Bilinga 21:1-40
21 Twabasezele, nameme kwakaluwile kulinga ngoco, co mutwasunukile na bwato, twaile bene ye na ku Kosi. Lyamukwabo, twaile ku Lodesi, co mutwatundile kuje, twaile ku Patala.
2 Mutwawanene bwato bwakele na kuya musambwa mu Fonisha, twalondelemo na kuya.
3 Mutwamwene liñanda lya Saiprasi, twalyongolokele na kulyumbila ku cimoshwe,* co twaile na bwato ku Siria, twakatutikile ku Tile muje mubwapandele kukalongolwela bwato bitenga.
4 Twatondele bandongesi, co mutwabawanene, twakele kuje matangwa 7. Oloni kwitila mu sipilitu, aba bandongesi belukilile-ilukilile kuleka Paulu ngwabo keti akalyate mu Jelusalema.
5 Simbu yetu ya kukala kuje muyahwile, twakatukile na kutwalelelaho na bungenzi bwetu. Oloni boshe hamolika na banakazi na banike, batusindikiiye kweta noho hatwatuhukilile hanja ya nganda. Co twatsikamene ha nunda na kulombela.
6 Twalisalesele nabo, co twakobelele mu bwato, bakebo belukile ku binjibo byabo.
7 Mutwatundile mu Tile na bwato twaketele ku Tolemai, twamenekele bandolome, co twakele nabo litangwa limo.
8 Lyamukwabo, twakatukile, co twezile ku Sezaliya. Twakobelele mu njibo ya Filipu muka-kwambulula, uje wapwile umo wa baje banalume 7, co twakele nendi.
9 Ou munalume, wakele na bana ba banakazi bawana ba bazike* baje bakele na kupolofweta.
10 Co mutwakele kuje matangwa amangi, kapolofweto wa lizina lya Agabasi wezile kutunda ku Judeya.
11 Co wezile kuli yetu, wambatele mwiba wa Paulu na kulikutawo ku mendi na ku maboko na kwendeka ngwendi: “Sipilitu ya kujela inendeka ngwayo, ‘Babenya ou mwiba bakamukuta ngacije mu Jelusalema kuli Bajuda, co bakamwana mu maboko a banu ba ku mafuti.’”
12 Mutwazibile ngoco, yetu na baje bakele kuje, twashangumukile kulambelela Paulu ngwetu keti akanduke ku Jelusalema.
13 Paulu wakumbulwile ngwendi: “Bika bimuli na kulilila na kunjizeyesa?* Yange kunjalibwaheselele lika kunjikuta, oloni njalibwahesela na kutsila bene mu Jelusalema, mwafwa ya lizina lya Mwata Yesu.”
14 Mutwonowele kumukokweya, twalikelele kumubindika, co twendekele ngwetu: “Cizango ca Yehova cilingiwe.”
15 Munima yawa matangwa, twalibwaheselele bya bungenzi bwetu, co twashangumukile kuya ku Jelusalema.
16 Bandongesi bamo ba ku Sezaliya nabo baile netu. Batutwalele kuli Masoni wa ku Saiprasi, umo wa bandongesi bakulibanga, babenya njibo kuje kutwapandele kukatulila.
17 Mutwetele ku Jelusalema, bandolome batutambwile na nzanzu.
18 Lyamukwabo, Paulu waile netu kuli Jemusi, co bakulunu boshe kubakele.
19 Paulu wabamenekele, co washangumukile kubaleka mu kushula byuma byoshe byalingile Njambi kuli baka-mafuti kwitila mu cipangi cendi.
20 Mubazibile ebi byuma, bashangumukile kwana Njambi bumpau. Oloni balekele Paulu ngwabo: “Ndolome, walimwena ngwobe mukati ka Bajuda muli baka-kutaba babangi, co boshe bali na ntwima ya kukabangeya Lishiko.
21 Oloni banazibi lingwabo hali yobe ngwabo uli na kulongesa Bajuda boshe baje bali mukati ka baka-mafuti ngwobe batengulukile Mashiko a Mosesa. Uli na kubaleka ngwobe keti batwale bana babo ku mukanda nambe kulinga byuma mwaya cisemwa.
