1 Tesalonika 5:1-28
5 Oloni kutalesa ku bisimbu na myaka, bandolome, kutwapandele kumisonekela.
2 Mwafwa neni babenya bene muzibuka bwino ngweni litangwa lya Yehova lija bene ngwe mwakezila mwizi butsiki.
3 Hoshe habendekela ngwabo, “Tuli mu kwoloka, kukwesi bushonde!” co kunyonga ca kukasumuna cija hali bakebo oho bene, ngwe mushongo wa kukita muukaija hali munakazi uje ali na cikute, co kubakasa kutewa.
4 Oloni yeni, bandolome, kumwesi mu lisusulungu mangana eli litangwa lyakumikasumune ngwe ceke ca litangwa mucikakasumwina bezi,
5 mwafwa mubaboshe mu bana ba ceke na bana ba mutanya. Yetu kutwakundamene ku butsiki nambe ku lisusulungu.
6 Ngeci, keti tulale ngwe mubanalingi banu boshe, oloni tutoneni na kusinganyeka mwamubwa.
7 Mwafwa baje bakalala, bakalala butsiki, co baje bakapende, bakapende butsiki.
8 Oloni yetu tunakundama ku mutanya, tusinganyekeni mwamubwa na kuzala cikinga-nulo ca likulahelo na cizemo na kuzala tepa ya cikubo ya lilabelelo lya kwoboka,
9 mwafwa Njambi katwangwile ngwendi tuliwane na butenu bwendi, oloni ngwendi twoboke, kwitila muli Mwata wetu Yesu Kristu.
10 Yesu watutsililile mangana nambe tutona nambe tunalala,* tuyoye hamolika nendi.
11 Ngeci, twaleleleniho kulishongangeya* umo na mukwabo na kulitunga umo na mukwabo ngwe muje bene mumuli na kulingila.
12 Co tumilomba bandolome, ngwetu musingimike baje bali na kupanga na nzili mukati keni na kumitwamenena muli Mwata na kuminangula.
13 Basingimikeni manene mu cizemo mwafwa ya cipangi cabo. Yoyeni mu kwoloka na bakweni.
14 Kutundaho lalo, tumishongangeya bandolome, ngwetu nanguleni banu ba liwayanga, zembelekeni baje banombwa, kwaseni baje banazeye, co kaleni na mbunge ya kubandamena ku banu boshe.
15 Munapande kumona ngweni naumo wahi elwisila mukwabo bubi, oloni simbu yoshe lifwiteni kulinga byuma byabibwa kuli umo na mukwabo na ku banu boshe.
16 Bwaheleleni simbu yoshe.
17 Lombeleni simbu yoshe.
18 Kandeleleni ku byuma byoshe. Eci cikeco cizango ca Njambi kuli yeni muli Kristu Yesu.
19 Keti muzime tuhya twa sipilitu.
20 Keti mushaule bupolofweto.
21 Iluleni byuma byoshe, kakateyeni ku byuma byabibwa.
22 Jenjukeni ku bubi bwoshe.
23 Tulomba ngwetu Njambi wa kwoloka amijelese mu byuma byoshe. Co sipilitu yeni na myonyo yeni na mibila yeni, bandolome, bipwe byabibwa mu bingila byoshe, babinyungilile kwa kujeneka cuma ca kumipayela ha simbu ya kukalako kwa Mwata wetu Yesu Kristu.
24 Uje ali na kumisana wapwa wa kulongwa, co cili bene akalingamo.
25 Bandolome, twaleleleniho kutulombelela.
26 Menekeni bandolome boshe na kulitsemba ca kujela.
27 Njimilomba manene mu lizina lya Mwata ngwange mutandele bandolome boshe ou mukanda.
28 Ngozi yakama ya Mwata wetu Yesu Kristu ikale neni.
