Bilinga 8:1-40
8 Saulu walikwatasanene nabo mu mbunge yendi mu kutsiya Setefano.
Ha litangwa lije, bashangumukile kuyandesa manene cikungulukilo cakele mu Jelusalema. Bandongesi boshe bashandokelele mu mitambela ya mu Judeya na Samaliya, kubanga tupositolo lika.
2 Oloni banalume baje bazibilile Njambi lyoba bambatele Setefano na kukamutsinda, co bamulilile manene.
3 Saulu washangumukile kulwisa manene cikungulukilo, wakele na kukobela mu njibo na njibo na kukokela banalume na banakazi hanja na kubaka mu kamenga.
4 Oloni baje balishandokele, bambulwile muzimbu waubwa wa lijwi lya Njambi mu mitambela mwoshe mubaile.
5 Filipu waile ku nganda ya Samaliya,* co washangumukile kubambulwila bya Kristu.
6 Co mbunga yoshe ya banu bakele manene mbunge ku byuma byakele na kwendeka Filipu omwo bakele na kutolilila na kumona bizibukiso byakele na kulinga.
7 Banu babangi bakele na basipilitu ba kujwala, co aba basipilitu bakele na kutetubuka na kutunda kuli baje banu. Co lalo banu babangi baje bakele na tulepa na baje bakele na buyanga bakangukile.
8 Ngeci banu ba muje mu nganda babwahelelele manene.
9 Muje mu nganda mwakele munalume umo wa lizina lya Simoni. Hakulibanga wakele na kulinga manseno, co wakele na kukomokesa banu ba mu Samaliya na manseno endi. Wakele na kulyendeka ngwendi wapwile munu wa bulemu.
10 Co banu boshe, kutunda ku wamundondo kutwala ku wakama manene bakele na kumutolilila na kwendeka ngwabo: “Ou munalume ikeye Nzili ya Njambi ije ibasana ngwabo Yakama.”
11 Ngeci, bakele na kumutolilila mwafwa wabakomokesele na manseno endi ha simbu yailaha.
12 Oloni mubatabele Filipu uje wakele na kwambulula muzimbu waubwa wa Bumwene bwa Njambi, nou wa lizina lya Yesu Kristu, banalume na banakazi babambwitikile.
13 Simoni nendi watengulukile na kupwa muka-kutaba, co mubamumbwitikile, watwaleleleho kulikwatasana na Filipu. Wakomokele manene mwamwene bizibukiso na bipangi bya nzili bije byakele na kulingiwa.
14 Tupositolo mu Jelusalema mubazibile ngwabo Basamaliya banatambula lijwi lya Njambi, batumineko Pita na Iwano.
15 Co baileko, bakabalombelelele mangana batambule sipilitu ya kujela.
16 Mwafwa sipilitu ya kujela te kanda ije nameme hali umo wabo, oloni babambwitikile lika mu lizina lya Mwata Yesu.
17 Ngeci, bakambekele maboko abo hali bakebo, co bashangumukile kutambula sipilitu ya kujela.
18 Simoni mwamwene ngwendi tupositolo bakele na kwana banu sipilitu kwitila mu kubakambeka maboko, washakele kubana bimbongo.
19 Wendekele ngwendi: “Nange njaneni ei moko mangana woshe injikambeka maboko atambule sipilitu ya kujela.”
20 Oloni Pita wamulekele ngwendi: “Siuva yobe inyongele hamo nobe, mwafwa unasinganyeka ngwobe bwana bwa Njambi wasa kubulanda na bimbongo.
21 Kuwesi na mutamba nambe mwela mu ñanda ei, mwafwa mbunge yobe kuyasungamene ku mesho a Njambi.
22 Tenguluka ku bubi bwobe, co lambelela Yehova mangana nga citaba, bakukonekele biyongola byabibi bya mu mbunge yobe.
23 Mwafwa njinamono ngwange unapu u bushungu bwa kulula,* co lalo u ndungo ya bilinga bya kuhenga.”
24 Simoni wabalekele ngwendi: “Njilambeleleniko kuli Yehova mangana ku byuma bimunendeka keti kulingiwe cuma cimo kuli yange.”
25 Ngeci, mubamanesele kwana mwamubwa bukaleho na kwendeka lijwi lya Yehova, bashangumukile kwiluka ku Jelusalema, co baile oku bambulula muzimbu waubwa mu membo amangi a Basamaliya.
26 Oloni kangelo ka Yehova walekele Filipu ngwendi: “Katuka uye ku mbwela,* ku ngila ije itunda ku Jelusalema iya ku Gaza.” (Ei ngila yaita mu mambo.)
27 Ngeci, wakatukile na kuya, wakaliwanene na munalume umo wa bulemu* wa ku Ithopia uje wakele na moko yakama mu ciyulo ca Kandasi, mwene wa munakazi wa baka-Ithopia. Ou munalume ikeye wakele na kutala bufuko bwoshe bwa mwene, co waile ku Jelusalema na kulemesa Njambi.
28 Co mwakele na kwiluka, watumamene mu litemba lyendi oku ali na kutanda mu kutambeka mukanda wa kapolofweto Isaya.
29 Co sipilitu yendekele kuli Filipu ngwayo: “Shwena kuje ku litemba.”
30 Filipu washatukilile ku litemba, co wazibile uje munalume ali na kutanda mukanda wa kapolofweto Isaya, ngeci wamwihwile ngwendi: “Uli na kuzibisisa* biuli na kutanda ndi?”
31 Wamukumbulwile ngwendi: “Njasa kubizibisisa bati kwa kujeneka munu wa kunjilumbunwinabyo?” Ngeci, walombele Filipu alonde mu litemba atumame nendi.
32 Awa akewo majwi akele na kutanda mu Cisoneka: “Bamutwalele ngwe manga ibatwala na kutsiya, co lalo ngwe muna manga uje noloka kulu kuli muka-kumutehula, ngeci nendi kafukula mu kanwa kendi.
33 Mubakele na kumushaula, kubamwakwile mu kusungama. Iya akalumbununa mwamubwa bya cisemwa cendi? Mwafwa kuyoya cendi banacitundisa hano hasi.”
34 Uje munalume wa bulemu walekele Filipu ngwendi: “Njikulomba unjileke, iya yali na kwendeka kapolofweto aha? Ali na kulyendeka ikeye babenya, indi ali na kwendeka munu weka?”
35 Filipu washangumukile kwendeka, co washangumukile neci cisoneka kumwambulwila muzimbu waubwa wa Yesu.
36 Mubakele na kuya mu ngila bawanene mema, co uje munalume wa bulemu wendekele ngwendi: “Tala! Mema awa, bika binjonowesa kunjimbwitika?”
37 ——
38 Ngeci, uje munalume wa bulemu washikile ngwendi bemike litemba. Co boshe babali, Filipu na uje munalume bakobelele mu mema. Co Filipu wamumbwitikile.
39 Mubatundile mu mema, sipilitu ya Yehova yatundisile bwasi-bwasi Filipu kuje, co uje munalume wa bulemu kamumwene lalo, oloni waile bungenzi bwendi oku nabwahelela.
40 Oloni Filipu wakaliwanene ali mu Ashidodi, waile muje mu mutambela mwoshe, co watwaleleleleho kwambulula muzimbu waubwa mu binganda byoshe kweta noho haketelele ku Sezaliya.
Majwi a kwinikila
^ Nambe hamo “nganda imo ya mu Samaliya.”
^ Lijwi na lijwi “nyangwa.”
^ Nambe “ku south.”
^ Nambe “mwata umo wa mu nkuta.”
^ Nambe “kuziba.”
