Bilinga 9:1-43
9 Oloni Saulu uje wacikele na kujujwisa bandongesi ba Mwata na kushaka kubatsiya, waile kuli kapilistu wahakamwa,
2 co wamulombele mikanda ya kuya nayo mu masinagogi a mu Damasika mangana akakute baka-kukaba Ngila ya Mwata boshe, banalume na banakazi na kubanena ku Jelusalema.
3 Mwakele na kuya bungenzi bwendi, wetele kuyehi na Damasika, co haje bene ceke ca kutunda mwilu camutwililile,
4 co wawililile hasi, wazibile lijwi lyendeka kuli ikeye ngwalyo: “Saulu, Saulu, bika biuli na kunjiyandesela?”
5 Saulu wehwile ngwendi: “Mwata, yobe iya?” Wamukumbulwile ngwendi: “Yange Yesu iuli na kuyandesa.
6 Oloni katuka uye mu nganda, co bakakuleka biunapande kulinga.”
7 Banalume baje bendele hamo nendi bemanene oku banalikomokela, co nabimo bibasele kwendeka byahi. Lijwini balizibile, oloni naumo wahi ibamwene.
8 Co Saulu wakatukile hasi, nameme mesho endi akele na kutona, oloni kuwakele na kumona. Ngeci bamukwatele ku liboko na kumutwala mu Damasika.
9 Co ha matangwa atatu, kasele kumona cuma cimo, co lalo kalile nambe kunwa bimo.
10 Mu Damasika mwakele ndongesi wa lizina lya Ananiyasi. Co Mwata wendekele kuli ikeye mu cimona ngwendi: “Ananiyasi!” Ananiyasi wakumbulwile ngwendi: “Mwata, yange uno.”
11 Mwata wamulekele ngwendi: “Katuka uye ku ngila ibasana ngwabo Kusungama, ukatonde munalume wa lizina lya Saulu, uje atunda ku Tasasi, ali ku njibo ya Judasi. Hano bene ali na kulombela.
12 Mu cimona, namono munalume wa lizina lya Ananiyasi naija kuli ikeye na kumukambeka maboko mangana ashangumuke lalo kumona.”
13 Oloni Ananiyasi wakumbulwile ngwendi: “Mwata, njinazibi byou munalume ku banu babangi. Njinazibi byuma byabibi byanalingi kuli bakujela bobe mu Jelusalema.
14 Co hano tupilistu bakama banamwana moko ya kukuta* boshe baje bali na kusana ha lizina lyobe.”
15 Oloni Mwata wamulekele ngwendi: “Ya, mwafwa ou munalume napu cikwata cinjinangula mangana ambulule lizina lyange ku baka-mafuti na ku bimyene na ku bana ba Isalele.
16 Mwafwa njimumwesa bwino tuyando twoshe twanapande kwitamo mwafwa ya lizina lyange.”
17 Ngeci Ananiyasi waile, wakobelele mu njibo, co wamukambekele maboko na kwendeka ngwendi: “Ndolome yange Saulu, Mwata Yesu uje nasholokele kuli yobe mu ngila muunakala na kwija, nanjitumu mangana ushangumuke lalo kumona, co lalo ushule na sipilitu ya kujela.”
18 Haje bene, byuma bya kufwa ngwe mabanda byatundile mu mesho a Saulu, co washangumukile lalo kumona. Ngeci wakatukile, co bamumbwitikile,
19 kutundaho walile byakulya, co wawanene nzili.
Co watumameneko matangwa amo na bandongesi mu Damasika.
20 Co haje bene washangumukile kwambulula bya Yesu mu masinagogi ngwendi ou ikeye Muna Njambi.
21 Oloni boshe baje bamuzibile, balikomokelele manene na kwendeka ngwabo: “Kumou keti ikeye nakele na kuyandesa manene banu mu Jelusalema, baje banakele na kusana ha lizina eli ndi? Kuma byanezila kuno keti kwa kubakuta na kubatwala ku tupilistu bakama ndi?”
22 Oloni Saulu watwaleleleleho kukala manene na nzili, co wakele na kukomokesa manene Bajuda ba mu Damasika mwakele na kubalumbunwina mwamubwa ngwendi ou ikeye Kristu.
