Bilinga 16:1-40
16 Ngeci, Paulu waketele ku Debe na ku Listra. Co kuje, kwakele ndongesi umo wa lizina lya Timothi. Ina wapwile Kajuda muka-kutaba, oloni ishe wapwile Kagriki.
2 Bandolome ba mu Listra na Ikoniamu bazibukile ngwabo Timothi wapwile munu wamubwa.
3 Paulu washungwiiye kuya na Timothi, co wamwambatele na kumutwala ku mukanda, mwafwa ya Bajuda baje bakele muje mu mitambela, mwafwa boshe bazibukile ngwabo ishe wapwile Kagriki.
4 Mubakele na kwita mu binganda, bakele na kwana bandolome mashiko abashikile tupositolo na bakulunu baje bakele mu Jelusalema na kubaleka ngwabo bawanyunge.
5 Co bikungulukilo byatwaleleleleho kukanyama mu likulahelo na kulibwezelela ha litangwa na litangwa.
6 Co lalo betile mu Filigiya na mu Galatiya, mwafwa sipilitu ya kujela yababindikile kwendeka lijwi mu provinsi ya Asia.
7 Co mubezile mu Misiya, besekele mwoshe mubaselele kukobela mu Bithinia, oloni sipilitu ya Yesu kuyabatabesele.
8 Ngeci batubakanene* Misiya, co bezile mu Troasi.
9 Co ku butsiki, Paulu wamwene cimona. Wamwene munalume wa ku Masedonia nemana kuje, ali na kumulambelela ngwendi: “Ija kuno ku Masedonia wakutukwase.”
10 Mwamwene lika cije cimona, twaile ku Masedonia, mwafwa twamwene ngwetu Njambi natusana mangana tukambulule muzimbu waubwa kuli bakebo.
11 Ngeci, twasunukile na bwato kutunda mu Troasi, twaile bene ye na ku Samotrasi, oloni lyamukwabo twaile ku Neapoli.
12 Mutwatundile kuje, twaile ku Filipi, nganda ije yakele mwisi ya ciyulo ca Baloma, nganda ya kutsimana ya mu mutambela wa Masedonia. Twakele muje mu nganda ha matangwa akupwamo.
13 Ha litangwa lya Sabata, twaile hanja ya nganda ku ngenge ya ndonga, kuje kutwamwene ngwetu kwakele mwela wa kulombelela. Co twakatumamene na kushangumuka kwambulwila banakazi baje balikungulwilile kuje.
14 Co munakazi wa lizina lya Lidia, muka-kulandesa binanga na bizalo bya mubala wa pepo, wa ku nganda ya Tiatila, muka-kulemesa Njambi, wakele na kutolilila. Co Yehova washokolwele mbunge yendi mangana atolilile mwamubwa byuma byakele na kwendeka Paulu.
15 Co ikeye na bakunjibo yendi mubabambwitikile, watulambelelele ngwendi: “Nga munanjimono ngweni nji wa kulongwa kuli Yehova, ijeni mwakukale ku njibo yange.” Co watusindiiye kubanga bene mutwaile ku njibo yendi.
16 Mutwakele na kuya ku mwela wa kulombelela, twaliwanene na ngamba umo wa mumbanda uje wakele na sipilitu, kulumbununa dimona wa kumikiya* byuma bya kulutwe. Ou mumbanda wakele na kufukisa manene bashukulu bendi ha kumikiya* byuma bya kulutwe.
17 Ou mumbanda watwaleleleleho kukabangeya Paulu, hamolika netu, co wakele na kutambeka ngwendi: “Aba banalume banapu bindungo ba Njambi Wahakamwa Manene, co bali na kumyambulwila ngila ya kwoboka.”
18 Ou mumbanda walingile ngoco ha matangwa amangi. Kukapwa muje, Paulu wazibile cifwayoyo, co watengulukile na kuleka uje sipilitu ngwendi: “Njikushika mu lizina lya Yesu Kristu ngwange mutunde.” Co ha simbu ije bene wamutundile.
