2 Iwano 1:1-13
1 Yange munalume wa kukola.* Njili na kusonekela munakazi ibanangula, na bana bendi, uje injazema manene. Keti yange lika njabazema, oloni na baje boshe banazibuka busunga babazema
2 mwafwa ya busunga buje buli mu bimbunge byetu buje bukalamo myaka yoshe.
3 Co tukala na ngozi yakama na kutetela na kwoloka hamolika na busunga na cizemo bya kutunda kuli Njambi Tate na Yesu Kristu Muna Tate.
4 Njinabwahelela manene mwafwa njinawana bana bobe bamo bali na kwenda mu busunga ngwe muje mwatushikile Tate.
5 Ngeci njikulomba obe munakazi ngwange tulizeme umo na mukwabo. (Kunjesi na kukusonekela lishiko lyaliha, oloni lije bene litwakele nalyo kushwa ku mashangumukilo.)
6 Co cizemo cilumbununa kutwalelelaho kwenda mu kulitombola na mashiko endi ngwe mumwazibile kushwa ku mashangumukilo. Eli likelyo lishiko lyashikile ngwendi mutwaleleleho kwenda mu cizemo.
7 Baka-kukwisa babangi banaija mu kaye baje kubesi na kutaba ngwabo Yesu Kristu wezile mu situ. Munu ali na kulinga ebi byuma napu muka-kukwisa na muka-kulwisa kristu.
8 Linyungeni yeni babenya mangana keti muzimbalese byuma bimunalifwiti kupangela, oloni mwase kukatambula cikandelela coshe.
9 Woshe natanguka, co lalo kesi na kutwalelelaho kukala mu bilongesa bya Kristu, kesi na Njambi. Uje atwalelelaho kukala omu mu bilongesa ikeye ali na Tate na Mwana.
10 Nga munu aija kuli yeni, oloni kaija nebi bilongesa keti mumutambule mu binjibo byeni nambe kumumeneka.
11 Mwafwa uje amumeneka nalikwatasana nendi mu bipangi byendi byabibi.
12 Nameme njili na byabingi bya kumisonekela, kunjishaka kubisoneka ha lipapelo na inki, oloni njakulahela ngwange njija kuli yeni mangana njakwendeke neni mesho na mesho mangana mubwahelele manene.
13 Bana ba ndokazi yobe uje ibanangula banakumenekako.
Majwi a kwinikila
^ Nambe “mukulunu.”
