1 Korinte 14:1-40
14 Kabangeyeni cizemo, oloni tondeni* manene bwana bwa ku sipilitu, maneneni bwana bwa kupolofweta.
2 Mwafwa uje endeka mu ndaka, kendeka ku banu, oloni endeka kuli Njambi, mwafwa naumo wahi aziba, oloni endeka mahungu a kujela kwitila mu sipilitu.
3 Oloni uje apolofweta, atunga bakwabo na kubashongangeya na kubazembeleka na majwi endi.
4 Uje endeka mu ndaka, alitunga ikeye babenya, oloni uje apolofweta, atunga cikungulukilo.
5 Yange njishaka ngwange mubaboshe mwendeke mu bindaka, oloni maneneni njishaka ngwange mupolofwete. Cili bene uje apolofweta napu wakama kutubakana uje endeka mu bindaka, kubanga alumbunune* asina asa kutunga cikungulukilo.
6 Bandolome, kuma muwana bukwasi nga njija kuli yeni na kwendeka mu bindaka ndi? Kuma kumuwana bukwasi nga njija kuli yeni na kujombolola kwa kutunda kuli Njambi, nambe na mangana, nambe na bupolofweto, nambe na cilongesa ndi?
7 Omu mukemwo bene mubinafu na byuma bya kujeneka kuyoya bije bikatuhula cilumo, bya kufwa ngwe kanamutolilo nambe kalyalya. Nga kuhakala kuliseza kwa ohyesi, munu asa kuzibuka bati bibali na kwimba ha kanamutolilo nambe ha kalyalya?
8 Mwafwa nga munu ohyesa lupembo na cilumo cije kubanongonona bwino banu, iya alibwahesela nzita?
9 Mu ngila imolika, yeni mwendeka mu ndaka, kubanga mupangese majwi amasi aje abazibisisa banu, indi iya asa kuzibuka bimwendeka? Keti ngoconi bimwendeka biya lika mu lihunzi.
10 Muno mu kaye mwakala bindaka bya kuliseza-seza, oloni kukwesi ndaka ibajeneka kuziba banu.
11 Mwafwa nga kunjizibi byuma byali na kwendeka munu, co kuli uje ali na kwendeka njipwa nji muka-kwija, co uje ali na kwendeka, nendi apwa muka-kwija kuli yange.
12 Ngeci, neni nawa ha kuwana ngwe muli na kushungwiya manene bwana bwa sipilitu, lingeni mwoshe mumwasela mangana mukale manene na bwana buje butunga cikungulukilo.
13 Ngeci, uje endeka mu ndaka alombele mangana ase kulumbununa* byali na kwendeka.
14 Mwafwa nga njili na kulombela mu ndaka, bwana bwange bwa sipilitu bukebwo buli na kulombela, oloni bwongo bwange kubwesi na kuzibisisa.
15 Bikoni binjinapande kulinga? Njilomba na bwana bwa sipilitu, oloni njilomba lalo na bwongo bwange. Njimba myaso ya kushangazala na bwana bwa sipilitu, oloni njimba lalo myaso ya kushangazala na bwongo bwange.
16 Keti ngoconi, nga ushangazala na bwana bwa sipilitu, co munu-munu lika uje ali mukati keni endeka bati ngwendi “Ameni” ku lilombelo lyobe lya kukandelela, ha kuwana ngwe ikeye kazibuka biuli na kwendeka?
17 Mwa busunga bene, uli na kulombela kuli Njambi mu ngila yaibwa, oloni mukweni kuwesi na kumutunga.
18 Njikandelela kuli Njambi ngwange njikendeka mu bindaka byabingi kutubakana yeni mubaboshe.
19 Nameme ngoco, njimona ngwange kwakubwa njendeke majwi atanu na bwongo bwange* mu cikungulukilo, mangana njilongese* bakwetu kutubakana njendeke majwi 10, 000 mu ndaka yeka.
20 Bandolome, keti mupwe banike babandondo mu kuzibisisa kweni, oloni pweni banike babandondo ku byuma byabibi, co pweni banu ba kukola mu kuzibisisa kweni.
