1 Korinte 9:1-27
9 Kuma kunjazitukile ndi? Kuma keti nji kapositolo ndi? Kuma kunjamwene Yesu Mwata wetu ndi? Kuma keti yeni cipangi cange muli Mwata ndi?
2 Nameme bamo banjimona ngwabo keti nji kapositolo, oloni kuli yeni nji kapositolo mwafwa yeni ciganto cije cimwesa ngwaco nji kapositolo ka Mwata.
3 Kuli baje bali na kunjilwisa, njilyamena ngwange:
4 Kuma kutwesi na lisesa* lya kulya na kunwa ndi?
5 Kuma kutwesi na lisesa lya kwambata banakazi ba kutaba na kuya na kwenda nabo mu mangenzi etu ngwe mubali na kulinga tupositolo boshe na bandolome ba Mwata, na Kefasi* ndi?
6 Kuma yange lika na Banabasi yetu tunapande kupanga mangana tuwane ha kuliyoyesela ndi?
7 Liswalale muka akapanga na kulifwetela byuma ikeye babenya? Iya akakunu lihya lya binyu oloni kali bushuka bwa bije binyu? Nambe iya akanyungu butanga bwa bimuna, oloni kanu mabele a baje bimuna?
8 Kuma njili na kwendeka ebi byuma mu kumona kwa bunu ndi? Kuma Lishiko nalyo kulyendekele hali ebi byuma ndi?
9 Mwafwa mu Lishiko lya Mosesa banasonekamo ngwabo: “Keti ukute ngombe ku kanwa nga ali na kujungula bimbuto.” Kuma Njambi wakele lika mbunge bingombe ndi?
10 Kuma mwendekele ngoco kalingilile yetu ndi? Cili bene yetu babasonekelele ebi byuma mwafwa uje akekela na uje ajungula balinga ngoco na lilabelelo lya kutambulako cimo.
11 Nga tunakunu byuma bya ku sipilitu mukati keni, kuma kunabihya nga tuteja bukwasi bwa ku mubila kuli yeni ndi?
12 Nga bakwetu bali na lisesa* lya kutonda obu bukwasi kuli yeni, kuma yetu kutwesi na lisesa lyakama lya kulinga ngoco ndi? Nameme ngoco, kutwapangesele eli lisesa, oloni tunakolesa mu byuma byoshe mangana keti twonowese banu mu ngila yoshe-yoshe kutambula muzimbu waubwa wa Kristu.
13 Kuma kumuzibuka ngweni baje bakapanga cipangi ca kujela bakali byuma bya ku tempele ndi? Co lalo kuma kumuzibuka ngweni baje bakapangela simbu yoshe ku mutula bakawanako bimo ku mutula ndi?
14 Mu ngila imolika, Mwata washikile ngwendi baje bambulula muzimbu waubwa bayoyele ha muzimbu waubwa.
15 Oloni ku byuma ebi nacimo cahi cinjinapangesa. Munjinasoneka ebi byuma keti ngwange munjilingilebyo embwe, mwafwa kwakubwa kutsa kutubakana—, kunjikatabesa munu anjinyeke cuma cinjilishashela!
16 Ngeci, nga njambulula muzimbu waubwa, nabimo binjilishashela bene byahi, mwafwa omu mukemwo bene munjinapande kulinga. Cili bene, lubinda lwange nga kunjambulula muzimbu waubwa!
17 Nga njilinga eci cipangi mu kushaka kwange, njili na cikandelela. Oloni nameme njilinga ca kulisindiya, anga njicili na cipangi ca bungamba cibananjana.
18 Co cikandelela cange cili oni? Cinapu kwambulula muzimbu waubwa mu kushaka kwange, co lalo kwa kujeneka kufwetesa, mangana keti njipangese mwamubi moko yange ha kupwa muka-kwambulula muzimbu waubwa.
19 Mwafwa nameme njinapatuka ku banu boshe, oloni njinalipwisa ndungo ku boshe mangana njase kuwana banu babangi.
20 Kuli Bajuda njapwile ngwe Kajuda mangana njase kuwana Bajuda. Kuli baje bali mwisi ya lishiko, njapwile ngwe uje ali mwisi ya lishiko nameme yange kunjesi mwisi ya lishiko, mangana njase kukwasa baje bali mwisi ya lishiko.
21 Kuli baje kubesi na lishiko, njapwile ngwe uje kesi na lishiko nameme njili na kukabangeya lishiko lya Njambi, co lalo njili mwisi ya lishiko lya Kristu, mangana njiwane baje kubesi mwisi ya lishiko.
22 Kuli bakuzeya, njapwile wa kuzeya mangana njiwane bakuzeya. Njapwile byuma byoshe ku banu ba miyati yoshe mangana njilinge mwoshe munjasela kwobolako bamo.
23 Oloni njili na kulinga byuma byoshe mwafwa ya muzimbu waubwa, mangana njiwambulule ku bakwetu.
24 Kuma kumuzibuka ngweni mu bweho bwa kushatuka boshe bakashatuka, oloni umolika akatambula cikandelela ndi? Shatukeni mu ngila ije imilingisa mukatambule cikandelela.
25 Woshe uje akashatuka mu bweho bwa kulihyana* akakwata mbunge mu byuma byoshe. Nameme ngoco, bakebo bakashatuka mangana bawane cilongo cije cinyonga, oloni yetu tukalingi ngoco mangana tuwane cilongo cije kucinyongo.
26 Ngeci, munjili na kushatukila keti kushatuka lika camushatukila embwe. Munjili na kwashela mafaindi ange keti ngwange njipupe mu lihunzi embwe.
27 Oloni njilintula* mubila wange na kuupwisa ngwe ndungo mangana munjimanesa kwambulwila bakwetu, yange keti banjibyane.
Majwi a kwinikila
^ Lijwi na lijwi “moko.”
^ Ibasana lalo ngwabo Pita.
^ Lijwi na lijwi “moko.”
^ Nambe “muka-kushatuka woshe.”
^ Nambe “njana kashitiko; njinangula manene.”
