Bilinga 10:1-48
10 Mu Sezaliya mwakele munalume wa lizina lya Koneliasi uje wapwile kapitau ka maswalale* ba mu cibunga cibasanene ngwabo cibunga ca baka-Itali.*
2 Wapwile munu uje wakolesele mu bulombelo, co lalo ikeye na bakunjibo yendi yoshe bazibilile Njambi lyoba. Co wakele na kwana banu bwana bwa kutetela bwabwingi na kulambelela Njambi simbu yoshe.
3 Litangwa limo, kuma 15:00,* wamwene kangelo ka Njambi mu cimona aija kuli ikeye na kwendeka ngwendi: “Koneliasi!”
4 Koneliasi watalele uje kangelo shwii na lyoba, co wamwihwile ngwendi: “Mwata, bika?” Uje kangelo wamulekele ngwendi: “Malombelo obe na bwana bwobe bwa kutetela binete mwilu kuli Njambi kupwa byuma bya kukwanukilaho.
5 Ngeci, tuma banu ku Jopa bakasane munu wa lizina lya Simoni, ibasana ngwabo Pita.
6 Ou munu natulila kuli* Simoni muka-kufutungula bilambu uje ali na njibo ku kalunga-ndonga.”
7 Mwaile lika uje kangelo wakele na kwendeka nendi, Koneliasi wasanene bangamba bendi babali na liswalale umo uje wakolesele mu bulombelo hakati ka baje bakele na kumupangela.
8 Wabalumbunwinine byuma byoshe, co wabatumine ku Jopa.
9 Lyamukwabo, mubakele na kuya bungenzi bwabo, co betele kuyehi na nganda. Pita waile ha ciluli ca njibo kuma 12:00* na kulombela.
10 Oloni watsile manene njala, co washakele kulya. Simbu bacikele na kubwahesa byakulya, walezukilile mu tulo.
11 Co wamwene lilu linashokoloka, na cuma cimo* ca kufwa ngwe nanga yakama ya lineni cili na kwija hasi, banacikwatela ku bishongo byaco biwana, co bali na kucisosela hasi.
12 Mukati kaco mwakele miyati yoshe ya tusitu ba mendi awana na byuma bya kukalaba bya hasi na tuzila.
13 Co lijwi lyendekele kuli ikeye ngwalyo: “Pita, katuka, tsiya ulye!”
14 Oloni Pita wendekele ngwendi: “Embwe Mwata, mwafwa kanda njilyeho cuma ca mazilo nambe ca kujwala.”
15 Co lije lijwi lyendekele kuli ikeye lwamucibali ngwalyo: “Keti usane byuma byanajelesa Njambi ngwobe bya kujwala.”
16 Eci calingiwile lwamucitatu, co haje bene cije cuma bacitwalele mwilu.
17 Pita mwacikele mu citanga ca kuzibuka bicilumbununa cimona camwene, haje bene banalume batumine Koneliasi behwile kuyakele njibo ya Simoni, co bakwimanene ha cikolo.
18 Batambekele na kwihula indi Simoni uje ibasanene ngwabo Pita watulilile kuje.
19 Pita mwacikele na kusinganyekesesa ha cimona camwene, sipilitu yendekele ngwayo: “Tala! Kuli banalume batatu bali na kukutonda.
20 Ngeci katuka, sikumuka hasi uye nabo. Keti uuwasane nambe kamandondo, mwafwa yange njinabatumu.”
21 Co Pita wasikumukile hasi kuli baje banalume, wendekele ngwendi: “Yange bene imuli na kutonda. Bika munezila kuno?”
22 Bamukumbulwile ngwabo: “Koneliasi, kapitau ka maswalale, munalume wa kusungama, muka-kuzibila Njambi lyoba, uje ibazibuka Bajuda boshe ngwabo wapwa munu wamubwa. Banamwanene mashiko a Njambi kuli kangelo wa kujela ngwendi akutumine banu bakukusane mangana uye ku njibo yendi akazibe biwendeka.”
23 Ngeci wabakobelesele mu njibo, co bapwile bangenzi bendi.
Lyamukwabo, wakatukile na kuya nabo. Co na bandolome bamo ba ku Jopa baile hamo nendi.
24 Litangwa lyateleko, wetele mu Sezaliya. Koneliasi wakele na kubabandamena, oku nakungulula hamo babushoko bwendi na babusamba bendi ba ha mbunge.
