Bilinga 17:1-34
17 Betile mu Amfipoli na mu Apolonia, co bezile mu Tesalonika muje mwakele sinagogi ya Bajuda.
2 Co ngwe mwakele na kulingila simbu yoshe, Paulu wakobelele mukati muje mubakele, co ha bisabata bitatu wasimutwiiye nabo ha Bisoneka,
3 oku alumbununa na kubamwesa bukaleho bwa mu Bisoneka ngwendi kwapandelemo Kristu ayande na kusanguka ku batsi. Wabalekele ngwendi: “Yesu injili na kumyambulwila byendi, ikeye Kristu.”
4 Ngeci, bamo babo batengulukile na kupwa baka-kutaba, co balikwatasanene na Paulu na Silasi. Co lalo mbunga yakama ya Bagriki baje balemesele Njambi nabo balikwatasanene nabo, hamolika na banakazi ba bulemu babangi.
5 Oloni Bajuda bazibile cipululu, ngeci bakungulwile banu bababi baje bakele na kwendangana ngoco ha maliketi, co bamungile cibunga ca lwozi na kunena mpindangano mu nganda. Batubile njibo ya Jasoni, co batondele Paulu na Silasi ngwabo babanene kuje ku cibunga ca lwozi.
6 Mubonowele kubawana, bakokangeyeye Jasoni na bandolome bamo na kubatwala kuli baka-kuyula nganda oku batambeka ngwabo: “Aba banu bananene mpindangano* hano hasi, banete na kuno lalo,
7 co Jasoni nabatambula kupwa bangenzi bendi. Aba banalume boshe bali na kulwisa mashiko a Sezale, co bali na kwendeka ngwabo kuli mwene weka wa lizina lya Yesu.”
8 Co mbunga ya banu na baka-kuyula nganda mubazibile ebi byuma, balishoshomwenene.
9 Baka-kuyula nganda mubamanesele kwambata kapopo kuli Jasoni na bakwabo, babecelele baye.
10 Ku butsiki, bandolome batumine Paulu na Silasi bwasi-bwasi ku Beleya. Co mubetele kuje, bakobelele mu sinagogi ya Bajuda.
11 Bajuda ba mu Beleya bakele na bimbunge byabibwa kutubakana ba mu Tesalonika, mwafwa batambwile lijwi lya Njambi na ntwima. Bakele na kwilula mwamubwa Bisoneka ha litangwa na litangwa mangana bamone indi ebi byuma byafwile bene ngoco.
12 Ngeci, bwingi bwabo batengulukile na kupwa baka-kutaba. Co lalo na Bagriki ba banakazi babangi ba bulemu, na banalume bamo batengulukile na kupwa baka-kutaba.
13 Oloni Bajuda ba ku Tesalonika mubazibile ngwabo Paulu ali na kwambulula lijwi lya Njambi na mu Beleya, baile kuje na kushangumuna mbunga ya banu na kubalubalesa.
14 Co bwasi-bwasi bandolome batumine Paulu ku kalunga-ndonga, oloni Silasi na Timothi basalele kuje.
15 Baje basindikiiye Paulu bakamwetesele na ku Atena, co belukile mwamanesele kubashika ngwendi Silasi na Timothi baije kuli ikeye bwasi-bwasi.
16 Paulu mwakele na kubabandamena mu Atena, wazibile cifwayoyo mwamwene nganda inashulu na tumponya.
17 Ngeci, washangumukile kusimutwiya na Bajuda mu sinagogi na banu beka baje balemesele Njambi. Co ha litangwa na litangwa, wakele na kusimutwiya na baje bakele na kuwana ha maliketi.
18 Oloni baka-Epikuli bamo na baka-Stoiki baje balilongesele mana a bunu bashangumukile kulinga nendi bimata. Bamo bakele na kwendeka ngwabo: “Bika byashaka kwendeka ou muka-kukabangela?” Bakwabo ngwabo: “Asholoka ngwe wapwa muka-kwambulula bya binjambi beka.” Bendekele ngoco mwafwa wakele na kwambulula muzimbu waubwa wa Yesu, nou wa kusanguka.
19 Ngeci bamukwatele na kumutwala ku Aliopagasi, bendekele ngwabo: “Ebi bilongesa byabiha biuli na kulongesa bilumbununa bika?
20 Mwafwa byuma bimo biuli na kwendeka binapu byacingenzi ku matwi etu, co tushaka kuzibuka bibilumbununa ebi byuma.”
21 Mwafwa baka-Atena boshe na baka-kwija baje bakele na kukala* kuje, kubakele na kulinga byuma byeka ha simbu yabo ya kuhwima kubanga kwendeka byuma byabiha nambe kutolilila byuma byabiha.
22 Co Paulu wemanene mukati ka Aliopagasi na kwendeka ngwendi:
“Eni banu ba mu Atena, njinamono ngwange mu byuma byoshe mwazibila manene lyoba binjambi* kutubakana bakweni boshe.
23 Cakumwenako, munjinakala na kwita mu nganda yeni na kutalesesa byuma bimuli na kulemesa, njinawana na mutula ubanasoneka ngwabo ‘Kuli Njambi Uje Kutuzibuka.’ Ngeci bene, ou Njambi kumuzibuka imuli na kulemesa, ikeye bene injili na kumyambulwila.
24 Njambi uje watangele kaye na byoshe byakalamo, ha kupwa ikeye Mwata wa lilu na hasi, kesi kukala mu bitempele bya kutunga na maboko a banu.
25 Co lalo kubesi kumupangela na maboko a banu, ngwe ngwabo kuli cimo canajena, mwafwa ikeye akana banu boshe kuyoya na kuhwima na byuma byoshe.
26 Ikeye watangele miyati yoshe ya banu kutunda ku munu umolika ngwendi bakale hano hasi hoshe. Co wakeleko bisimbu byanangula na binginga bya myela ibakala banu,
27 mangana batonde Njambi, nga bamupuputiya, co cili bene bamuwana, mwafwa kesi kulako na umo na umo wetu.
28 Co mwafwa ya ikeye, tuli na kuyoya, tuli na kwenda, co kutuli, ngwe mubanendeka baka-kusoneka beni bamo ngwabo, ‘Mwafwa netu tu bana bendi.’
29 “Ngeci, ha kupwa tu bana ba Njambi, kutwapandele kusinganyeka ngwetu Njambi wafwa ngwe goldi, nambe siuva, nambe limanya, ngwe cuma ca kumunga kwesekesa na butongwe na butumbe bwa banu.
30 Cili bene, Njambi naliula bisimbu bibakele banu kunzimba, oloni hano ali na kwambulwila banu boshe ku mitambela yoshe ngwendi batenguluke.
31 Mwafwa naka litangwa lyanayongola kukasompa banu ba hano hasi hoshe mu kusungama kwitila muli munu yanangula, co nana bukaleho ku banu boshe ha kumusangula ku batsi.”
32 Mubazibile bya kusanguka kwa batsi, bamo bashangumukile kumushendumuna, bakwabo bendekele ngwabo: “Twakukutolilila lalo ha ñanda ei.”
33 Ngeci Paulu wabasezele,
34 oloni banalume bamo balikwatasanene nendi, co batengulukile na kupwa baka-kutaba. Hakati kabo hakele Dionisi, uje wapwile lyako mu nkuta ya Aliopagasi, na munakazi wa lizina lya Damalisi, na bakwabo beka.
Majwi a kwinikila
^ Nambe “bananene bukalu.”
^ Nambe “kwendela.”
^ Nambe “mwazema manene bulombelo.”
