Bilinga 23:1-35
23 Paulu watalele shwii baje baka-nkunta ya Sanihedrini, co wendekele ngwendi: “Eni banalume, bandolome, njinayoyo na citakutaku ca kujela manene ku mesho a Njambi kweta na lelo lino.”
2 Kapilistu wahakamwa Ananiyasi mwazibile ngoco, washikile baje bemanene kuyehi na Paulu ngwendi bamupupe ku kanwa.
3 Paulu walekele kapilistu wahakamwa ngwendi: “Njambi akupupa, obe muka-kulikwisa.* Unatumama oho ngwobe unjisompe kwesekesa na Lishiko, co yobe munu umolika lalo upokola Lishiko ha kushika ngwobe banjipupe ndi?”
4 Baje bemanene kuyehi na Paulu bendekele ngwabo: “Obe, uli na kushaula kapilistu wahakamwa wa Njambi?”
5 Paulu wendekele ngwendi: “Bandolome, kunjazibukile ngwange kapilistu wahakamwa. Mwafwa banasoneka ngwabo, ‘Kuwapandele kwendeka mwamubi muka-kuyula banu beni.’”
6 Paulu hakuzibuka ngwendi cibunga cimo capwile ca Basaduki, cikwabo ca Bafalisi, watambekele mu nkuta ya Sanihedrini ngwendi: “Eni banalume, bandolome, yange nji Kafalisi, muna Bafalisi. Co bali na kunjisompa mwafwa ya lilabelelo lya kusanguka kwa batsi.”
7 Mwendekele ebi, mukati ka Bafalisi na Basaduki mwakatukile bimata, co ije mbunga yalikungulwile yalyangunwine hakati.
8 Mwafwa Basaduki bakendeka ngwabo kukwesi kusanguka nambe tungelo nambe sipilitu, oloni Bafalisi bakebo bataba* ngwabo byoshe kubyakala.
9 Ngeci, kwakatukile mpindangano yakama, co baka-kusoneka bamo ba mu cibunga ca Bafalisi bakatukile, co bashangumukile kulinga manene bimata ngwabo: “Kutwawanene mulonga muli ou munalume, oloni nga sipilitu nambe kangelo nendeka nendi—.”
10 Co bije bimata mubyakele na kwama manene, mukulunu wa maswalale watewele ngwendi Paulu bamusanyozola. Ngeci washikile maswalale ngwendi basikumuke mangana bakatundise Paulu bwasi-bwasi mukati ka baje banu na kumunena ku binjibo bya maswalale.
11 Oloni lije bene litangwa ku butsiki, Mwata wemanene kuyehi na Paulu na kumuleka ngwendi: “Simpa! Mwafwa ngwe muunana bukaleho bwa kushula hali yange mu Jelusalema, unapande kukana lalo bukaleho na ku Loma.”
12 Mulyakile, Bajuda batumbile butumbe na kulisinga ngwabo kubali nambe kunwa, kubanga banatsii Paulu.
13 Banu baje balisingile na kutumba obu butumbe batubakanene 40.
14 Aba banu baile ku tupilistu bakama na kuli bakulunu na kubaleka ngwabo: “Tunalisingi yetu babenya ngwetu kutuli cuma nambe cimo, kubanga tunatsii Paulu.
15 Ngeci yeni, hamolika na baka-nkuta ya Sanihedrini, munapande kuleka mukulunu wa maswalale ngweni anene Paulu kuli yeni mangana mulinge ngwe mushaka kwilula mwamubwa ñanda yendi. Oloni simbu kanda ete hayehi, yetu tulibwahesela kumutsiya.”
16 Oloni mwehwa wa Paulu wa munalume wazibile butumbe bwabo bwa kubandelela Paulu, ngeci wakobelele mu binjibo bya maswalale na kukaleka Paulu.
