Bilinga 11:1-30
11 Co tupositolo na bandolome baje bakele mu Judeya, bazibile ngwabo banu ba ku mafuti nabo banatambula lijwi lya Njambi.
2 Ngeci, Pita mwezile ku Jelusalema, baje bakele na kukundwiya ñanda ya kuya ku mukanda bashangumukile kumupaya*
3 ngwabo: “Unakakobelele mu njibo ya banu ba kujeneka kuya ku mukanda na kulya nabo.”
4 Ngeci, Pita washangumukile kubalumbunwina ei ñanda mu kushula ngwendi:
5 “Njinakele na kulombela mu nganda ya Jopa, co munjinalezukilile mu tulo, njinamwene cimona. Njinamwene cuma cimo* ca kufwa ngwe nanga yakama ya lineni banacikwatela ku bishongo byaco biwana bali na kucisosela hasi kutunda mwilu, co cinezile kuli yange.
6 Munjinataleseselemo, njinamwene tusitu ba mendi awana ba hasi, bikashama ba mu shwata, byuma bya kukalaba na tuzila.
7 Njinazibile lalo lijwi lyendeka kuli yange ngwalyo: ‘Pita, katuka, tsiya ulye!’
8 Oloni njinendekele ngwange: ‘Embwe Mwata, mwafwa cuma ca mazilo nambe ca kujwala kanda cikobeleho mu kanwa kange.’
9 Co lijwi lya kutunda mwilu linanjikumbulwile lwamucibali ngwalyo: ‘Keti usane byuma byanajelesa Njambi ngwobe bya mazilo.’
10 Eci cinalingiwile lwamucitatu, co cije cuma ca kufwa ngwe nanga banacitwalele lalo mwilu.
11 Co ha simbu ije bene, banalume batatu babanatumine kuli yange kutunda ku Sezaliya banakwimanene ku njibo kutunakele.
12 Co sipilitu inanjilekele ngwayo njiye nabo, co keti njiuwasane nambe kamandondo. Co lalo aba bandolome 6 nabo banaile nange, co tunakakobelele mu njibo ya Koneliasi.
13 “Ngeci, natulekele mwanamwenenene kangelo uje nemanene mu njibo yendi na kumuleka ngwendi: ‘Tuma banu ku Jopa bakasane Simoni uje ibasana ngwabo Pita,
14 co akukuleka byuma biunapande kulinga yobe na bakunjibo yobe boshe mangana mwoboke.’
15 Oloni munjinashangumukile kwendeka, sipilitu ya kujela inezile hali bakebo ngwe muyezilile hali yetu ku mashangumukilo.
16 Munjinamwene ngoco, njinanukile majwi akele na kwendeka Mwata, ngwendi: ‘Iwano wambwitikile na mema, oloni yeni bakamimbwitika na sipilitu ya kujela.’
17 Ngeci, nga Njambi nabanene bwana bwa kulifwa na buje bwananene yetu twataba muli Mwata Yesu Kristu, co yange iyajo ngeci njibindike Njambi?”*
18 Mubazibile ebi byuma balikelele kumulwisa,* co bashangazalele Njambi ngwabo: “Njambi natabesa na banu ba ku mafuti batenguluke mangana bayoye.”
19 Co baje balishandokele mwafwa ya kayando kezile munima ya kutsa kwa Setefano baketele na ku Fonisha na ku Saiprasi na ku Antioke, oloni bendekele lijwi ku Bajuda lika.
20 Oloni banalume bamo mukati kabo baje batundile ku Saiprasi na ku Sailini bezile ku Antioke, co bashangumukile kwendeka na banu baje bakele na kwendeka Cigriki na kubambulwila muzimbu waubwa wa Mwata Yesu.
21 Co lalo liboko lya Yehova lyakele nabo, ngeci banu babangi bapwile oni baka-kutaba, co batengulukilile kuli Mwata.
22 Muzimbu wabo wetele ku cikungulukilo ca mu Jelusalema, co batumine Banabasi ku Antioke.
23 Mwetele kuje, wamwene ngozi yakama ya Njambi, co wabwahelelele na kushangumuka kushongangeya boshe bakakateye kuli Mwata na bimbunge byabo byoshe.
24 Banabasi wapwile munu wamubwa uje washulile na sipilitu ya kujela, co lalo wakele na likulahelo lya kukanyama. Co mbunga yakama ya banu baibwezelelele kuli Mwata.
25 Ngeci Banabasi waile ku Tasasi na kukatonda-tonda Saulu.
26 Mwamuwanene, wamunenele ku Antioke. Co ha mwaka wa mutunu bakungulukile hamo nabo mu cikungulukilo na kulongesa mbunga ya banu. Ku Antioke kukekwo kubashangumukile kusana bandongesi ngwabo baka-Kristu, kwesekesa nomwo mwatwamenenene Njambi.
27 Mu matangwa aje, tupolofweto batundile ku Jelusalema bezile ku Antioke.
28 Umo wabo wa lizina lya Agabasi wemanene, co wapolofwetele kwitila mu sipilitu ngwendi hano hasi hoshe hakakala njala yakama manene. Ei njala yakeleko mu matangwa a Kulodiasi.
29 Ngeci, bandongesi bayongwele kutuma bukwasi ku bandolome ba ku Judeya kwesekesa nomwo mwaselele munu na munu.
30 Co balingile bene ngoco, babutumine ku bakulunu kwitila muli Banabasi na Saulu.
Majwi a kwinikila
^ Nambe “kumulwisa.”
^ Lijwi na lijwi “muyati umo wa citenga.”
^ Nambe “njimane mu ngila ya Njambi.”
^ Lijwi na lijwi, “bolokele kulu.”
