Bilinga 6:1-15
6 Co mu matangwa aje, bandongesi mubakele na kulibwezelela, Bajuda baje bakele na kwendeka Cigriki bashangumukile kuyayabala hali Bajuda baje bakele na kwendeka Cihebelu, mwafwa bifwile babo bakele na kubayengula mubakele na kupangezela byakulya bya ha litangwa na litangwa.
2 Ngeci, baje 12 bakungulwile mbunga ya bandongesi na kubaleka ngwabo: “Keti kwakubwa* tuseze kulongesa lijwi lya Njambi, tushangumuke kupangezela byakulya ha bimesa.
3 Ngeci bandolome, tondeni banalume 7 mukati keni baje bali na kulinga mwamubwa,* baje banashulu na sipilitu na mana mangana tubangule batale ha ñanda ei ya seho,
4 yetuco twake mbunge kukulombela na ku cipangi ca kulongesa lijwi lya Njambi.”
5 Byuma bibendekele byazibisile kubwaha ije mbunga yoshe ya banu. Ngeci, bangwile Setefano, munalume uje wakele na likulahelo lya kukanyama, co lalo washulile na sipilitu ya kujela, na Filipu na Prokolasi na Nikano na Timoni na Pamena na Nikolasi, kaproselite wa ku Antioke.
6 Babanenele ku tupositolo, co mubamanesele kulombela babakambekele maboko.
7 Lijwi lya Njambi lyatwaleleleleho kujalakana, co bandongesi batwaleleleleho kulibwezelela manene mu Jelusalema. Ngeci mbunga yakama ya tupilistu bashangumukile kukulahela.
8 Co Setefano uje washulile na kutetela kwa Njambi na nzili, wakele na kulinga bikomokeso* byakama na bizibukiso mukati ka banu.
9 Oloni banalume bamo babasanene ngwabo Baka-sinagogi ya Banu ba Kupatuka, bezile na baka-Sailini bamo na baka-Alekizandriya na bamo batundile ku Silisha na Asia mangana bakulinge bimata na Setefano.
10 Oloni kubasele kuhyana mana na sipilitu ya kujela ije yamukwasele endeke.
11 Ngeci, bashongangeyeye banu ku bushweke bendeke ngwabo: “Tunamuzibi endeka majwi a kushaula Mosesa na Njambi.”
12 Co bashangumwine banu na bakulunu na baka-kusoneka, co bajemukilile Setefano, bamunjinjamanene na kumutwala kuli baka-nkuta ya Sanihedrini.
13 Banenele bakaleho ba makuli, bendekele ngwabo: “Ou munu simbu yoshe akashaula uno mwela wa kujela na kushaula Lishiko.
14 Cakumwenako, twamuzibile endeka ngwendi ou Yesu muka-Nazaleta akawisa uno mwela na kutengulula mashiko atwanene Mosesa.”
15 Co boshe baje batumamene mu nkuta ya Sanihedrini bamutalele shwii, co bamwene ngwabo ku mesho endi kwafwile ngwe ku mesho a kangelo.
Majwi a kwinikila
^ Lijwi na lijwi “Keti cuma cizibisa kubwaha.”
^ Nambe “baje babali na kushangala.”
^ Nambe, “bimweso.”
