Omwo Yehova washangumukile nanga, wanene vithemi moko ya kutwamenena vana vavo. (Kolose 3:20) Ha kupwa mu vithemi, muli na moko ya kulongetha muneni athzeme Yehova na kumukwatha akole na mana. (2 Timateo 1:5; 3:15) Munapande kunanguka vyuma vili mu mbunge ya muneni. Mumwetheni mwanja weni wauvwa. Mwatha kulongetha muneni Lijwi lya Yehova nga muvangelela kulyaka ku mbunge yeni vavenya.—Myatho 40:8.

VYUMA VIYENDEKA MBIMBILIYA: “Munu woshe napande kuthzambula kuthziva, oloni eshwale kukumbulula.” (Yakomba 1:19) Kwatheni vana veni vathzituke kwendeka neni. Vanapande kuthzivuka ngwavo mwatha kuvatolilila nga vendeka neni. Kaleni na ndthzandthzu mangana vana veni vathzituke kwendeka vili ku vimbunge vyavo. (Yakomba 3:18) Nga vathinganyeka ngwavo muvatenukila, cho kuvatha kumileka. Mwetheni kuthimpa kuli vana veni, na kuvaleka ngweni mwavathzema. —Mateo 3:17; 1 Kolinte 8:1.

VYUMA VIMWATHA KULINGA:

• Nga vana veni vashaka kwendeka neni, cho vatolilileni

• Thimutwiyeni na vana veni thimbu yoshe, kethi lika mu thimbu ya vukalu

VYUMA VIYENDEKA MBIMBILIYA: “Vaka-mana thimbu yoshe vakalivanga kuyongola thimbu kanda vapange.” (Vithimo 13:16) Thimbu imo munapande kutolilila vwino vana veni mangana muthzivuke viyongola vyavo. Kakangi vanike vakendeka na mituto, nambe kwendeka vyeka oku mu mbunge muli vyeka. “Nga ukumbulula omo kanda uthzivithithe ulikokela lika . . . vulema.” (Vithimo 18:13) Kethi muluvale vwathivwathi.—Vithimo 19:11.

VYUMA VIMWATHA KULINGA:

• Kethi muvatwiye vana veni nga vendeka, nambe kuvatenukila ha vyuma vivali na kwendeka

• Anukeni mumwakele na kulithzivila omwo mwapwile mu vanike, na vyuma vije mwamwene kupwa vyakulema

VYUMA VIYENDEKA MBIMBILIYA: “Ove munange, tolilila vilongetha vya isho, cho lalo kethi wivale vilongetha vya vanyoko.” (Vithimo 1:8) Yehova nana vithemi moko ya kutwamenena vana vavo. Munapande kulongetha vana veni vamithingimike na kumyononoka. (Efeso 6:1-3) Vana vatha kuthzivuka nga vithemi vavo ‘kuvalitombwele mwamuvwa mu viyongola.’ (1 Kolinte 1:10) Nga munalipyakana, kethi mulinge vimata hakati ka vana veni, mwafwa vivalingitha vonowe kumithingimika.

VYUMA VIMWATHA KULINGA:

• Thimutwiyeni na kulithzivathana mwakunyanyamethela vana veni

• Nga munalipyakana na muka-njuvo yeni mumulongethela vana veni, cho moneni munayi viyongola vya vaka-njuvo yeni

VYUMA VIYENDEKA MBIMBILIYA: “Longetha mwanike ngila ije mwanapande kwendela.” (Vithimo 22:6) Vana kuvatha kuthzivuka vyuma kwa kujeneka kuvalongetha. Munapande kwangula vingila vya kulongethelamo, nomu mwakuvanyanyamethela. (Myatho127:4; Vithimo 29:17) Kunyanyametha vana kukulumbununa ngwavo munapande kuvapupanga. Oloni munapande kuvakwatha vathzivithithe vimunavanena mashiko. (Vithimo 28:7) Valongetheni lalo vathzeme Lijwi lya Yehova na kwononoka mashiko endi. (Myatho 1:2) Oku kuvakwatha kukala na chitakutaku chachivwa.—VaHevelu 5:14.

VYUMA VIMWATHA KULINGA:

• Kwatheni vana veni vamone Njambi kupwa Munu hendi uje ivatha kukulahela.

• Valongetheni vathzivuke vyuma vyavivi vije vinatha kukala ha intaneti na kuvijenjuka. Valongetheni mwa kujenjukila ku vanu vaje vashaka ngwavo valilale navo.