Mateu 13:1-58
-
BYAKUMWENAKO BYA BUMWENE (1-52)
-
TMuka-kukuba (1-9)
-
Byalingisile Yesu apangese byakumwenako (10-17)
-
Cakumwenako ca muka-kukuba bacilumbununa (18-23)
-
Tiliku na shaku (24-30)
-
Nona ya mastadi na musima (31-33)
-
Wapangesele byakumwenako mangana ashulisilile bupolofweto (34, 35)
-
Kulumbununa cakumwenako ca tiliku na shaku(36-43)
-
Bufuko bunabanda, na mpasi yaibwa (44-46)
-
Bwanda bwakama (47-50)
-
Byuma byabiha nebi bya laja (51, 52)
-
-
Yesu bamubyana ku mutambela wa kwimbo lyendi (53-58)
13 Ha litangwa lije bene, Yesu watundile muje mu njibo, co wakatumamene ku kalunga-ndonga.
2 Mbunga ya banu mubezile kuli ikeye, wakobelele mu bwato na kutumamamo. Ije mbunga yemanene ha nunda.
3 Co wabalekele byuma byabingi kupangesa byakumwenako. Wendekele ngwendi: “Tolilileni! Muka-kukuba umo waile na kukuba.
4 Mwakele na kukuba, bimbuto bimo byawililile kumukulo wa ngila, co tuzila bezile na kubilya byoshe.
5 Bikwabo byawililile ha mamanya haje kuhakele libu lyalingi, co byamenene bwasi mwafwa hakele libu lyalindondo.
6 Oloni litanya mulyezile, lyakubyenyekele, co byajujwamene mwafwa kubyashimbikile mizi.
7 Bikwabo lalo byawililile mu mingonga. Ije mingonga yakolele, co yakimbitisile bije bimbuto.
8 Byeka byawililile ha libu lyalibwa, co byashangumukile kwima bushuka, bimo byemine bushuka 100, bikwabo 60, byeka 30.
9 Woshe ali na matwi atolilile.”
10 Bandongesi bezile kuli ikeye, co bamwihwile ngwabo: “Bika biuli na kwendekela nabo mu byakumwenako?”
11 Wabakumbulwile ngwendi: “Yeni banamikwasa muzibisise mahungu a kujela a Bumwene bwa mwilu, oloni bakebo kubabakwasele kuwazibisisa.
12 Woshe ali na byuma, bakamubwezelelako bikwabo, co akakala na byabingi. Oloni woshe kesi na byuma, bakamunyeka na bije byali nabyo.
13 Mukemwo njili na kwendeka nabo kupangesa byakumwenako, mwafwa bali na kutala, oloni kubesi na kumona, bali na kuziba, oloni kubesi na kuzibisisa, co kubesi na kunangukaho cimo.
14 Bupolofweto bwa Isaya buli na kulishulisilila kuli bakebo buje bwendeka ngwabwo: ‘Kuzibani mukaziba, oloni kumukanangukaho cimo. Kutalani mukatala, oloni kumukamono.
15 Mwafwa bimbunge byaba banu binominina, kuziba bali na kuziba na matwi abo, oloni bali na kaliu, co banafwiki mesho abo mangana keti bamone na mesho abo, banaziki lalo matwi abo mangana keti bazibe na matwi abo, na kunanguka na bimbunge byabo, co batenguluke mangana njibakangwise.’
16 “Oloni yeni munabwahelela mwafwa mesho eni ali na kumona, co matwi eni ali na kuziba.
17 Cili bene njimileka ngwange tupolofweto babangi na baka-kusungama bashungwiiye kumona byuma bimuli na kumona, oloni kubabimwene. Bashungwiiye kuziba byuma bimuli na kuziba, oloni kubabizibile.
18 “Tolilileni bicilumbununa cakumwenako ca muka-kukuba.
19 Kumukulo wa ngila kuje kubakubile mbuto, ou ikeye munu woshe aziba lijwi, oloni kanangukaho cimo, co uje wamubi aija na kumunyangula lije lijwi libakubile mu mbunge yendi.
20 Ha mamanya haje habakubile mbuto, ou ikeye munu uje aziba lijwi, co haje bene alitambula mu kubwahelela.
21 Oloni muli ikeye kumwesi mizi, co atwalelelaho lika ha simbu yaindondo. Mwaliwana na kayando nambe mapakeso mwafwa ya lijwi lyanazibi, haje bene atanuka.
22 Co mu mingonga muje mubakubile mbuto, ou ikeye munu uje aziba lijwi, oloni bishoti bya mu katumameno ka myaka ino* na bufuko buje bwakala na nzili ya kungumuna bikimbitisa lije lijwi, co kemi bushuka.
23 Oloni ha libu lyalibwa haje habakubile mbuto, ou ikeye munu uje atolilila ku lijwi na kunangukaho cimo, co ema bushuka. Bumo 100, bukwabo 60, bweka 30.”
24 Wabalekele lalo cakumwenako cikwabo ngwendi: “Bumwene bwa mwilu bunapu ngwe munalume uje wakunine mbuto yaibwa mu lihya lyendi.
25 Banu mubalalele, citozi cendi wezile na kukuba shaku mu tiliku, co waile.
26 Ije mbuto yamenene na kutema na kwima bushuka, co shaku nayo yasholokele.
27 Co bindungo baile kuli babenya njibo na kumwihula ngwabo, ‘Shukulu, kuma kuwakunine mbuto yaibwa mu lihya lyobe ndi? Kunaija batyoni mangana mukale shaku?’
