1 Tesalonika 3:1-13
3 Co mutwamwene ngwetu byakaluwa, twamwene ngwetu kwakubwa tucikaleko tahi likalyetu mu Atena.
2 Co twatumine Timothi ndolome yetu, muka-kupangela Njambi* mu muzimbu waubwa wa Kristu mangana akumikanyamese* na kumizembeleka mwafwa ya likulahelo lyeni,
3 mangana keti kukale umo alijujukila* mwafwa yotu tuyando. Mwafwa neni babenya muzibuka ngweni kutwasa kubanda tuyando twa cifweci.*
4 Mwafwa mutwakele neni, twakele na kumilekela cimweja ngwetu tuliwana na tuyando, co ebi bikebyo binalingiwa ngwe mumuzibukila.
5 Munjamwene ngwange byuma byakaluwa, njatumine Timothi mangana njizibuke bya kulongwa kweni, mwafwa njalishoshomwenene ngwange hamo Muka-kweseka namyeseka, co kufwitangana kwetu kunai mwangoco.
6 Oloni Timothi ololo nete kutundokwo kuli yeni, co natuleke muzimbu waubwa wa kulongwa kweni na cizemo ceni, ngwendi simbu yoshe muli na kutwalelelaho kutwanuka, co munashungwiya kutumona ngwe netu mutunashungwiya kumimona.
7 Bandolome, mukemwo tunawana kutuzembeleka mu bukalu* bwetu bwoshe na mu tuyando twetu twoshe mwafwa yeni na kulongwa kweni kumuli na kumwesa.
8 Mwafwa tukakala lalo na nzili* nga munemana mbe muli Mwata.
9 Twasa kumwesa bati kukandelela kwetu kuli Njambi hali yeni ha kubwahelela kwakama kutuli na kuziba ku mesho a Njambi mwafwa yeni?
10 Butsiki na mutanya tuli na kulambelela manene Njambi mangana twakumimone mesho na mesho* na kumyana byuma bimunajena mu likulahelo lyeni.
11 Ngeci tulomba Njambi yetu, Tate babenya na Mwata wetu Yesu ngwetu batushokolwele ngila ya kwija okwo kuli yeni.
12 Co lalo tulomba Mwata amikwase mubwezelele ku cizemo ceni, eyo, cizemo ceni came manene kuli umo na mukwabo na ku banu boshe ngwe mutuli na kulingila yetu kuli yeni,
13 mangana akanyamese bimbunge byeni na kumilingisa mujeneke cuma ca kumipayela na kupwa ba kujela ku mesho a Njambi yetu na Tate, ha simbu ya kukalako kwa Mwata wetu Yesu hamolika na bakujela boshe.
Majwi a kwinikila
^ Nambe hamo “muka-kupanga hamo na Njambi.”
^ Nambe “akumikolese.”
^ Lijwi na lijwi “ajenduka.”
^ Nambe “batwangwilile ebi byuma.”
^ Lijwi na lijwi “bujene.”
^ Lijwi na lijwi “tukayoyo.”
^ Lijwi na lijwi “twakumone bihanga byeni.”
