1 Tesalonika 2:1-20
2 Bandolome, neni bene muzibuka mwamubwa ngweni kwija kwetu kuli yeni kukwaile mwangoco.
2 Nameme hakulibanga twayandele, co lalo batushawile mu Filipi ngwe mumuzibukila, oloni Njambi yetu watukwasele tusimpe mangana tumileke muzimbu waubwa wa Njambi nameme bakele na kutulwisa manene.*
3 Mwafwa kukanyamesa kwetu kukwemanene ha bisinganyeka bya kuhenga, nambe bya mazilo, nambe bya makuli.
4 Oloni ngecilika mwanatutabesa Njambi ngwendi batwane cipangi ca kwambulula muzimbu waubwa, mukemwo twendeka mu kuzibisa Njambi kubwaha uje akelula bimbunge byetu, keti mu kuzibisa banu kubwaha embwe.
5 Cili bene muzibuka ngweni kutwapangesele tumajwi twa kumikwata-kwata ha mesho nambe kulipwisa lika ngwe tu banu bababwa okuni tuli na biyongola bya nuna. Njambi napu mukaleho wetu!
6 Co lalo kutwatondele bumpau bwa kutunda ku banu, bupwe bwa kutunda kuli yeni nambe bwa kutunda ku banu beka, nameme twakele na lisesa lya kupwa citele ca kulema kuli yeni ha kupwa tupositolo ba Kristu.
7 Oloni twapwile bababotsi mutwakele neni, ngwe cisemi wa munakazi uje ali na kujamwesa mwakanyungila* bana bendi mu cizemo.
8 Ha kuwana ngwe twakele na cizemo cakama hali yeni, twashakele manene kumyana na myonyo yetu bene keti lika muzimbu waubwa wa Njambi, mwafwa twamizemene manene.
9 Cili bene bandolome mwanuka kufwitangana na kuundangana kwetu. Twapangele butsiki na mutanya mangana keti twane nambe umo weni citele ca kulema mutwamyambulwilile muzimbu waubwa wa Njambi.
10 Yeni mu bakaleho mwafwa muzibuka mutwamweselele kulongwa cije kucesi kutenguluka na kupwa ba kusungama, ba kujeneka cuma ca kutupayela mukati keni baka-kutaba, co na Njambi nendi mukaleho.
11 Muzibuka mwamubwa ngweni twatwaleleleleho kuminangula na kumizembeleka na kwana bukaleho kuli umo na umo weni ngwe mwakalingi cisemi wa munalume ku bana bendi,
12 mangana mutwaleleleho kwenda ngwe muje mwashaka Njambi, uje ali na kumisanena ku Bumwene bwendi na mu bumpau bwendi.
13 Mukemwo kutwesi na kulikela kukandelela kuli Njambi, mwafwa mumwatambwile lijwi lya Njambi lije limwazibile kuli yetu, kumwalitambwile ngwe lijwi lya kutunda ku banu embwe, oloni mwalitambwile ngwe muje bene mulinafu, ngwe lijwi lya Njambi lije lili na kupanga lalo muli yeni baka-kutaba.
14 Bandolome, yeni mwatembwininine bikungulukilo bya Njambi bije binalikwatasana na Kristu Yesu bije bili mu Judeya, mwafwa banu ba mu lifuti lyeni bamiyandesele ngwe bandolome ba mu Judeya mubali na kubayandesela kuli Bajuda,
15 baje batsiile Mwata Yesu, na tupolofweto, na kutuyandesa. Co lalo, kubesi na kuzibisa Njambi kubwaha, oloni bali na kulwisa byuma bije bikwasa banu
16 mubali na kutuzikila ngwabo keti twendeke ku baka-mafuti baje batushaka ngwetu boboke. Mubali na kulinga ngoco, bali na kubwezelela* ku bubi bwabo simbu yoshe. Oloni butenu bwa Njambi ololo bubatulila.
17 Oloni mubatwangunwine kuli yeni* bandolome, ha simbu yaindondo lika (ku mubila, keti mu bimbunge byetu), twalingile mwoshe mutwaselele mangana tumimone, mwafwa twashungwiiye manene kumimona mesho na mesho.*
18 Mukemwo twashakele kwija kuli yeni, yange bene Paulu njesekele kwija kuli yeni, keti lumolika, oloni lubali. Oloni Satana watushokelele ngila.
19 Co beya banapu lilabelelo lyetu, nambe kubwahelela kwetu, nambe cilongo cetu ca kulisamba naco ku mesho a Mwata wetu Yesu ha simbu ya kukalako kwendi? Kuma keti yeni ndi?
20 Yeni bene munapu bumpau bwetu na kubwahelela kwetu.
Majwi a kwinikila
^ Nambe hamo “nameme twakele mukati ka tuyando twatwingi.”
^ Nambe “mwakakela mbunge.”
^ Lijwi na lijwi “kushulisa.”
^ Nambe “mutwazibile busiwa bweni.”
^ Lijwi na lijwi “kumona bihanga byeni.”