23 Mukwetile matangwa amangi, Bajuda batumbile butumbe ngwabo bamutsiye.
24 Oloni biyongola bya kushaka kutsiya Saulu byetele kuli ikeye, co bakele na kulabelela ku bikolo butsiki na mutanya mangana bamutsiye.
25 Ngeci, bandongesi bendi bamwambatele, co ku butsiki bamwakele mu cizuma na kumusosela mu mbengwa ije yakele ha cibumbe.
26 Paulu mwetele mu Jelusalema, wesekele mwoshe mwaselele ngwendi alikwatasane na bandongesi, oloni boshe bakele na kumutewa, mwafwa kubatabele ngwabo wapwile ndongesi.
27 Ngeci Banabasi wamukwasele, co wamutwalele ku tupositolo. Wabalekele mu kushula mwamwenenene Mwata mu ngila, nomu mwendekelele kuli ikeye, nomu mwendekelele mu kusimpa bya lizina lya Yesu mu Damasika.
28 Ngeci wakele nabo, co wakele na kulyendela mu kuzituka* mu Jelusalema, na kwendeka mu kusimpa mu lizina lya Mwata.
29 Wakele na kwendeka na kulinga bimata na Bajuda baje bakele na kwendeka Cigriki, oloni bashakele kumutsiya.
30 Bandolome mubazibile ei ñanda, bamutwalele ku Sezaliya, co bamutumine ku Tasasi.
31 Co cikungulukilo mu Judeya mwoshe na mu Galileya na mu Samaliya, cakele mu kwoloka, co lalo cakanyamene. Ha kuwana ngwe cazibilile Yehova lyoba, co lalo cakele na kuyoya kwesekesa na kuzembeleka kwa sipilitu ya kujela, catwaleleleleho kulibwezelela.
32 Pita mwakele na kwita muje mu mutambela mwoshe, wezile na kuli bakujela mu Lida.
33 Co wawanenemo munalume wa lizina lya Aneyasi, uje walalele lika ha mwela wendi ha myaka 8, mwafwa wakele na kalepa.
34 Pita wamulekele ngwendi: “Aneyasi, Yesu Kristu akukangwisa. Induka ujale mwela wobe.” Co haje bene wendukile.
35 Boshe baje bakele mu Lida na mu Cana ca Shaloni mubamumwene, batengulukilile kuli Mwata.
36 Mu Jopa mwakele ndongesi wa lizina lya Tabitha, lije lilumbununa “Dokasi.”* Ou munakazi wakele na kupanga bipangi byabingi byabibwa na kwana bwana bwa kutetela.
37 Mu matangwa aje, wabinjile, co watsile. Ngeci bamutanesele na kumulangeka mu mulili wa helu.
38 Ha kuwana ngwe Lida yakele hayehi na Jopa, co bandongesi mubazibile ngwabo Pita ali muje mu nganda, batumine banalume babali bakamulombe ngwabo: “Shukulu-kambu, zambwila kuno.”
39 Ngeci, Pita wakatukile na kuya nabo. Mwetele kuje, bamutwalele mu mulili wa helu. Co bifwile boshe bezile kuli ikeye, bakele na kulila na kumumwesa bizalo byabingi na mikanjo* byabatungilile Dokasi ha simbu yakele nabo.
40 Pita watuhwisile banu boshe hanja, co watsikamene na kulombela. Kutundaho, watengulukile na kutala cibimbi, co wendekele ngwendi: “Tabitha, induka!” Tabitha watonene, co mwamwene Pita, wendukile na kutumama.
41 Pita wamukwatele ku liboko na kumwimika. Co wasanene bakujela na bifwile, wabaneneye oku ali na kuyoya.
42 Ei ñanda yajalakanene mu Jopa mwoshe, co banu babangi batengulukile na kupwa baka-kutaba muli Mwata.
43 Pita wakele matangwa amangi mu Jopa kuli muka-kufutungula bilambu wa lizina lya Simoni.
Majwi a kwinikila
^ Lijwi na lijwi “kwaka mu malyenge.”
^ Lijwi na lijwi “wakele na kukobela na kutuhuka.”
^ Mu Cigriki Dokasi, mu Cialamaiki Tabitha. Awa mazina oshe alumbununa “Shonge.”
^ Nambe “bizalo bya helu.”
