Luka 3:1-38
3 Mu mwaka wa bu 15 wa ciyulo ca Tibeliasi Sezale, omwo Pontiasi Pilato wapwile ngubulu wa Judeya, Heloda* wakele na kuyula* mutambela wa Galileya, ndolome yendi Filipu wakele na kuyula mutambela wa Ituleya na Trakoniti, co Lisaniya wakele na kuyula mutambela wa Abilene.
2 Mu matangwa a kapilistu wakama Anasi, nawa a Kayafasi, lijwi lya Njambi lyezile kuli Iwano muna Zakaliya uje wakele mu mambo.
3 Ngeci Iwano waile ku mitambela yoshe ije yazengelekele Jodani, waile na kwambulula bya cimbwitiko cije cinapu cimweso ca kutenguluka mangana bubi babukonekele
4 ngwe mubanasonekela mu libulu lya kapolofweto Isaya ngwabo: “Kuli lijwi lya umo ali na kutambeka mu mambo ngwendi: ‘Bwaheseni ngila ya Yehova! Ololeni bingila byendi.
5 Binema byoshe banapande kubyofwela, minkinda yoshe na malundu oshe banapande kubisalamesa. Bingila bya kupenga-penga banapande kubisungamesa, co bingila bya mandunga-mandunga banapande kubilambesa.
6 Ngeci banu boshe bakamona ngila yakobwelamo Njambi.’”
7 Ngeci, washangumukile kuleka mbunga ya banu baje bakele na kwija kuli ikeye na kubambwitika ngwendi: “Eni bana ba mambwambwa,* iya naminangula mangana mutewe butenu bwa Njambi buje buli na kwija?
8 Imeni bushuka buje bumwesa ngwabwo munatenguluka. Keti mushangumuke kwendeka mu bimbunge byeni ngweni, ‘Yetu tu bana ba Abrahamu.’ Mwafwa njimileka ngwange aha ha mamanya, Njambi asa kutundisilaho Abrahamu bana.
9 Cili bene, ngimbu ili laja ku muzi wa muti. Co muti woshe uje kuwimi bushuka bwabubwa bakaushinja na kuumbila mu tuhya.”
10 Co ije mbunga ya banu bamwihwile ngwabo: “Bikoni bitunapande kulinga?”
11 Wabakumbulwile ngwendi: “Woshe ali na bikobelo bibali,* aneko uje najena, co uje ali na byakulya nendi lalo aneko uje najena.”
12 Baka-kutelesa mitelo nabo bezile mangana bakubambwitike, co bamwihwile ngwabo: “Mulongesi, bika bitunapande kulinga?”
13 Wabakumbulwile ngwendi: “Keti mutelese banu mutelo wa kutubakana uje ubanatomo.”
14 Co na maswalale lalo bamwihwile ngwabo: “Bika bitunapande kulinga?” Wabakumbulwile ngwendi: “Keti muyandese* munu nambe kumubangeya byuma bya makuli. Oloni jaukeni na byuma bibali na kumyana.”*
15 Banu bakele na kubandamena Kristu, co boshe bakele na kulihula mu bimbunge byabo hali Iwano ngwabo, “Kumou keti ikeye Kristu ndi?”
16 Iwano wakumbulwile banu boshe ngwendi: “Yange njimimbwitika na mema, oloni ou nanjitubakana ku nzili ali na kwija, co kunjafwilililile kuzitula miba ya masanda endi. Ikeye akamimbwitika na sipilitu ya kujela na tuhya.
17 Nakwata cilelekeso mu liboko lyendi mangana ajelese mwamubwa ha lijungwilo lyendi na kukungululwila tiliku yendi mu cishete. Oloni lijungu alyenyeka mu tuhya tuje kutwasa kuzima.”
18 Iwano wabakanyamesele ha byuma bikwabo lalo byabingi, co watwaleleleleho kwambulwila banu muzimbu waubwa.
19 Oloni Heloda muka-kuyula mbongi mubamupayele kuli Iwano mwafwa ya Helodiasi munakazi wa ndolome yendi na byuma byabibi byoshe byalingile,
20 Heloda walingile mulonga ukwabo lalo: Wakele Iwano mu kamenga.
21 Banu boshe mubabambwitikile, Yesu nendi bamumbwitikile. Co Yesu mwakele na kulombela, lilu lyashokolokele,
22 co sipilitu ya kujela yezile hali ikeye mu cifwa ca kufwa ngwe liyembe. Co lalo mwilu mwatundile lijwi ngwalyo: “Yobe Munange, injazema, ukanjizibisa kubwaha.”
23 Yesu mwashangumukile cipangi cendi wakele na myaka ya kweta ku 30. Co banu bamumwene ngwabo wapwilemuna Jozefu,Jozefu muna Heli,
24 Heli muna Matati,Matati muna Levi,Levi muna Meuki,Meuki muna Janai,Janai muna Jozefu,
25 Jozefu muna Matatiyasi,Matatiyasi muna Amosi,Amosi muna Nahumi,Nahumi muna Esli,Esli muna Nagai,
26 Nagai muna Maati,Maati muna Matatiyasi,Matatiyasi muna Semeini,Semeini muna Joseki,Joseki muna Joda,
27 Joda muna Joanani,Joanani muna Lese,Lese muna Zelubabeu,Zelubabeu muna Shalatiele,Shalatiele muna Neli,
28 Neli muna Meuki,Meuki muna Adi,Adi muna Kosamu,Kosamu muna Elemada,Elemada muna Ele,
29 Ele muna Yesu,Yesu muna Elieza,Elieza muna Jolimu,Jolimu muna Matati,Matati muna Levi,
30 Levi muna Simyoni,Simyoni muna Jozefu,Jozefu muna Jonamu,Jonamu muna Eliakimu,
31 Eliakimu muna Meleya,Meleya muna Mena,Mena muna Matata,Matata muna Nathani,Nathani muna Devidi,
32 Devidi muna Jesi,Jesi muna Obedi,Obedi muna Boazi,Boazi muna Samoni,Samoni muna Nashoni,
33 Nashoni muna Aminadabu,Aminadabu muna Ani,Ani muna Hezroni,Hezroni muna Pelezi,Pelezi muna Juda,
34 Juda muna Jakobu,Jakobu muna Isaki,Isaki muna Abrahamu,Abrahamu muna Tela,Tela muna Nahole,
35 Nahole muna Selugi,Selugi muna Reu,Reu muna Pelegi,Pelegi muna Eba,Eba muna Shila,
36 Shila muna Kainani,Kainani muna Apakishadi,Apakishadi muna Shemu,Shemu muna Nowa,Nowa muna Lameki,
37 Lameki muna Metusela,Metusela muna Inoki,Inoki muna Jaledi,Jaledi muna Mahalale,Mahalale muna Kainani,
38 Kainani muna Inoshi,Inoshi muna Sethi,Sethi muna Adama,Adama muna Njambi.
Majwi a kwinikila
^ Kulumbununa, Heloda Antipasi. Taleni Majwi Abanalumbununa.
^ Lijwi na lijwi “wapwile ngubulu wa.”
^ Nambe “bana ba manyoka.”
^ Nambe “cikobelo cikwabo.”
^ Nambe “munyeke.”
^ Nambe “na fweto yeni.”