19 Bashukulu yendi mubamwene ngwabo ngila ibakele na kuwanena bimbongo inahu, bakwatele Paulu na Silasi na kubakokela ku maliketi kuli baka-kuyula.
20 Mubabanenele ku bimyata, bendekele ngwabo: “Aba banalume bali na kunena manene mpindangano mu nganda yetu. Bapwa Bajuda,
21 co bali na kulongesa futisi ije kutwapandele kukala nayo, nambe kukabangeya, mwafwa yetu tu Baloma.”
22 Co mbunga yoshe na bimyata balwisile Paulu na Silasi. Mubamanesele kubatabozwela bizalo byabo, bashikile ngwabo babapupange na bimbweti.
23 Munima ya kubapupa manene, babakele mu kamenga, co bashikile muka-kunyunga kamenga ngwabo abanyungilile manene.
24 Ha kuwana ngwe bamwanene eli lishiko, wabakele mu mulili wa mukati ka kamenga, co wakele mendi abo mu tukunju.
25 Oloni mukati ka butsiki, Paulu na Silasi bakele na kulombela na kushangazala Njambi na myaso, co mapanditi bakele na kubatolilila.
26 Haje bene kwezile lindunduma lyakama, ngeci lubula lwa kamenga lwajajele. Co haje bene na bikolo byoshe byashokolokele, co malyenge na tukunju bibakutile munu na munu byazitukile.
27 Muka-kunyunga kamenga mwanyangumukile mu tulo na kumona bikolo bya kamenga binashokoloka, washomwene moko yendi ya mukwale ngwendi alitsiye, mwafwa wasinganyekele ngwendi mapanditi banatewe.
28 Oloni Paulu watambekele ngwendi: “Keti ulibulumune, tubaboshe mutuli muno!”
29 Ngeci uje muka-kunyunga kamenga walombele bindeya na kushatukila mukati. Co mwafwa ya kuziba manene lyoba, wawililile ku mendi a Paulu na Silasi.
30 Wabatuhwile hanja na kubehula ngwendi: “Bakulunu, bika binjinapande kulinga mananga njoboke?”
31 Bamukumbulwile ngwabo: “Taba muli Mwata Yesu, co woboka, yobe na bakunjibo yobe.”
32 Co bendekele lijwi lya Yehova kuli ikeye na kuli bakunjibo yendi boshe.
33 Co ha simbu ije bene ya butsiki, wabambatele na kukabakusha ha bimbandu byabo. Co haje bene, ikeye na bakunjibo yendi boshe babambwitikile.
34 Wabanenele mu njibo yendi na kubabwahesela byakulya ku mesa, co wabwahelelele manene na bakunjibo yendi boshe, mwafwa watabele oni muli Njambi.
35 Mulyakile, bimyata batumine tupasu bakendeke ngwabo: “Patuleni obo banalume.”
36 Muka-kunyunga kamenga walekele Paulu majwi abo ngwendi: “Bimyata banatumu banu ngwabo yeni mu babali mutuhuke. Ngeci, hano bene tuhukeni muliile mu kwoloka.”
37 Oloni Paulu wabalekele ngwendi: “Banatupupilile ha mbunga simbu kanda batuwane na mulonga,* na kutwaka mu kamenga, okuni tu Baloma. Kuma hano bashakoni batupatule mu kushwekesa? Embwe ku citaba! Baije bene bakebo bakutupatule na kutusindikiya.”
38 Baje tupasu bakalekele bimyata awa majwi. Co baje bimyata bazibile manene lyoba mubazibile ngwabo baje banalume bapwile Baloma.
39 Ngeci, bezile na kubalambelela, co mubabatuhwile na kubasindikiya, babalombele ngwabo batunde muje mu nganda.
40 Oloni mubatundile mu kamenga, baile ku njibo ya Lidia. Co mubamwene bandolome babashongangeyeye, co baile.
Majwi a kwinikila
^ Nambe “betile mu.”
^ Nambe “kwendeka.”
^ Nambe “kwendeka.”
^ Nambe “simbu kanda batusompese.”
