1 Iwano 5:1-21
5 Woshe akulahela ngwendi Yesu ikeye Kristu nasemuka kuli Njambi, co lalo woshe wazema Njambi Tate wazema bana ba Njambi.
2 Nga tuzema Njambi na kwononoka mashiko endi, co tuzibuka ngwetu twazema bana ba Njambi.
3 Mwafwa kuzema Njambi kulumbununa kunyunga mashiko endi, co mashiko endi kuwapwile a kulema,
4 mwafwa woshe* nasemuka kuli Njambi nahyana kaye, co likulahelo lyetu likelyo linahyana kaye.
5 Iya asa kuhyana kaye? Kuma keti uje nakulahela ngwendi Yesu wapwa Muna Njambi ndi?
6 Yesu Kristu wezile na mema na maninga keti na mema lika, oloni wezile na mema na maninga. Sipilitu nayo ili na kwana bukaleho, mwafwa sipilitu yapwa busunga.
7 Mwafwa kuli byuma bitatu bili na kwana bukaleho:
8 Sipilitu na mema na maninga, co ebi byuma bitatu binalitombola.
9 Cinonwa bukaleho bwa banu tubutaba, kuma bukaleho bwa Njambi kutwapandele kubutaba ndi? Mwafwa Njambi ikeye bene ali na kwana bukaleho hali Munendi.
10 Munu uje akulahela Muna Njambi nataba mu mbunge yendi bukaleho bwanana Njambi kuli ikeye. Munu uje kakulahelele Njambi namupwisa muka-makuli mwafwa kakulahelele bukaleho bwanana Njambi hali Munendi.
11 Co bukaleho bwali na kwana Njambi obu: Watwanene kuyoya kwa myaka yoshe, co oku kuyoya kuli muli Munendi.
12 Woshe nalikwatasana na Mwana ali noku kuyoya. Uje kalikwatasanene na Muna Njambi kesi noku kuyoya.
13 Njili na kumisonekela ebi byuma mangana muzibuke ngweni muli na kuyoya kwa myaka yoshe, yeni munakulahela lizina lya Muna Njambi.
14 Co eci cikeco citunakulahela* kuli ikeye, ngwetu cuma coshe citulomba kwesekesa na cizango cendi atuziba.
15 Co nga tuzibuka ngwetu atuziba mu byuma byoshe bituli na kulomba, tuzibuka ngwetu tuli na byuma byoshe bitulomba mwafwa tunabilombo kuli ikeye.
16 Nga munu amona ndolome yendi ali na kulinga bubi buje kubutwala ku kutsa, amulombeleleko, co Njambi amwana kuyoya, eyo, ana kuyoya kuli baje kubesi na kulinga bubi buje butwala ku kutsa. Kuli bubi buje butwala ku kutsa. Obu bubi keti bukebo bunjili na kumuleka ngwange abulombelele.
17 Bilinga byoshe bya kuhenga byapwa bubi. Nameme ngoco, kuli bubi kubutwala ku kutsa.
18 Tuzibuka ngwetu woshe nasemuka kuli Njambi kesi kutwalelelaho kulinga bubi, oloni uje nasemuka kuli Njambi* amunyungilila, co uje wamubi kasa kumukwata.*
19 Tuzibuka ngwetu tuli ku mutamba wa Njambi, oloni kaye koshe kali mu nzili ya uje wamubi.
20 Oloni tuzibuka ngwetu Muna Njambi naija, co natwana kuzibisisa* mangana tukale na mangana a kuzibuka uje wapwa wa busunga, co tunalikwatasana na uje wapwa wa busunga kwitila muli Munendi Yesu Kristu. Ou ikeye Njambi wa busunga na kuyoya kwa myaka yoshe.
21 Eni bana banjazema, linyungeni ku tumponya.
Majwi a kwinikila
^ Lijwi na lijwi “coshe.”
^ Nambe “citunazituka kwendeka.”
^ Kulumbununa, Yesu Kristu, Muna Njambi.
^ Nambe “kumulambela.”
^ Lijwi na lijwi “kunanguka.”