21 Mu Lishiko banasonekamo ngwabo: “‘Njikendeka kuli aba banu mu bindaka bya baka-kwija na mu tunwa twa bangenzi, nameme ngoco, bakabyana kunjitolilila,’ ngwendi Yehova.”
22 Ngeci, bindaka kubyapwile cizibukiso ca baka-kutaba, oloni byapwa cizibukiso ca baka-kujeneka kutaba, bupolofweto kubwapwile bwa baka-kujeneka kutaba, oloni bwapwa bwa baka-kutaba.
23 Ngeci, nga cikungulukilo coshe cilikungulwila mu mwela umolika, co boshe bendeka mu bindaka, oloni nga kwija banu ngoco nambe baka-kujeneka kutaba, kuma kubamyendeka ngwabo munazaluka ndi?
24 Oloni nga mubaboshe mupolofweta, co kwija muka-kujeneka kutaba nambe munu ngoco, mwaziba bije bimwendeka, bimunangula na kumukwasa alilule mwamubwa.
25 Co mahungu a mu mbunge yendi ajomboloka, co atsikama bene na hasi na kwendeka ngwendi: “Cili bene Njambi ali mukati keni.”
26 Bandolome, bikoni bimunapande kulinga? Mumulikungulwila hamolika, umo emba samu, mukwabo alongesa, mukwabo endeka kujombolola kwa kutunda kuli Njambi, mukwabo endeka ndaka yeka, mukwabo alumbununa. Lingeni ebi byuma byoshe mu kulitunga umo na mukwabo.
27 Co nga bamo bendeka mu ndaka, kwendeke lika babali nambe batatu nga babangi, co balibandamene-bandamene, co lalo kukale muka-kulumbununa.*
28 Nga kukwesi muka-kulumbununa,* banapande kwoloka lika kulu mu cikungulukilo, co balyendekese bakebo babenya na kwendeka kuli Njambi.
29 Nga kuli tupolofweto, co babali nambe batatu bendeke, oloni banu boshe batondesese bulumbunwisi.
30 Oloni umo nga atambula kujombolola kwa kutunda kuli Njambi simbu nacitumama oho bene, co muka-kwendeka wakulibanga oloke kulu.
31 Mwafwa mubaboshe mwasa kulibandamena nga mupolofweta, mangana mulongese boshe na kushongangeya boshe.
32 Co tupolofweto banapande kupangesa mwamubwa bwana bwabo bwa sipilitu.
33 Mwafwa Njambi kapwile Njambi wa liwayanga, oloni wa kwoloka.
Ngwe mubali na kulingila byuma mu bikungulukilo byoshe bya bakujela,
34 banakazi banapande kwoloka mu bikungulukilo mwafwa kubabatabesele kwendeka, oloni banapande kulyaka kwisi ngwe mulyendekela lalo Lishiko.
35 Nga kuli byuma bibashaka kulilongesa, behule banalume babo ku njibo, mwafwa cinapu ca shwamwa munakazi kwendeka mu cikungulukilo.
36 Kuma lijwi lya Njambi lyatundililile kuli yeni indi lyakwetele lika na kuli yeni?
37 Nga munu asinganyeka ngwendi napu kapolofweto nambe banamwana bwana bwa sipilitu, co napande kutaba ngwendi byuma binjili na kumisonekela binapu mashiko a Mwata.
38 Oloni nga munu ombwanesa ebi byuma, nendi bamwombwanesa.*
39 Ngeci, bandolome bange, akeni manene mbunge ku kupolofweta, oloni keti mubindike baje bali na kwendeka mu bindaka,
40 oloni byuma byoshe babilinge mwamubwa nomu mubanabibwahesela.*
Majwi a kwinikila
^ Nambe “shakezekeni.”
^ Nambe “anungulule.”
^ Nambe “kunungulula.”
^ Nambe “kuzibisisa kwange.”
^ Nambe “njilongese na kanwa.”
^ Nambe “muka-kunungulula.”
^ Nambe “muka-kunungulula.”
^ Nambe hamo “nga munu ali kunzimba, co atwalelelaho kukala kunzimba.”
^ Nambe “mubinapande.”
