1 Korinte 3:1-23
3 Ngeci bandolome, kunjasele kwendeka neni ngwe banu ba ku sipilitu, oloni njendekele neni ngwe banu ba ku situ, ngwe bimbututu muli Kristu.
2 Njamyanene mabele, keti byakulya bya kukola, mwafwa te kanda mucikanyame, ikeyeni nameme hano bene kanda mucikanyamenene,
3 mwafwa anga mucinapu mu banu ba ku situ. Ha kuwana ngwe mukati keni muli cipululu na lwozi, kuma keti mu banu ba ku situ ndi? Kuma kumwesi na kwenda ngwe mubali na kwenda baka-kaye ndi?
4 Mwafwa nga ou endeka ngwendi, “Yange nji wa Paulu,” uje ngwendi, “Yange nji wa Apolo,” kumoho kumwesi na kulinga ngwe mubali na kulinga baka-kaye ndi?
5 Apolo napu iyajo? Nambe Paulu napu iyajo? Tunapu lika tu baka-kupangela baje bamikwasele mupwe baka-kutaba. Twapangele lika cipangi catwanene Mwata.
6 Yange njakunine mbuto, Apolo waishangelelele, oloni Njambi ikeye waikolesele
7 mangana keti bashangazale uje akuna nambe uje ashangelela, oloni bashangazale Njambi uje akolesa mbuto.
8 Ngeci, uje akuna na uje ashangelela banapu umo.* Oloni munu na munu akatambula cikandelela kwesekesa na cipangi cendi.
9 Mwafwa tu baka-kupangela hamo na Njambi. Yeni lihya lya Njambi lyali na kulima, yeni mutungo wa Njambi.
10 Kwesekesa na ngozi yakama ya Njambi yananjimwesa, njajalele lubula ngwe muka-kutunga wa mutongwe, oloni munu weka ali na kutungaho. Ngeci, munu na munu anyanyame mwali na kutungilaho.
11 Njambi napwisa Yesu Kristu kupwa lubula, ngeci naumo wahi asa kujala lubula lweka.
12 Munu asa kutunga aha ha lubula kupangesa goldi, siuva, mamanya a seho, biti, mwila, nambe bishati,
13 oloni kumamaneselelo, cipangi ca munu na munu cikasholoka mucinapu, mwafwa cikasholoka ha litangwa lya ceseko. Mwafwa tuhya tuketwo tukacijombolola, co tuhya tukamwesa mwanatungila munu na munu.
14 Nga canatungu munu ha lubula cisala, co akawana cikandelela.
15 Nga cipangi ca munu cilunguwa, co nabindama, oloni ikeye oboka. Nameme nga oboka, kupwa lika ngwe noboka mu tuhya.
16 Kuma kumuzibuka ngweni yeni bene munapu tempele ya Njambi, co sipilitu ya Njambi ili muli yeni ndi?
17 Nga munu anyongesa tempele ya Njambi, co Njambi amunyongesa, mwafwa tempele ya Njambi inapu ya kujela, co yeni tempele ya Njambi.
18 Keti kukale munu alikwisa ikeye babenya. Nga mukati keni muli umo alimona ngwendi napu wa kunyanyama mu katumameno ka myaka ino,* apwe cilema mangana apwe wa kunyanyama.
19 Mwafwa mana a kano kaye anapu bulema kuli Njambi, ngwe mubanasoneka ngwabo: “Akakwata baka-mana mu makuli abo.”
20 Co lalo ngwabo: “Yehova azibuka ngwendi bisinganyeka bya baka-mana binapu byangoco.”
21 Ngeci, naumo wahi napande kulishashela ha byuma bibakalingi banu, mwafwa byuma byoshe binapu byeni,
22 ipwe bene Paulu, nambe Apolo, nambe Kefasi,* nambe kaye, nambe kuyoya, nambe kutsa, nambe byuma biliko hano, nambe byuma bija kulutwe, byuma byoshe binapu byeni.
23 Yeni munapu mu ba Kristu. Co Kristu napu wa Njambi.
Majwi a kwinikila
^ Nambe “bali na biyongola bimo.”
^ Taleni Majwi Abanalumbununa.
^ Uje ibasana lalo ngwabo Pita.