22 Co tulinga batyoni? Mwafwa bakuziba bene ngwabo unaija.
23 Ngeci, linga ebi byuma bitukuleka: Tuli na banalume bawana baje banalingi cikumiiyo.
24 Ambata aba banalume uye nabo, ukalijelese nabo kwesekesa na cisemwa, co ukabafwetele byuma byoshe bibatonda, mangana bakatehule ku mitwe yabo. Co banu boshe bakazibuka ngwabo lingwabo libanazibi hali yobe linapu lya makuli. Bakazibuka lalo ngwabo uli na kwenda mwamubwa, co lalo uli na kunyunga Lishiko.
25 Oloni baka-kutaba baje bali mukati ka baka-mafuti bakebo tunabasonekela laja bitunakutu, ngwetu bajenjuke ku byuma bibanana ku tumponya na ku maninga na ku byuma bibanatikinya* na ku bupangala.”*
26 Lyamukwabo, Paulu wambatele baje banalume, waile na kulijelesa hamo nabo kwesekesa na cisemwa, co wakobelele mu tempele mangana akabaleke hawahwila matangwa a kulijelesa kwesekesa na cisemwa mangana bane bwana bwa umo na umo wabo.
27 Co aje matangwa 7 muwakele muyehi na kuhwa, Bajuda ba ku Asia mubamwene Paulu mu tempele, bashangumwine mbunga yoshe, co bamukwatele.
28 Batambekele ngwabo: “Eni banu ba Isalele tukwaseniko! Ou ikeye munalume ali na kulongesa banu boshe ku mitambela yoshe ngwendi batengulukile banu betu, na Lishiko lyetu, nou mwela. Co lalo nanene na Bagriki muno mu tempele na kujwalesa uno mwela wetu wa kujela.”
29 Bendekele ngoco mwafwa babangele kumona Paulu mu nganda ali na Trofima wa ku Efeso, co basinganyekele ngwabo namunene mu tempele.
30 Mu nganda mwoshe mwakele mpindangano, co banu bezile lumbisi, bakukwatele Paulu na kumukokela hanja ya tempele, co haje bene bashokele bikolo.
31 Mubashakele ngwabo bamutsiye, mukulunu wa cibunga ca maswalale watambwile muzimbu ngwabo mu Jelusalema mwoshe muli mpindangano.
32 Oho bene wambatele maswalale na tupitau ba maswalale, co washatukilileko. Mubamwene uje mukulunu wa maswalale na maswalale, balikelele kupupa Paulu.
33 Co uje mukulunu wa maswalale washweneneko, wamwambatele na kushika ngwendi bamukute malyenge abali. Co wehwile mangana bamuleke indi ou munu wapwile iya na byuma byanalingi.
34 Oloni bamo muje mu mbunga batambekele ebi, bakwabo batambekele bije. Ngeci, uje mukulunu wa maswalale mwonowele kuwana shongo na ntsina ya ñanda mwafwa ya kuliuya, washikile ngwendi batwale Paulu ku binjibo bya maswalale.
35 Oloni Paulu mwetele ha bindendelo, maswalale bamujundwile, mwafwa ya butenu bwa ije mbunga.
36 Mwafwa ije mbunga yabakabele munima oku batambeka ngwabo: “Mutsiye!”
37 Mubashakele oni kumukobelesa mu binjibo bya maswalale, Paulu walekele mukulunu wa maswalale ngwendi: “Unjitabesa njendekeko bimo kuli yobe ndi?” Uje mukulunu wa maswalale wamukumbulwile ngwendi: “Uzibuka kwendeka Cigriki?
38 Kuma ha matangwa a kunima, keti yobe muka-Ijipiti uje washangumwine banu mangana batengulukile fulumende na kutwala bikelemi 4,000 mu mambo ndi?”
39 Paulu wendekele ngwendi: “Yange nji Kajuda wa ku Tasasi mu Silisha, nji munu wa mu nganda ya kutsimana. Ngeci, njikulomba ngwange unjitabese njendeke ku banu.”
40 Mwamutabesele, Paulu wemanene ha bindendelo, washobweyeye banu na liboko mangana boloke. Co mubolokele kulu, wendekele nabo mu ndaka ya Cihebelu ngwendi:
Majwi a kwinikila
^ Nambe “ku mutambela wa cikuma.”
^ Lijwi na lijwi, “baje kanda balilaleho na banalume.”
^ Nambe “kuzeyesa mbunge yange.”
^ Nambe “bibanatsii kwa kujeneka kwitila maninga abyo.”
^ Mu Cigriki por·nei’a. Taleni Majwi Abanalumbununa.
