1 Korinte 7:1-40
7 Co kwesekesa na bije byuma bimunasonekele, kwakubwa munalume keti akwate* munakazi.
2 Oloni mwafwa ya kulisala kwa bupangala,* munalume na munalume akale na munakazi wendi, co munakazi na munakazi akale na munalume wendi.
3 Munalume ane munakazi wendi bije binamupande, munakazi nendi lalo ane munalume wendi bije binamupande.
4 Munakazi kesi na nzili ha mubila wendi, oloni munalume wendi ikeye ali nayo. Mu ngila imolika, munalume kesi na nzili ha mubila wendi, oloni munakazi wendi ikeye ali nayo.
5 Keti mulyumine umo na mukwabo bije binamipande, kubanga nga mu bubali bweni munalizibasana ha simbu imunangula, mangana mukundike simbu ku kulombela, co hanima muliwane lalo mangana Satana keti atwaleleleho kumyeseka, mwafwa ya kwonowa kukwata mbunge kweni.
6 Oloni munjinendeka ngoco, njinamitabesa lika, keti lishiko njinamyana embwe.
7 Njishaka ngwange banu boshe bapwe ngwe yange. Nameme ngoco, munu na munu ali na bwana bwendi bwanamwana Njambi, ou banamwanako mu ngila ei, mukwabo banamwanako mu ngila ije.
8 Co njili na kwendeka kuli bazike na ku bifwile ngwange kwakubwa nga bakala bene ngeci mwange.
9 Oloni nga kubasa kukwata mbunge, co bakobele mu bulo, mwafwa kwakubwa kukobela mu bulo kutubakana kutsa na mashungu.
10 Kuli baje bali mu bulo njili na kubana mashiko, keti yange, oloni Mwata, ngwange munakazi keti alitepe na munalume wendi.
11 Oloni nga alitepa na munalume wendi, atumame ngoco bene keti ashomboke, nambe eluke kuli munalume wendi, co munalume keti aseze munakazi wendi.
12 Oloni kuli beka, yange keti Mwata, njendeka ngwange nga ndolome ali na munakazi wa kujeneka kutaba, co munakazi nataba kukala nendi, ou ndolome keti aseze munakazi wendi.
13 Co nga munakazi ali na munalume wa kujeneka kutaba, co ou munalume nataba kukala nendi, ou munakazi keti aseze munalume wendi.
14 Mwafwa bulo bwa munalume wa kujeneka kutaba, babumona ngwabo bwa kujela mwafwa ya munakazi wendi, co lalo na bulo bwa munakazi wa kujeneka kutaba babumona ngwabo bwa kujela mwafwa ya ndolome, keti ngoconi bana beni banapu ba kujwala, oloni hano banapu ba kujela.
15 Oloni nga uje wa kujeneka kutaba alyangwila kuya,* co aye. Mu cifweci ndolome nambe ndokazi kakutiwile, Njambi namyana kwoloka.
16 Obe munakazi, kuma kuuzibuka ngwobe wasa kwobola munalume wobe ndi? Nambe yobe munalume, kuma kuuzibuka ngwobe wasa kwobola munakazi wobe ndi?
17 Ngwe omwo Yehova nana mutamba ku munu na munu, munu na munu ende kwesekesa nomwo mwanamusanena Njambi. Co eli likelyo lishiko linjili na kwana mu bikungulukilo byoshe.
18 Kuma kuli umo ibasanene te nai laja ku mukanda ndi? Akale ngoco bene. Kuma kuli umo ibasanene te kanda aye ku mukanda ndi? Akale ngoco bene.
19 Kuya ku mukanda kukwesi na seho na kujeneka kuya ku mukanda kukwesi na seho. Cuma ca seho cinapu kunyunga mashiko a Njambi.
20 Mu cifwa coshe-coshe canakele munu na munu mubamusanene, akale bene mu cifwoco.
21 Kuma mubakusanene te unapu laja ndungo ndi? Oco keti cikushotese mbunge embwe. Oloni nga wasa kupatuka, co linga ngoco bene.
22 Mwafwa woshe ibasanene muli Mwata oku napu ndungo, napu wa kupatuka kuli Mwata. Mu ngila imolika, woshe ibasanene oku keti ndungo, napu ndungo ya Kristu.