17 Co Paulu wasanene kapitau ka maswalale umo na kumuleka ngwendi: “Twalou mukwenje kuli mukulunu wa maswalale, mwafwa ali na bimo byashaka kumuleka.”
18 Ngeci, wambatele uje mukwenje na kumutwala kuli mukulunu wa maswalale, co wendekele ngwendi: “Lipanditi Paulu nanjisanene, co nanjilombo ngwendi njinene ou mukwenje kuli yobe, mwafwa ali na bimo byashaka kukuleka.”
19 Mukulunu wa maswalale wakwatele uje mukwenje ku liboko na kumutwala kumukulo, co wamwihwile ngwendi: “Bika biushaka kunjileka?”
20 Uje mukwenje wendekele ngwendi: “Bajuda banalizibasana ngwabo bakulombe utwale Paulu kuli baka-nkuta ya Sanihedrini imene, balinge ngwe bashaka kuzibuka byabingi ha ñanda yendi.
21 Oloni keti utabe, mwafwa banu babo ba kutubakana 40 banabandelela Paulu, co banalisingi ngwabo kubali nambe kunwa kubanga banamutsii. Hano banalibwahesela laja, banabandamena lika yobe ubatabese.”
22 Ngeci, uje mukulunu wa maswalale wasuwile uje mukwenje mwamanesele kumushika ngwendi: “Keti uleke munu nambe umo ngwobe unanjileke ei ñanda.”
23 Co wasanene tupitau ba maswalale babali na kubaleka ngwendi: “Ambateni maswalale 200 mulibwahesele kuya ku Sezaliya. Ambateni lalo na baka-kulonda tubalu 70 na baka-makunga 200, mukatuke kuma 21:00.*
24 Co lalo bwaheseleni Paulu tubalu alondeho mangana akete mwamubwa kuli ngubulu Felikisi.”
25 Co wasonekele mukanda wa kwendeka ngwawo:
26 “Yange Kulodiasi Lisiasi, njisonekela yobe Munu wa Bulemu, Ngubulu Felikisi: Njakumeneka!
27 Ou munalume banamukwatele kuli Bajuda, co banashakele kumutsiya. Oloni yange njazambwile bwasi na maswalale bange na kukamwobola, mwafwa njazibile ngwabo wapwa Kaloma.
28 Co njamutwalele mu nkuta yabo ya Sanihedrini, mwafwa njashakele kuzibuka bibali na kumwanena mulonga.
29 Njawanene ngwabo bali na kumwana mulonga wa kutalesa ku Lishiko lyabo, oloni kubamuwanene na mulonga nambe umo wanapande kutsila, nambe wakumwakela mu kamenga.
30 Oloni ha kuwana ngwe bananjileke butumbe bubanatumbu hali ou munu, mukemwo njamutumu kuli yobe na kushika baje banamwana mulonga ngwange bakuwendekele ku mesho obe.”
31 Ngeci baje maswalale bambatele Paulu kwesekesa nomu mubabashikile, co bamutwalele ku Antipatrisi butsiki.
32 Lyamukwabo, balekele baje baka-kulonda tubalu baye nendi, co bakebo belukile ku binjibo bya maswalale.
33 Baje baka-kulonda tubalu bakobelele mu Sezaliya, co banene ngubulu uje mukanda, betesele lalo na Paulu kuli ikeye.
34 Ngeci, ngubulu watandele uje mukanda, co wehwile ku provinsi kwatundile Paulu, bamulekele ngwabo watundile ku Silisha.
35 Ngubulu walekele Paulu ngwendi, “Njakutolilila mwamubwa ñanda yobe mubeta baje bali na kukwana mulonga.” Co washikile ngwendi banyungile Paulu mu njibo ya Heloda ya bumwene.
Majwi a kwinikila
^ Nambe “cibumbe ca kukwita mubala wa kutoka.”
^ Nambe “bakambulula ku mbunga.”
^ Lijwi na lijwi “ha ola yamucitatu ya butsiki.”
