1 Korinte 6:1-20
6 Nga walipyakana na ndolome yobe, kuma ukaluka bene na kumutwala ku nkuta ku banu ba kujeneka kusungama, kutubakana kuya kuli bakujela ndi?
2 Indi kumuzibuka ngweni bakujela bakasompa kaye ndi? Co nga yeni mukasompa kaye, kuma kumwasa kutala tubiñanda twatundondo ndi?
3 Kuma kumuzibuka ngweni tukasompa tungelo ndi? Co twonowela hali kusompa biñanda bya muno mu kuyoya?
4 Co nga muli na biñanda bya muno mu kuyoya bimunapande kutala, kuma munapande kusana banu baje kucisingimika cikungulukilo bapwe mako ndi?
5 Njili na kwendeka ngacije mangana shwamwa imikole. Kuma mukati keni nambe umo bene ali na mana wahi, uje asa kusompa ñanda ili mukati ka bandolome bendi ndi?
6 Oloni muwana ngweni ndolome atwala ndolome yendi ku nkuta, kuli baka-kujeneka kutaba!
7 Cili bene, nga muli na kulitwala ku binkuta na bakweni, co munonwa laja. Bika kumwecelela bakweni bamibulumwine? Bika kumwecelela bakweni baminyanyamene?
8 Oloni muli na kubulumwina bandolome beni na kubanyanyamena!
9 Kuma kumuzibuka ngweni banu ba kujeneka kusungama kubakaswana Bumwene bwa Njambi ndi? Keti bamyungumune.* Baka-bupangala,* baka-kulemesa tumponya, baka-kulinga bukoi, banalume bataba kubalala ku bakwabo banalume, banalume baje balala bakwabo banalume,*
10 bezi, baka-nuna, bitakwa, baka-matuka* na baka-kulyapula kubakaswana Bumwene bwa Njambi.
11 Yeni bamo mukemwo mumwafwile. Oloni banamijwelesa, co lalo banamijelesa na kumipwisa baka-kusungama mu lizina lya Mwata Yesu Kristu na mu sipilitu ya Njambi yetu.
12 Kuli yange byuma byoshe banabitabesa, oloni keti byuma byoshe bikwasa. Kuli yange byuma byoshe banabitabesa, oloni kunjikatabesa cuma nambe cimo cinjendese.*
13 Byakulya binapu bya lifu, co lifu linapu lya byakulya, oloni byoshe Njambi akabimanesa. Mubila keti wa bupangala,* oloni unapu wa Mwata, co Mwata napu wa mubila.
14 Oloni Njambi wasangwile Mwata, co netu lalo akatusangula ku batsi kwitila mu nzili yendi.
15 Kumuzibuka ngweni mibila yeni inapu bilyo bya Kristu ndi? Kuma njinapande kwambata cilyo ca Kristu na kucinungakana kuli lihule ndi? Embwe, oco kucitaba!
16 Kuma kumuzibuka ngweni uje alinungakana kuli lihule, napu mubila umolika nendi ndi? Mwafwa Njambi nendeka ngwendi “babali bakapwa situ imolika.”
17 Oloni woshe nalinungakana na Mwata, napu mubila umolika nendi mu sipilitu.
18 Teweni ku bupangala! Bubi bwoshe bwalinga munu buli hanja ya mubila wendi, oloni woshe akalingi bupangala* ali na kubulumwina mubila wendi.
19 Kuma kumuzibuka ngweni mubila weni unapu tempele ya sipilitu ya kujela ije ili muli yeni, ije imwatambwile kuli Njambi ndi? Co lalo yeni kumwakundamene kuli yeni babenya.
20 Mwafwa bamilandele na ndando yakama. Ngeci lingeni mwoshe mumwasela mangana mwane Njambi bumpau mu mibila yeni.
Majwi a kwinikila
^ Nambe “bamikwise.”
^ Taleni Majwi Abanalumbununa, “Bupangala.”
^ Nambe “banalume baje balilala na banalume bakwabo.” Lijwi na lijwi “banalume balala na banalume.”
^ Nambe “baka-kwendeka majwi amabi.”
^ Nambe “cikale na nzili hali yange.”
^ Mu Cigriki por·nei′a. Taleni Majwi Abanalumbununa.
^ Mu Cigriki por·nei′a. Taleni Majwi Abanalumbununa.
