Bilinga 2:1-47
2 Ha litangwa lya Cilika ca Pentekosti, boshe bakele hamo mu mwela umolika.
2 Co haje bene mwilu mwatundile miyoyo ya kufwa ngwe lihunzi lije lihuwa na nzili yakama, co yazibikile manene muje mu njibo mwoshe mubakele.
3 Bamwene byuma bya kufwa ngwe bindaka bya milangi ya tuhya, co byalyangunwine na kutula hali umo na umo wabo.
4 Co boshe bashulile na sipilitu ya kujela, co bashangumukile kwendeka mu bindaka bya kuliseza-seza kwesekesa nomwo muyabakwaselele sipilitu.
5 Ha simbu ije, Bajuda baje bazibilile Njambi lyoba baje batundile ku mafuti oshe a hano hasi bakele mu Jelusalema.
6 Mucazibikile cije cilumo, mbunga ya banu bakungulukile, co balikomokelele, mwafwa munu na munu walizibilile bandongesi mubakele na kwendeka mu ndaka yendi.
7 Cili bene, balikomokelele manene na kwendeka ngwabo: “Taleni, kuma aba boshe bali na kwendeka keti baka-Galileya ndi?
8 Co kwija batyoni umo na umo wetu alizibile mu ndaka yendi ya cisemwa?
9 Hakati ketu hali baka-Patiya, baka-Mede na baka-Elamu. Co lalo hali baje batunga ku Mesopotamia, ku Judeya na ku Kapadosha, ku Pontasi na mu provinsi ya Asia,
10 ku Filigiya na ku Pamfilia, ku Ijipiti na ku mitambela ya Libia kuyehi na Sailini. Hali lalo bangenzi ba kutunda ku Loma, tubaboshe Bajuda na Baproselite,
11 baka-Krete na baka-Arabia, tuli na kuziba bandongesi mubali na kwendeka byuma byakama bya kukomokesa bya Njambi mu bindaka byetu.”
12 Cili bene, boshe balikomokelele manene, co bakele mu citanga. Bakele na kulihula umo na mukwabo ngwabo: “Eci cilumbununa bika?”
13 Oloni bamo bakele na kubashendumuna na kubendeka ngwabo: “Banapende binyu bya kutobala.”*
14 Oloni Pita wemanene hamolika na baje 11, co wendekele kuli bakebo na lijwi lya kutaluka ngwendi: “Eni banu ba mu Judeya, neni boshe mwatunga mu Jelusalema, zibukeni eci cuma, co tolilileni mwamubwa ku majwi ange.
15 Aba banu kubapendele ngwe mumuli na kusinganyekela, mwafwa ino 09:00.*
16 Oloni eci cikeco cibendekele kwitila muli kapolofweto Joele ngwabo:
17 ‘Njambi ngwendi, “Mu matangwa a mamaneselelo, njiketila sipilitu yange ha miyati yoshe ya banu, co bana beni ba banalume naba ba banakazi bakapolofweta, co bakwenje beni bakamona bimona, co tukulukazi beni bakalota bilota.
18 Co lalo mu matangwa aje, njiketila sipilitu yange hali bindungo bange ba banalume naba ba banakazi, co bakapolofweta.
19 Njikanena bikomokeso* mwilu na bizibukiso hasi, ebi bikapwa maninga na tuhya na mashelwa na bwisi.
20 Simbu kanda litangwa lya Yehova lyakama lya kukomokesa lije, litangwa likatenguluka kupwa lisusulungu, ngonde ikatenguluka kupwa maninga.
21 Co woshe asana ha lizina lya Yehova akoboka.”’
22 “Eni banu Baisalele, tolilileni awa majwi: Yesu muka-Nazaleta, Njambi wamusholwele ha kujela kuli yeni. Walingile ngoco kwitila mu bipangi bya nzili na bikomokeso* na bizibukiso bije byalingile Njambi mukati keni kwitila muli ikeye, ngwe mumuzibukila.
23 Ou munu bamwanene mu maboko eni kwesekesa na cizango* ca Njambi na mangana endi a kuzibukila cimweja bya kulutwe, co yeni mwapangesele baka-kupokola mashiko mu kumupameya ha citi ca kuyandesela na kumutsiya.
24 Oloni Njambi wamusangwile ha kumupatula ku kutsa,* mwafwa kucasele kumukuta.
25 Mwafwa Devidi wendekele byou munu ngwendi: ‘Njinaka Yehova halutwe lwange simbu yoshe, mwafwa ali ku liboko lyange lya cilyo mangana keti banjiningangese.