25 Pita mwakobelele, Koneliasi wamusheshele, co wawililile ku mendi endi na kumutsikamena.
26 Oloni Pita wamukatwile na kumuleka ngwendi: “Imana, nange nji munu lika.”
27 Pita mwakele na kwendeka na Koneliasi, wakobelele mukati, co wawanene banu babangi banakunguluka.
28 Wabalekele ngwendi: “Muzibuka mwamubwa ngweni kubatabesa Kajuda kulikwatasana na munu wa muyati weka nambe kumushwena, oloni Njambi nanjimwesa ngwendi kunjapandele kusana munu nambe umo ngwange wa mazilo nambe wa kujwala.
29 Mukemwo kunjabyanene mumunanjisana, oloni njinaija. Co njilekeni bimunanjisanena.”
30 Koneliasi wendekele ngwendi: “Matangwa awana kunima kutunda ha simbu ino, njinakala na kulombela mu njibo yange kuma 15:00.* Co haje bene njinamwene munalume nazala bizalo bya kubyakuma nemana halutwe lwange.
31 Co wanjileka ngwendi: ‘Koneliasi, lilombelo lyobe banalizibi, co bwana bwobe bwa kutetela banabwanuka kuli Njambi.
32 Ngeci, tuma banu ku Jopa bakasane Simoni uje ibasana ngwabo Pita. Ou munalume natulila ku njibo ya Simoni, muka-kufutungula bilambu ku kalunga-ndonga.’
33 Co haje bene njinatumine banu kuli yobe bakakusane, co unalingi mwamubwa kwija. Mukemwo tubaboshe tunaija ku mesho a Njambi mangana tuzibe byuma byoshe byanakushiki Yehova ngwendi wendeke.”
34 Pita mwazibile ngoco, washangumukile kwendeka ngwendi: “Njinazibisisoni mwamubwa ngwange Njambi kesi na kangu,
35 oloni mu miyati yoshe, woshe amuzibila lyoba na kulinga byabibwa, amutambula.
36 Njambi watumine lijwi ku bana ba Isalele lya kubambulwila muzimbu waubwa wa kwoloka kwitila muli Yesu Kristu. Co ou Yesu ikeye Mwata wa banu boshe.
37 Muzibuka ije ñanda ibendekele banu mu Judeya mwoshe kushangumukila ku Galileya, munima ya cimbwitiko cambulwile Iwano:
38 ije ñanda yendekele bya Yesu uje watundile ku Nazaleta, nomwo Njambi wamubwabeselelemo na sipilitu ya kujela na kumwana nzili. Co waile mu lifuti lyoshe oku alinga byuma byabibwa na kukangwisa boshe baje babasininikile kuli Liyabolo, mwafwa Njambi wakele nendi.
39 Co yetu tunapu tu bakaleho ba byuma byoshe byalingile mu lifuti lya Bajuda na mu Jelusalema, oloni bamutsiile ha kumushukika ha citi.
40 Njambi wamusangwile ha litangwa lyamucitatu, co wamutabesele asholoke,*
41 keti ku banu boshe, oloni ku bakaleho baje bangwilile cimweja Njambi, kuli yetu bene, yetu twalile nendi na kunwa nendi mwasangukile ku batsi.
42 Co lalo watushikile ngwendi twambulwile banu na kwana bukaleho bwa kushula ngwetu ou ikeye yanashiki Njambi ngwendi apwe lyako wa baje bali na kuyoya, na batsi.
43 Tupolofweto boshe banana bukaleho hali ikeye ngwabo woshe amukulahela, bamukonekela bubi bwendi kwitila mu lizina lyendi.”
44 Pita mwacikele na kwendeka ebi byuma, sipilitu ya kujela yezile hali boshe baje bakele na kutolilila lijwi.
45 Co baka-kutaba* baje baile ku mukanda, baje bezile na Pita balikomokelele manene, mwafwa bwana bwa sipilitu ya kujela bakele na kubwitila na hali banu ba ku mafuti.
46 Mwafwa babazibile bali na kwendeka bindaka byeka na kushangazala Njambi. Co Pita wendekele ngwendi:
47 “Kuma aba banatambula sipilitu ya kujela ngwe mutunaitambwila yetu, kuli umo asa kubabindika kubambwitika na mema ndi?”
48 Ngeci, washikile ngwendi babambwitike mu lizina lya Yesu Kristu. Co bamulombele ngwabo akale nabo matangwa amo.
Majwi a kwinikila
^ Nambe “uje watwamenenene maswalale 100.”
^ Nambe “cibunga ca maswalale ba Baloma 600.”
^ Lijwi na lijwi “ha ola ya bu 9.”
^ Nambe “napu mungenzi wa.”
^ Lijwi na lijwi “ha ola ya bu 6.”
^ Lijwi na lijwi “muyati umo wa citenga.”
^ Lijwi na lijwi “ha ola ya bu 9.”
^ Nambe “amoneke.”
^ Nambe “bakulongwa.”
