Bilinga 5:1-42
5 Oloni munalume umo wa lizina lya Ananiyasi hamolika na munakazi wendi Safira, balandesele libu lyabo.
2 Oloni Ananiyasi washwekeleko bimbongo bimo, munakazi wendi nendi wazibukile ngoco, co waneneleko lika bimo ku tupositolo.
3 Oloni Pita wendekele ngwendi: “Ananiyasi, mwafwa bika Satana na kulingisa ukaluke na kukwisa sipilitu ya kujela na kushweka bimbongo bimo biunalandesa libu?
4 Simbu kanda ulandese eli libu, kuma kulyapwile lyobe ndi? Co munima ya kulilandesa, kuma ngwe kuwapangesele bimbongo muushakela ndi? Indi bikoni biunasinganyekela cuma ca kufwa ngacije mu mbunge yobe? Kuwakwisile banu, oloni unakwisi Njambi.”
5 Ananiyasi mwazibile awa majwi, wandumukile na kutsa. Co boshe baje bazibile ei ñanda bazibile manene lyoba.
6 Ngeci, bakwenje bakatukile, bamuzengelele mu binanga, co bamutuhwile hanja na kukamutsinda.
7 Mukwetile maola a kweta ku atatu, munakazi wendi nendi wakukobelele, oloni kazibukile byalingiwile.
8 Pita wamwihwile ngwendi: “Njileke, kuma mububali bweni munalandesa libu lyeni bungandi ndi?” Wamukumbulwile ngwendi: “Eyo, ikeyo bene ndando itunalilandesa.”
9 Ngeci Pita wamulekele ngwendi: “Mwafwa bika mu bubali bweni mwalizibasana kweseka sipilitu ya Yehova? Tala! Baje banakatsinda munalume wobe bali ku cikolo, nobe nawa bakutuhwisa hanja.”
10 Haje bene wandumukilile ku mendi a Pita na kutsa. Baje bakwenje mubakobelele, bamuwanene natsi, co bamutuhwisile na kukamutsinda kuyehi na munalume wendi.
11 Ngeci cikungulukilo coshe na baje boshe bazibile ebi byuma, bazibile manene lyoba.
12 Co lalo, tupositolo batwaleleleleho kulinga bizibukiso na bikomokeso* byabingi. Co boshe bakele na kulikungulwila mu Cimbimbi ca Solomoni.
13 Nameme ngwabo kukwakele beka basimpile na kulikwatasana nabo, oloni banu bakele na kubashangazala manene.
14 Co lalo baka-kutaba muli Mwata batwaleleleleho kulibwezelela, bapwile banalume na banakazi babangi.
15 Co bakele na kunena na baka-kubinja mu bingila byakama na kubalangeka ha tumyela na ha tumanala mangana Pita mwaita, munzinzime wendi wite hali bamo babo.
16 Co lalo mbunga ya banu baje batundile mu binganda bije byazengelekele Jelusalema, bakele na kwija, bambatele baka-kubinja na baje bakele na basipilitu ba kujwala, co boshe babakangwisile.
17 Oloni kapilistu wahakamwa na baje boshe bakele hamo nendi, baje bakele mu kacibunga ka kulimanena ka Basaduki, bazibile cipululu, co bakatukile.
18 Bakwatele* tupositolo na kubaka mu kamenga.
19 Oloni ku butsiki, kangelo ka Yehova washokolwele bikolo bya kamenga, co wabatuhwilemo na kubaleka ngwendi:
20 “Yeni mukemane mu tempele, co mukatwaleleleho kuleka banu majwi oshe oku kuyoya.”
21 Mubazibile ngoco, bakakobelele mu tempele cimene-mene, co bashangumukile kulongesa.
Co kapilistu wahakamwa na baje bakele nendi mubetele, bakungulwile hamo baka-nkuta ya Sanihedrini na mbunga yoshe ya bakulunu ba muyati wa Isalele.* Co batumine banu bamo bakashake tupositolo babanene kuli bakebo.
