1 Korinte 5:1-13
5 Njazibi ngwabo mukati keni muli bupangala,* buje bulinga na mukati ka baka-mafuti bwahimo, mwafwa munu umo ali na kuyoya na munakazi wa ishe.
2 Kuma muli na kulishasha ha cuma eci ndi? Kuma kumwapandele kulila mangana munu nalingi eci cuma bamutundise mukati keni ndi?
3 Nameme kunjesi hamo neni ku mubila, oloni njili hamo neni ku sipilitu, co njasompo laja munu nalingi eci cuma ngwe nange njili bene hamo neni.
4 Nga mwalikungulula hamo mu lizina lya Mwata wetu Yesu, na kuzibuka ngweni njili hamo neni ku sipilitu, hamolika na nzili ya Mwata wetu Yesu,
5 co munapande kwana ou munu kuli Satana mangana situ inyonge, sipilitu ikoboke mu litangwa lya Mwata.
6 Kulishasha kweni keti kwakubwa. Kuma kumuzibuka ngweni tumusima* twatundondo tufutunwisa mukasha woshe ndi?
7 Tundiseni musima* wa laja mangana mupwe mukasha wauha ngwe mumunatundila ku musima. Mwafwa cili bene Kristu, muna manga wa Paseka yetu, banamwana kupwa mulambu.
8 Ngeci, keti tulinge cilika na musima wa laja nambe na musima wa byuma byabibi na bubi, oloni tucilingeni na likende lya kujeneka musima lya kulongwa na busunga.
9 Mu mukanda unjamisonekelele, njamisonekelele ngwange mwecele kulikwatasana na baka-bupangala.*
10 Munjendekele ngoco, kunjalumbunwine kwecela kulikwatasana bene na banu ba muno mu kaye na baka-bupangala,* nambe baka-nuna, nambe baka-kulyapula, nambe baka-kulemesa tumponya. Ngwe ngoconi, ngwe kubanga mutunde muno mu kaye.
11 Oloni hano njili na kumisonekela ngwange mwecele kulikwatasana na munu woshe-woshe uje napu ndolome oloni muka-bupangala,* nambe muka-nuna, nambe muka-kulemesa tumponya, nambe muka-matuka,* nambe citakwa, nambe muka-kulyapula. Munu wa cifweci nambe kulya bene keti mulye nendi.
12 Kuma cinapu cipangi cange kusompa banu ba hanja ndi? Kuma kumusompo baje bali mukati,
13 oku Njambi asompa baje bali hanja ndi? “Tundiseni munu wamubi mukati keni.”
Majwi a kwinikila
^ Mu Cigriki por·nei′a. Taleni Majwi Abanalumbununa.
^ Nambe “tucimela.”
^ Nambe “cimela.”
^ Taleni Majwi Abanalumbununa, “Bupangala.”
^ Taleni Majwi Abanalumbununa, “Bupangala.”
^ Taleni Majwi Abanalumbununa, “Bupangala.”
^ Nambe “muka-kwendeka majwi amabi.”
