Tuvavoshe twashaka kukala na vimbongo mangana tukwathe nanga yetu kulanda vyuma viyishaka. (Vithimo 30:8) ‘Vimbongo vikakwatha’ mu vingila vyavingi. (Muka-kwambulula 7:12) Kunatha kupwa kwakukalu kuthimutwiya ha vimbongo, oloni vimbongo kuvyapandele kuminenela vukalu mu vulo vweni. (Efeso 4:32) Vaka-kulyambata vanapande kulikulahela umo na mukwavo na kuthimutwiya muvapangethela vimbongo vyavo.

VYUMA VIYENDEKA MBIMBILIYA: “Nga umo weni ali na vutumbe vwa kutunga kaposhi, cho ha kulivanga atumbama na kulava vingai akafweta, na kumona ngechi ali na vimbongo vya kumanesa vipangi vyendi.” (Luka 14:28) Kunapu kwakuvwa kuyongola mumupangethela vimbongo vyeni. (Amose 3:3) Anguleni vyuma vimushaka kulanda na vimbongo vimwatha kufweta. (Vithimo 31:16) Kethi mulande chamulandela mwafwa ngweni muli na vimbongo embwe. Kethi mulikovelethe mu mikuli. Pangetheni lika vimbongo vimuli navyo.—Vithimo 21:5; 22:7.

VYUMA VIMWATHA KULINGA:

• Nga kunathala vimbongo vimo hanima ya kulanda vyuma vimunashaka, cho thimutwiyeni mumuvipangethela

• Nga vimbongo vinamikehela, cho ethekeleni vyuma vimulanda. Chakumwenako, mwatha kulitelekela vyakulya kutuvakana kulanda vyakulya vya kutelekela chimweja

VYUMA VIYENDEKA MBIMBILIYA: “Chithzango chetu chinapu ha kulinga vya vuthunga, kethi lika ku mesho a [Yehova NW] embwe, oloni na ku mesho a vanu lalo.” (2 Kolinte 8:21) Lekeni muka-njuvo yeni vuthunga vimbongo vimukawana nevi vimukapangetha.

Nga mushaka kupangetha vimbongo vyavingi, vangeni kwihula muka-njuvo yeni. (Vithimo 13:10) Kuthimutwiya mwa kupangethela vimbongo kunena kwoloka mu vulo. Vimbongo vimuwana kethi muvimone kupwa vyeni lika embwe, oloni vinapu vya nanga.—1 Timateo 5:8.

VYUMA VIMWATHA KULINGA:

• Lithzivathaneni theteko ya vimbongo vyanatha kupangetha munu kwa kujeneka kwihula mukwavo

• Thimbu kanda mushangumuke kulilwithila ha vimbongo, thimutwiyeni chimweja mwa kuvipangethela