Vulo vukashangumuka nanga yaiha. Nambe vene mutwalelela kuthzema vithemi veni na kuvathingimika, oloni muka-njuvo yeni mumoneni kupwa munu wa kulema manene hano hathi. Eyi thimpi yatha kupwa yayikalu kuyithzivithitha kuli vavushoko vweni vamo. Oloni mashiko a mu Mbimbiliya atha kumikwatha muyoye na vavushoko vweni mu kwoloka, omwo mupanga na ndthzili mu kukanyametha vushoko vwa mu nanga yeni yayiha.

VYUMA VIYENDEKA MBIMBILIYA: “Thingimikeni vaishweni na vanyokweni.” (Efeso 6:2) Nameme munakolo, munapande kwononoka vithemi veni na kuvathingimika. Thzivukeni lalo ngweni muka-njuvo yeni nendi napande kwaka mana kuli vithemi vendi. “Chithzemo kuchethi na lifuwa,” ngechi kethi muluvale nga muka-njuvo yeni athzema vavushoko vwendi.—1 Kolinte 13:4; Ngalatiya 5:26.

VYUMA VIMWATHA KULINGA:

• Jenjukeni ku endekethi ya majwi akufwa ngwe “Vavushoko vwove vakanjishaula thimbu yoshe” nambe “Vanyoko vathzinda vinjikalingi”

• Thinganyekeni ngwe omwo ali na kuthinganyeka muka-njuvo yeni

VYUMA VIYENDEKA MBIMBILIYA: “Munalume akathethza ishe na vaina na kulipandakana na munakathzi wendi, cho vakapwa muvila umo lika.” (Kushangumuka 2:24) Omwo mukovela mu vulo, vithemi veni vanatha kuthinganyeka ngwavo muchili mu mavoko avo, ngechi vanatha kukovela ha vulo vweni na kushaka kumitwamenena.

Lithzivathaneni mu vuvali vweni ha viñanda vya mu vulo vije kuvapandele kulikoveletha vithemi veni, na kuvalekavyo. Valekeni vuthunga, oloni kethi mwendeke na likamba. (Vithimo 15:1) Kulilumbilitha na kulikehetha na lukakateya, vyatha kukanyametha vushoko vweni na kulisholwela “chizemo cheni mu kuliyandela umo na mukwavo.”—Efeso 4:2.

VYUMA VIMWATHA KULINGA:

• Nga munamono ngweni vavushoko vweni vali na kutwamenena vulo vweni, cho thimutwiyeni na muka-njuvo yeni ha thimbu inapande

• Lithzivathaneni vwino vingila vya kumanethelamo ovu vukalu