22 Oloni tupasu mubetele kuje, kubabawanene mu kamenga. Ngeci belukile, co bakwambulwile
23 ngwabo: “Tunawana ku kamenga kwakupata mwamubwa, na tunyungi banemana ku bikolo, oloni mutunashokololamo, kutwawanenemo munu.”
24 Co kapitau wa ku tempele na tupilistu bakama mubazibile awa majwi, bakele mu citanga mwafwa kubazibukile byasa kulingiwa.
25 Oloni munu umo wezile na kubaleka ngwendi: “Tolilileni! Banu bamunakele mu kamenga bali mu tempele, banemana, bali na kulongesa banu.”
26 Co kapitau waile na tupasu bendi, bakabashakele, oloni kubabalwisile, mwafwa batewele ngwabo banu babasha mamanya.
27 Ngeci, babanenele na kubemika ku mesho a baka-nkuta ya Sanihedrini. Co kapilistu wahakamwa wabehozwele
28 na kwendeka ngwendi: “Twamishikile ngwetu keti mulongese lalo mu lizina lyou munu, oloni mwamono! Munashulisa Jelusalema na bilongesa byeni, co mushaka kunena maninga ou munu ha mitwe yetu.”
29 Pita na tupositolo bakwabo bakumbulwile ngwabo: “Tunapande kwononoka Njambi ha kupwa ikeye muka-kuyula kutubakana kwononoka banu.
30 Njambi ya bakukulwila betu wasangwile Yesu uje imwatsiile ha kumushukika ha citi.
31 Njambi namujundula na kumupwisa Muka-kwimanena Wakama na Mwobole na kumwaka ku liboko lyendi lya cilyo, mangana Baisalele batenguluke na kubakonekela bubi bwabo.
32 Yetu tunapu tu bakaleho bebi byuma, hamolika na sipilitu ya kujela, ije yanana Njambi kuli baje bali na kumwononoka ha kupwa muka-kuyula.”
33 Mubazibile ngoco, balubalele manene,* co bashakele kubatsiya.
34 Oloni Kafalisi umo wa lizina lya Gamaliele, wakatukile na kwimana mu nkuta ya Sanihedrini. Wapwile muka-kulongesa Lishiko uje ibasingimikile manene banu boshe. Co washikile ngwendi bacituhule tahi tusipotolo hanja ha simbu yaindondo.
35 Wendekele ngwendi: “Banu ba Isalele nyanyameni na byuma bimushaka kulinga kuli aba banu.
36 Cakumwenako, ku matangwa a kunima, kwakele Teuda uje wakele na kulitumbula ngwendi wapwile munu wa bulemu, co banu ba kweta ku 400 bakobelele mu cibunga cendi. Oloni bamutsiile, co boshe baje bakele na kumukabangeya balishandangenene, co kubasholokele lalo.
37 Kutunda hali ikeye, kwakele Judasi wa ku Galileya mu matangwa a kulisonekesa, co wakokele banu bamukabangeye. Nendi lalo wanyongele, co boshe baje bamukabangeyeye balishandanganene.
38 Ngeci, kwesekesa nomu mubili byuma ha simbu ino, njimileka ngwange keti mukwate aba banu, oloni beceleni. Nga obu butumbe nambe eci cipangi bitunda ku banu, co noku kubiya kwahi.
39 Oloni nga bitunda kuli Njambi, kumwasa kubonowesa, keti ngoconi muwana ngweni muli na kulwisa bene Njambi.”
40 Ngeci, batolililile byabanangwile, co basanene tupositolo, babapupile na kubashika ngwabo balikele kwendeka mu lizina lya Yesu, co babecelele baye.
41 Ngeci batundile ku mesho a baka-nkuta ya Sanihedrini oku banabwahelela, mwafwa bamwene ngwabo kunapu kwakubwa kubashawila lizina lya Yesu.
42 Co ha litangwa na litangwa mu tempele na ha njibo na njibo, batwaleleleleho kulongesa na kwambulula muzimbu waubwa wa Kristu Yesu, kwa kujeneka kulikela.
Majwi a kwinikila
^ Nambe “bimweso.”
^ Nambe “Bakutile.”
^ Lijwi na lijwi “bana ba Isalele.”
^ Nambe “bazibile ku mbunge bo.”
