Galatiya 6:1-18
6 Bandolome, nameme nga munu ali na kuya mu ngila ya kuhenga simbu kanda azibuke, yeni munakolo ku sipilitu mwololeni mu kuwa mbunge. Oloni umo na umo weni anyanyame kutewa nendi akobela mu ceseko.
2 Twaleleleniho kulyambatesa bitele bya kulema bya umo na mukwabo, omwo mulinga ngoco mushulisilila lishiko lya Kristu.
3 Nga munu asinganyeka ngwendi napu wa seho, okuni wangoco ali na kulikwisa ikeye babenya.
4 Oloni munu na munu elule bilinga byendi babenya, co awana cuma cimuzibisa kubwaha ikeye babenya keti mu kulyesekesa ku munu weka.
5 Munu na munu alyambatela citele cendi babenya.
6 Co lalo woshe ibali na kulongesa lijwi,* alipangele byuma byoshe byabibwa na uje ali na kumwana bilongesa bya cifweci.
7 Keti bamyungumune: Kucitaba kukwisa Njambi. Mwafwa byoshe byakuna munu, bikebyo lalo byateja.
8 Mwafwa woshe akuna na biyongola bya situ yendi, ateja kubola kuje kutunda ku situ yendi, oloni uje akuna na biyongola bya sipilitu, ateja kuyoya kwa myaka yoshe kuje kutunda ku sipilitu.
9 Ngeci, keti tujuke kulinga byuma byabibwa, mwafwa nga kutujuka* tukateja ha simbu inapande.
10 Ngeci, omwo tucili na simbu,* tupangeni bipangi byabibwa ku banu boshe, maneneni ku babushoko bwetu mu kukulahela.
11 Taleni bukama bwa bisona binjinamisonekela na liboko lyange.
12 Boshe baje bali na kushaka kuzibisa banu kubwaha mu situ,* bakebo bali na kumisindiya kuya ku mukanda. Bali na kulinga ngoco mwafwa ya kutewa kubayandesela ha citi ca kuyandesela* ca Kristu.
13 Mwafwa nameme baje bali na kuya ku mukanda kubesi na kunyunga Lishiko, oloni bashaka ngwabo yeni muye ku mukanda mangana balishashele ha situ yeni.
14 Oloni yange kunjilishashela ha cuma ceka, kubanga lika ha citi ca kuyandesela* ca Mwata wetu Yesu Kristu, uje kwitila muli ikeye kaye banakatsii* mu kumona kwange, co nange bananjitsii mu kumona kwa kaye.
15 Mwafwa kuya ku mukanda nambe kujeneka kuya ku mukanda keti kukekwo kwa seho, oloni cuma caciha canatanga Njambi cikeco ca seho.
16 Kuli baje bali na kwenda mwamubwa kwesekesa neci cinangulo, kwoloka na kutetela bikale nabo, eyo, bikale na Isalele ya Njambi.
17 Kutunda hano, kunjishaka munu anjipindisa mwafwa ha mubila wange hali bizibukiso bimwesa ngwabyo nji ndungo ya Yesu.
18 Bandolome, ngozi yakama ya Mwata Yesu Kristu ikale neni mwafwa ya bimbunge byeni byabibwa. Ameni.
Majwi a kwinikila
^ Nambe “kulongesa na kanwa.”
^ Nambe “kutwecela.”
^ Lijwi na lijwi “simbu ibanangula.”
^ Nambe “baje bashaka kumoneka mwamubwa hanja.”
^ Taleni Majwi Abanalumbununa.
^ Taleni Majwi Abanalumbununa.
^ Nambe “banakatsiila ha citi.”