23 Bamilandele na ndando yakama, likeleni kupwa bindungo ba banu.
24 Bandolome, mu cifwa coshe-coshe canakele munu na munu mubamusanene, akale bene mu cifwoco ku mesho a Njambi.
25 Co kutalesa ku bazike,* kunjesi na lishiko lya kutunda kuli Mwata, oloni njimileka biyongola byange ha kupwa munu wa kulongwa uje ibanatetela kuli Mwata.
26 Ngeci, yange njimona ngwange kwakubwa manene munalume atumame ngacije bene mwafwa ya bukalu bwa matangwa ano.
27 Kuma unakutiwa kuli munakazi ndi? Keti utonde-tonde ngila ya kuzitukilamo kuli ikeye. Kuma unazituka kuli munakazi ndi? Keti utonde-tonde munakazi.
28 Oloni nambe nga ukobela mu bulo, kuulingi bubi. Co nga muzike akobela mu bulo, kalingi bubi. Nameme ngoco, baje bakobela mu bulo bakala na tuyando mu situ yabo. Oloni yange njishaka kumikwasa mangana keti muliwane notu tuyando.
29 Co lalo njendeka kuli yeni bandolome ngwange simbu inasalako inakeha. Kutunda hano, baje bali na banakazi balinge ngwe kubesi nabo,
30 baje bali na kulila balinge ngwe kubesi na kulila, baje bali na kubwahelela balinge ngwe baje kubesi na kubwahelela, baje bali na kulanda balinge ngwe baje kubesi na byuma,
31 baje bali na kupangesa kano kaye balinge ngwe kubesi na kukapangesa manene. Mwafwa byuma bili na kulingiwa muno mu kaye bili na kutenguluka.
32 Cili bene, kunjishaka ngwange mukale na bishoti. Muzike wa munalume nalishoshomwena byuma bya Mwata, mwazibisila Mwata kubwaha.
33 Oloni munalume uje nambata, nalishoshomwena ha byuma bya mu kaye, mwazibisila munakazi wendi kubwaha,
34 co nalyangununa. Co lalo munakazi uje kashombokele, na uje kanda alilaleho na munu, nalishoshomwena ha byuma bya Mwata, mwasa kupwisila mubila wendi na bisinganyeka* byendi bipwe bya kujela. Oloni munakazi wa kushomboka nalishoshomwena ha byuma bya kaye, mwasa kuzibisila munalume wendi kubwaha.
35 Njili na kwendeka ebi byuma mangana bimikwase, keti ngwe kumibingilikiya* embwe, oloni njishaka ngwange mulinge byabibwa bije bimikwasa mupangele Mwata simbu yoshe kwa kujeneka byuma bimitanganesa.
36 Oloni nga umo aliziba ngwendi kuli na kumukaluwila kutwalelelaho mu buzike, co lalo nga natubakana ha ntwitwi ya bukwenje, cuma canapande kulinga eci: Alinge cuma cashaka. Kalingi bubi embwe. Bakobele mu bulo.
37 Oloni nga mbunge ya munu inatulu bwino, co lalo kamono byuma byambatela, co lalo asa kunyunga mashungu endi, co lalo nalyangwila bene mu mbunge yendi ngwendi atwalelelaho kukala mu buzike, co alinga bwino.
38 Woshe akobela mu bulo alinga mwamubwa, oloni uje kakobela mu bulo alinga mwamubwa manene.
39 Munakazi wa kushomboka nakutiwa nga munalume wendi aciyoya, oloni nga munalume wendi natsi, co nazituka kushomboka kuli woshe-woshe yashaka, oloni kubanga muli Mwata lika.
40 Mu kumona kwangeni, apwa wa kubwahelela manene nga atwalelelaho kukala ngoco bene. Co cili bene njakulahela ngwange nange njili na sipilitu ya Njambi.
Majwi a kwinikila
^ Kulumbununa, kujeneka kulilala na.
^ Mu Cigriki por·nei′a. Taleni Majwi Abanalumbununa.
^ Nambe “kulitepa.”
^ Lijwi na lijwi “kuli baje kanda balilale laja na munu.”
^ Lijwi na lijwi “sipilitu.”
^ Lijwi na lijwi “kumikuta.”
