandondo.” (Mateo 7:14) Njambi ashaka lika bulombelo buje bunemana ha Lijwi lyendi, Mbimbiliya. Baka-kulemesa ba busunga boshe bakulahela byuma bimo lika.—Tandeni Yowano 4:23, 24; 14:6; Efeso 4:4, 5.
2. Bika byendekele Yesu hali baka-Kilistu ba makuli?
“Bendeka ngwabo bazibuka Njambi, oloni ku bipangi byabo banamubyana.”—TITO 1:16.
Yesu wendekele ngwendi tupolofweto ba makuli bakabiisa bilinga bya baka-Kilistu. Aba tupolofweto ba makuli bali na kulimwesa ngwe baka-kulemesa ba busunga. Banu ba mu biceci byabo bali na kulitumbula ngwabo baka-Kilistu. Oloni mwasa kuzibuka ngweni keti baka-Kilistu ba busunga. Mwasa kuzibuka bati ngoco? Mubazibukila ku bifwa byabo na ku bilinga byabo. Baka-Kilistu ba busunga nabo lalo twasa kubazibuka.—Tandeni Mateo 7:13-23.
3. Mwasa kuzibuka bati baje bali na kulemesa Njambi mu busunga?
Nangukeni byuma bino bitanu bya kubazibukilaho:
-
Baka-kulemesa ba busunga bamona Mbimbiliya kupwa Lijwi lya Njambi. Bali na kupangesa binangulo bya mu Mbimbiliya. Bulombelo bwa busunga bwaliseze na bulombelo buje bulongesa biyongola bya banu. (Mateo 15:7-9) Baka-kulemesa Njambi mu busunga bakalingi byuma bibali na kulongesa bakwabo.—Tandeni Yowano 17:17; 2 Timateo 3:16, 17.
-
Bandongesi ba Yesu ba busunga bamona lizina lya Njambi, Yehova, kupwa lya seho. Yesu wamwene lizina lya Njambi kupwa lya seho mukemwo walizibukisile ku banu. Wakwasele banu bazibuke Njambi. Co lalo wabalekele balombele ngwabo lizina lya Njambi balijelese. (Mateo 6:9) Bulombelo muka buli na kuzibukisa banu lizina lya Njambi mu citingitingi ceni?—Tandeni Yowano 17:26; Loma 10:13, 14.
-
Baka-Kilistu ba busunga bali na kwambulula bya Bumwene bwa Njambi. Njambi watumine Yesu kwa kwambulula muzimbu waubwa wa Bumwene. Bumwene bwa Njambi bukebwo bukamanesa tuyando twa banu. Yesu wendekele bya Bumwene bwa Njambi kweta na ku litangwa libamutsiile. (Luka 4:43; 8:1; 23:42, 43) Wendekele ngwendi baka-kumukabangeya bakambulula obu Bumwene. Nga munu aija kuli yeni mu kwendeka bya Bumwene bwa Njambi, musinganyeka ngweni natundu ku bulombelo muka?—Tandeni Mateo 24:14.
-
Bandongesi ba Yesu kubakundamene ku kaye kano kakabi. Mwasa kubazibuka mwafwa kubesi kulikobelesa mu bupolitiki nambe kulicokota ha biñanda byeka. (Yowano 17:16; 18:36) Co lalo kubesi kutembwinina bilinga byabibi na futisi yaibi ya muno mu kaye.—Tandeni Yakomba 4:4.
-
Baka-Kilistu ba busunga balizema umo na mukwabo. Lijwi lya Njambi linabalongesa kusingimika miyati ya banu boshe. Mu bulombelo bwa makuli bakakundwiya binzita bibakalu mu mafuti, oloni mu bulombelo bwa busunga kubesi kulinga ngoco. (Mika 4:1-3) Baka-Kilistu ba busunga bali na kupangesa simbu yabo na bufuko bwabo mu kukwasa bakwabo na kubakanyamesa.—Tandeni Yowano 13:34, 35; 1 Yowano 4:20.
4. Mwasa kuzibuka bulombelo bwa busunga ndi?
Bulombelo muka buli na kulongesa bya mu Mbimbiliya? Bulombelo muka bwamona lizina lya Njambi kupwa lya seho? Bulombelo muka buli na kwambulula ngwabwo Bumwene bwa Njambi bukebwo lika bukamanesa tuyando twa banu? Banu muka bazema bakwabo na kubyana kuya ku nzita? Mukumbulula ngweni bati?—Tandeni 1 Yowano 3:10-12.
