1 Korinte 4:1-21
4 Munu napande kutumona ngwendi tu baka-kupanga ba Kristu na bangamba baka-kutala mahungu a kujela a Njambi.
2 Ngeci, cuma cibatonda kuli bangamba, cinapu kupwa ba kulongwa.
3 Yange kunjimono seho ya kunjilula kuli yeni nambe kunjilula ku nkuta ya banu. Nameme yange babenya bene kunjesi kulilula.
4 Mwafwa kunjizibuka byuma binjinabiisa. Oloni oku kukumwesa ngwabo njinapu muka-kusungama. Yehova ikeye anjilula.
5 Ngeci, keti musompe cuma oku simbu yaco kanda yete, kubanga noho hakezila Mwata. Byuma bya mu lisusulungu bya kushwekesa akabinena mu ceke na kujombolola biyongola bya mu bimbunge, co munu na munu bakamushangazala kuli Njambi.
6 Bandolome, njinendeka ebi byuma kutalesa kuli yange na Apolo mangana bimikwase, co kwitila mu myanja yetu mwase kulilongesa eli lishiko lyendeka ngwalyo: “Keti mutubakane byuma bibanasoneka,” mangana keti mulishashe na kuzema umo kutubakana mukwabo.
7 Mwafwa iya na kulingisa uliseze na mukweni? Co bika biuli nabyo, bije kubakwanene? Nga balingile bya kukwana, co bika biulishashela ngwe kubalingile bya kukwana?
8 Kuma munajauka laja ndi? Munafuku laja ndi? Munashangumuka kuyula ngwe bimyene kwa kujeneka yetu ndi? Ngwe mwashangumuka kuyula ngwe bimyene, ngwe cinabwaha manene mangana netu tuyule neni ngwe bimyene.
9 Mwafwa yange njinamono ngwange Njambi naka yetu tupositolo kupwa bamamaneselelo ha liyongwelo ngwe banu baje babanasompela kutsa, mwafwa tunapu cuma cije cikali na kuyongola kaye, na tungelo na banu.
10 Yetu bali na kutumona ngwabo tu bilema mwafwa ya Kristu, oloni yeni muli na kulimona ngweni mu ba kunyanyama muli Kristu. Yetu tusholoka ngwe tu ba kuzeya, oloni yeni musholoka ngwe mu ba kukanyama. Yeni bali na kumisingimika, oloni yetu bali na kutushaula.
11 Kwa kweta bene na lelo lino anga tucili mu njala, tuli na lihwila, tuli mu buzu,* bali na kutupupanga,* kutwesi na binjibo,
12 tuli na kuundangana, tuli na kupanga na maboko etu. Mubatutuka, tubabezikisa, mubatuyandesa, tukolesa.
13 Mubatubiisa mazina, yetu tubakumbulula mu kuwa mbunge.* Tunapu ngwe tu mazilo a kaye, ngwe tu bilinge byangoco bya byuma byoshe.
14 Njili na kumisonekela ebi byuma, keti ngwange njimizibise shwamwa embwe, oloni njili na kuminangula ha kupwa mu bana bange banjazema.
15 Mwafwa nameme mukale na baka-kuminyunga* ba kupwa 10,000 muli Kristu, kumwesi na baishweni babangi, mwafwa muli Kristu yange njinapu ishweni kwitila mu muzimbu waubwa.
16 Ngeci, njimishongangeya ngwange munjitembwinine.
17 Mukemwo njili na kumitumina Timothi, mwafwa napu munange injazema, co lalo wa kulongwa muli Mwata. Akumyanukisa bingila byange binjili na kupangesa mu kulinga byuma byashaka Kristu Yesu, ngwe munjili na kulongesela kwoshe mu cikungulukilo na cikungulukilo.
18 Bamo bali na kulijundula ngwe ngwabo kunjijako okwo.
19 Oloni ololo njija kuli yeni nga Yehova nataba, co njakumona nzili yobo bali na kulijundula, keti bibali na kwendeka.
20 Mwafwa Bumwene bwa Njambi kubwemanene habyendeka, oloni bunemana ha nzili.
21 Bika bimushaka? Njije kuli yeni na mbweti indi njije na cizemo na kuwa mbunge?
Majwi a kwinikila
^ Lijwi na lijwi “mutotototo.”
^ Nambe “kutuhumuna.”
^ Lijwi na lijwi “tubalambelela.”
^ Nambe “balongesi.”
