Bilinga 24:1-27
24 Mukwetile matangwa atanu, kapilistu wahakamwa Ananiyasi wezile na bakulunu bamo na Tetulasi uje wazibukile kwendeka mwamubwa ku mbunga,* co balekele ngubulu mulonga ubanene Paulu.
2 Tetulasi mubamusanene, washangumukile kwendeka mulonga wa Paulu ngwendi:
“Tuli na kuyoya mu kwoloka kwakama mwafwa yobe, co lalo byuma bili na kwenda mwamubwa muno mu lifuti mwafwa ya mana obe a kusinganyekela cimweja byuma bya kulutwe.
3 Ebi byuma tuli na kulimwenabyo simbu yoshe mu mitambela yoshe. Ngeci, twakukandelela manene obe Felikisi Munu wa Bulemu.
4 Oloni kunjishaka kukubiisila simbu, ngeci njikulomba ngwange mu ngozi yobe utolilileko lika kamandondo.
5 Ou munalume ali na kunena bukalu,* ali na kushongangeya banu mukati ka Bajuda boshe batengulukile fulumende hano hasi hoshe. Co lalo ikeye ntwama wa kacibunga ka kulimanena ka baka-Nazaleta.
6 Nashakele lalo kujwalesa tempele, mukemwo tunamukwatele.
7 ——
8 Muulihwilaye yobe babenya, ulimwena ngwobe byuma byoshe bituli na kumwanena mulonga binapu bya busunga.”
9 Bajuda nabo bamulwisile, bakele na kwendeka ngwabo ebi byuma byapwile bya busunga.
10 Ngubulu wanetwilile Paulu mutwe ngwendi endeke, co Paulu wendekele ngwendi:
“Njizibuka mwamubwa ngwange unakula ou muyati ha myaka yaingi, co njalibwahesela kwendeka mangana njilyamene.
11 Ngwe muuwanena bukaleho yobe babenya, kukwetile matangwa a kutubakana 12 kutunda hanjinakandukila ku Jelusalema na kulemesa.
12 Co kubanjiwanene njilinga bimata na munu mu tempele, nambe kushongangeya mbunga ya banu inene mpindangano mu masinagogi, nambe mu nganda mwoshe.
13 Co lalo kubesi na bukaleho bubasa kukwana buje bumwesa ngwabwo byuma bibali na kunjanena mulonga hano binapu bya busunga.
14 Oloni njilitabela cuma eci kuli yobe ngwange, ngila ya kulemeselamo ibali na kusana bakebo ngwabo kacibunga ka kulimanena, ikeyo injili na kupangela Njambi ya bakukulwila bange cipangi ca kujela, mwafwa njakulahela byuma byoshe bili mu Lishiko na mu Bisoneka bya Tupolofweto.
15 Co njili na lilabelelo kuli Njambi, lilabelelo libali nalyo naba banu, ngwange kukakala kusanguka kwa baka-kusungama na baka-kujeneka kusungama.
16 Mukemwo njili na kupanga na nzili mangana njikale na citakutaku ca kujela* ku mesho a Njambi na ku mesho a banu.
17 Mukwetile myaka yaingi, njaile ku Jelusalema mangana njitwale bwana bwa kutetela ku muyati wange na kwana bwana bukwabo.
18 Munjakele na kulinga ebi byuma, banjiwanene mu tempele njinalijelesa kwesekesa na cisemwa. Kunjakele na mbunga ya banu, co lalo kunjakele na kunena mpindangano embwe. Oloni kuje, kwakele Bajuda bamo batundile ku provinsi ya Asia,
19 baje banapandele kwija ku mesho obe mangana banjane mulonga nga kuli bimo binjinabulumuna.
20 Nambe bene aba banu bali hano, becele balyendekele bakebo babenya mulonga ubananjiwanene nawo munjinemanene ku mesho a baka-nkuta ya Sanihedrini.
21 Kubanga cuma cimolika cinjatambekele munjinemanene mukati kabo ngwange: ‘Bali na kunjisompa lelo ku mesho obe mwafwa ya lilabelelo lya kusanguka kwa batsi!’”
22 Ha kuwana ngwe Felikisi wazibukile mwamubwa byei Ngila, wemikile ije ñanda na kwendeka ngwendi: “Njakwakula biñanda byeni mwaija Lisiasi, mukulunu wa maswalale.”
23 Co washikile kapitau ka maswalale ngwendi akute Paulu, oloni amwaneko lisesa lya kulingako byuma bimo na kutabesa babusamba bendi bamulingile byuma byatonda.
24 Mukwetile matangwa amo, Felikisi wezile na munakazi wendi Drusila uje wapwile Kajuda. Felikisi watumine banu bakasane Paulu, wamutolililile mwakele na kwendeka bya kukulahela muli Kristu Yesu.
25 Oloni Paulu mwakele na kwendeka bya kupwa ba kusungama, na bya kukwata mbunge, na bya kusompa kuje kwija kulutwe, Felikisi wazibile lyoba, co wendekele ngwendi: “Ha simbu ino wasa kuya, oloni munjiwana simbu, njikusana lalo.”
26 Ha simbu imolika lalo, wasinganyekele ngwendi hamo Paulu amwanako bimbongo. Ngeci wakele na kumusana kushwa kumo na kusimutwiya nendi.
27 Oloni mukwetile myaka ibali, Felikisi bamwingile kuli Poshasi Festasi, co ha kuwana ngwe Felikisi washakele kuzibisa Bajuda kubwaha, wasezele Paulu mu kamenga.
Majwi a kwinikila
^ Nambe “loya.”
^ Lijwi na lijwi “napu mushongo wa kulitambwisa.”
^ Nambe “njijeneke kapayo.”
