Mateu 1:1-25
1 Ou ukewo mukanda wa muzimbu* wa Yesu Kristu,* muna Devidi, muna Abrahamu:
2 Abrahamu wakitile Isaki,Isaki wakitile Jakobu,Jakobu wakitile Juda na bana bakwabo,
3 Juda wakitile Pelezi na Zela kuli Tamala,Pelezi wakitile Hezroni,Hezroni wakitile Lamu,
4 Lamu wakitile Aminadabu,Aminadabu wakitile Nashoni,Nashoni wakitile Samoni,
5 Samoni wakitile Boazi kuli Rahabu,Boazi wakitile Obedi kuli Ruthi,Obedi wakitile Jesi,
6 Jesi wakitile mwene Devidi.
Devidi wakitile Solomoni kuli munakazi wa Uliya,
7 Solomoni wakitile Lehoboamu,Lehoboamu wakitile Abaija,Abaija wakitile Asa,
8 Asa wakitile Jehoshafati,Jehoshafati wakitile Jeholamu,Jeholamu wakitile Uziya,
9 Uziya wakitile Jothamu,Jothamu wakitile Ahazi,Ahazi wakitile Hezekiya,
10 Hezekiya wakitile Manase,Manase wakitile Amoni,Amoni wakitile Josiya,
11 Josiya wakitile Jekoniya na bana bakwabo ha simbu ibatwalele Bajuda ku Babiloni.
12 Mubaile ku Babiloni, Jekoniya wakitile Shalatiele,Shalatiele wakitile Zelubabeu,
13 Zelubabeu wakitile Abiudi,Abiudi wakitile Eliakimu,Eliakimu wakitile Azo,
14 Azo wakitile Zadoki,Zadoki wakitile Akimu,Akimu wakitile Eliudi,
15 Eliudi wakitile Eliaza,Eliaza wakitile Matani,Matani wakitile Jakobu,
16 Jakobu wakitile Jozefu munalume wa Maliya, Maliya wakitile Yesu uje ibasana ngwabo Kristu.
17 Bisemwa byoshe kutunda hali Abrahamu kweta hali Devidi byapwile 14. Co kutunda hali Devidi kweta ha simbu ibatwalele Bajuda ku Babiloni kwetile bisemwa 14. Kutunda ha simbu ibabatwalele ku Babiloni kweta hali Kristu kwetile bisemwa 14.
18 Kusemuka kwa Yesu Kristu kwafwile ngacije: Ha simbu ije, Maliya ina ya Yesu te banamwendekeya kuli Jozefu, co wakele na cikute ca sipilitu ya kujela* simbu kanda balyambate na Jozefu.
19 Oloni munalume wendi Jozefu wapwile wa kusungama, co kashakele kumuzibisa shwamwa ku banu, mukemwo washakele kutsiya bulo mu kushwekesa.
20 Oloni mwamanesele kusinganyekesesa ha byuma ebi, kangelo ka Yehova* washolokele kuli ikeye mu cilota, co wamulekele ngwendi: “Jozefu muna Devidi, keti utewe kutwala munakazi wobe Maliya ku njibo, mwafwa cikute cali naco cinaija mwafwa ya sipilitu ya kujela.
21 Akakita mwana wa munalume, co ukamuluka ngwobe Yesu,* mwafwa ikeye akobola banu bendi ku bubi bwabo.”
22 Ebi byuma byoshe byalingiwile mangana bishulisilile bupolofweto bwendekele Yehova kwitila muli kapolofweto kendi ngwendi:
23 “Mumbanda uje kanda alilale laja na munalume akakala na cikute, co akakita mwana wa munalume. Co bakamuluka ngwabo Manuwele.” Eli lizina nga balinungulula, lilumbununa ngwalyo, “Njambi Ali Hamo Netu.”
24 Co Jozefu wanyangumukile ha tulo na kulinga byuma byamulekele kangelo ka Yehova, wambatele munakazi wendi na kumutwala ku njibo.
25 Oloni kalilalele nendi kweta noho hakitilile mwana wa munalume, co Jozefu wamulukile ngwendi Yesu.
Majwi a kwinikila
^ Nambe “cikota.”
^ Nambe “Mesiya; Wakubwabesa.”
^ Nambe “ca nzili ya Njambi.”
^ Mu Bisoneka bya Cigriki bya Baka-Kristu lizina lya Yehova banalitumbula lwa kupwa 237. Aha hakeho habanalitumbula lwakulibanga.
^ Eli lizina lyalitombola na lizina lya Cihebelu lya Yeshua lije lilumbununa ngwalyo “Yehova Ikeye Mwobole.”