26 Ngeci, mbunge yange yajolelele, ndaka yange yabwahelelele manene, co njikala na lilabelelo.
27 Mwafwa kuukanjiseze* mu Cihilo,* nambe kwecelela ngamba yobe uje akamwesa kulongwa cije kucesi kutenguluka abole.
28 Unanjimwesa bingila bya kuyoya. Co unjilingisa njibwahelele manene ku mesho obe.’
29 “Eni banalume, bandolome, njitabeseni njendeke neni mu kuzituka bya Devidi, mutwe wa naanga, ngwange watsile, co bamutsindile, mbumbo yendi tucili nayo na lelo lino.
30 Ha kuwana ngwe wapwile kapolofweto, co lalo wazibukile ngwendi Njambi walisingile kuli ikeye ngwendi akaka umo wa bana bendi* ha litanda lyendi,
31 wamwenenene cimweja byakulutwe, co wendekele bya kusanguka kwa Kristu ngwendi kubamusezele mu Cihilo,* nambe kwecelela situ yendi ibole.
32 Njambi wasangwile ou Yesu, co tubaboshe tunapu tu bakaleho bei ñanda.
33 Co mwafwa banamujundula na kumwaka ku liboko lya Njambi lya cilyo, co lalo natambula sipilitu ya kujela kutunda kuli Tate, ngeci naitila hali yetu ngwe mumuli na kumona na kuziba.
34 Devidi kaile mwilu, oloni ikeye babenya wendekele ngwendi: ‘Yehova walekele Mwata wange ngwendi: “Tumama ku liboko lyange lya cilyo
35 kweta noho hanjikakela bitozi bobe kupwa ngwe citwamo ca kulyata mendi obe.”’
36 Ngeci, bakunjibo ya Isalele boshe bazibuke ngwabo ou Yesu imwapameyeye ha citi, cili bene Njambi namupwisa Mwata na Kristu.”
37 Mubazibile ebi byuma, bazibile ku bimbunge bo, co balekele Pita na tupositolo bakwabo ngwabo: “Eni banalume, bandolome, bika bitunapande kulinga?”
38 Pita wabalekele ngwendi: “Tengulukeni, co umo na umo weni bamumbwitike mu lizina lya Yesu Kristu mangana bamikonekele bubi bweni, co mutambula bwana bwa sipilitu ya kujela.
39 Mwafwa eci cikulaheso banacikulahesa yeni na bana beni, na baje boshe bali kulako, baje boshe asana Yehova Njambi yetu baije kuli ikeye.”
40 Wendekele lalo majwi akwabo amangi mu kwana bukaleho bwa kushula na kubashongangeya ngwendi: “Lyangununeni kuli eci cisemwa ca kupenga-penga.”
41 Co baje batambwile mwamubwa lijwi lyendi babambwitikile, co ha litangwa lije kwalibwezelelele banu* ba kweta ku 3,000.
42 Co batwaleleleleho kukakateya ku bilongesa bya tupositolo, na kulikwatasana,* na kulya byakulya, na kulombela.
43 Cili bene, banu* boshe bashangumukile kuziba lyoba, co tupositolo bashangumukile kulinga bikomokeso* na bizibukiso byabingi.
44 Boshe baje batengulukile na kupwa baka-kutaba bakele hamolika, balipangelele byuma byoshe bibakele nabyo.
45 Bakele na kulandesa byuma byabo na bitenga byabo, co bimbongo bibawanene babipangelele banu boshe kwesekesa na bujene bwa munu na munu.
46 Co ha litangwa na litangwa bakele na kulikungulwila mu tempele na biyongola bimo, bakele na kulyendela ha binjibo byabo na kulila hamo byakulya byabo mu kubwahelela, co lalo na mbunge imo,
47 na kushangazala Njambi, co banu boshe babwahelelele hali bakebo. Co lalo ha litangwa na litangwa, Yehova watwaleleleleho kubabwezelela banu baje bakoboka.
Majwi a kwinikila
^ Nambe “byabiha.”
^ Lijwi na lijwi “ino ola yamucitatu.”
^ Nambe “bimweso.”
^ Nambe “bimweso.”
^ Nambe “kunangula.”
^ Nambe hamo “ku mikole ya kutsa.”
^ Nambe “kuukaseze mwonyo wange.”
^ Nambe “Hedesi, kulumbununa, bihilo mubakai banu boshe.” Taleni Majwi Abanalumbununa.
^ Lijwi na lijwi “umo wa bushuka bwa bintungi byendi.”
^ Nambe “Hedesi, kulumbununa, bihilo mubakai banu boshe.” Taleni Majwi Abanalumbununa.
^ Nambe “myonyo.”
^ Nambe “kulipangela na bakwabo.”
^ Nambe “myonyo.”
^ Nambe “bimweso.”