28 Wabakumbulwile ngwendi, ‘Citozi ikeye nalingi ngoco.’ Co bindungo bamwihwile ngwabo, ‘Ushaka ngwobe tukatukulemo shaku ndi?’
29 Wabakumbulwile ngwendi, ‘Embwe. Nga mutukula shaku mutukwila kumo na tiliku.
30 Byeceleni bikolele hamo kweta na ha simbu ya kuteja, co ha simbu ya kuteja, njikaleka baka-kuteja ngwange: Bangeni tahi kutukula shaku na kuikuta mikuta, asinoni mukateja tiliku na kuyaka mu cishete cange.’”
31 Wabalekele cakumwenako cikwabo ngwendi: “Bumwene bwa mwilu bunapu ngwe nona ya mastadi* ije yambatele munu umo na kuikuna mu lihya lyendi.
32 Ikeyo nona yaindondo manene ku binona byoshe, oloni muikakolo ikapu yakama manene ku bimena byoshe na kupwa muti, co tuzila bakeja na kukala ha minango yawo.”
33 Wabalekele cakumwenako cikwabo lalo ngwendi: “Bumwene bwa mwilu bunapu ngwe musima* uje wambatele munakazi na kuushingasana na fulawa ya mu biseteko byakama bitatu* kweta noho hayafutunukilile yoshe.”
34 Yesu wendekele ebi byuma byoshe ku mbunga ya banu kupangesa byakumwenako. Cili bene kendekele nabo kwa kujeneka byakumwenako
35 mangana ashulisilile byuma bibendekele kwitila muli kapolofweto uje wendekele ngwendi: “Njikabalongesa kupangesa byakumwenako. Njikambulula byuma bibashwekele kushwa ku mashangumukilo.”*
36 Mwamanesele kusuula mbunga ya banu, wakobelele mu njibo. Co bandongesi bendi bamulekele ngwabo: “Tulumbunwine cije cakumwenako ca shaku ya mu lihya.”
37 Wabakumbulwile ngwendi: “Muka-kukuba mbuto yaibwa napu Muna munu,
38 lihya linapu kaye. Mbuto yaibwa inapu bana ba Bumwene, co shaku inapu bana ba uje wamubi.
39 Citozi uje wezile na kuikunamo napu Liyabolo. Simbu ya kuiteja inapu mamaneselelo a katumameno ka myaka ino,* baka-kuteja banapu tungelo.
40 Ngwe mwa shaku mubaikutile mikuta na kuyenyeka mu tuhya, na mamaneselelo a katumameno ka myaka ino* mukemwo muwakafwa.
41 Muna munu akatuma tungelo bendi, co bakatundisa byuma byoshe bije bitanwisa banu na kutundisa baka-kupokola mashiko mu Bumwene bwendi.
42 Co bakabombila mu litende lya tuhya. Mukemwo mubakalilila na kulishuma ku mayo.
43 Ha simbu ije, baka-kusungama bakatwa ceke ngwe litangwa mu Bumwene bwa Ishabo. Woshe ali na matwi atolilile.
44 “Bumwene bwa mwilu bunapu ngwe bufuko bunabanda mu libu buje bwawanene munu na kubushweka. Co mwafwa ya kubwahelela, aya na kulandesa byuma byoshe byali nabyo na kulanda lije libu.
45 “Bumwene bwa mwilu bunapu lalo ngwe muka-mingoso wa kwendangana uje aya na kutonda bimpasi* byabibwa.
46 Mwawanene mpasi imo ya seho yakama manene, haje bene waile na kulandesa byuma byoshe byakele nabyo na kulanda ije mpasi.
47 “Bumwene bwa mwilu bunapu lalo ngwe bwanda bwakama buje bubatele mu kalunga-ndonga, co bwakungile bisi ba miyati yoshe.
48 Buje bwanda mubwashulile babukokelele ha nunda, co batumamene hasi na kwangula bisi bababwa na kubaka mu bizuma. Oloni bisi bababi babombilile kuti.
49 Ngeci, na mamaneselelo a katumameno ka myaka ino* nawo mukemwo muwakafwa. Tungelo bakangununa banu bababi ku banu ba kusungama.
50 Co baje banu bababi bakabombila mu litende lya tuhya, mukemwo mubakalilila na kulishuma ku mayo.
51 “Kuma munazibisisa ebi byuma byoshe ndi?” Bamukumbulwile ngwabo: “Eyo.”
52 Co wabalekele ngwendi: “Ngeci bene, mulongesi woshe ibanalongesa bya Bumwene bwa mwilu, napu ngwe babenya njibo uje atuhula byuma byabiha na byuma bya laja mu cishete cendi.”
53 Yesu mwamanesele kwendeka ebi byakumwenako, watundile kuje ku mutambela.
54 Mwetele ku mutambela wa kwimbo lyendi, washangumukile kubalongesa mu sinagogi yabo, co bakomokele na kwendeka ngwabo: “Ou munalume kuli kwanawana mana akufwa ngacije na nzili ya kulinga ebi bipangi bya nzili?
55 Kumou keti ikeye muna muka-kushonga ndi? Kuma ina keti Maliya ndi? Ngwetu Jemusi, Jozefu, Simoni, na Judasi bakebo bandolome bendi ndi?
56 Kuma bandokazi bendi kutwesi nabo kuno ndi? Co kulyoni kwanawana awa mana oshe?”
57 Ngeci, bashangumukile kutanuka mwafwa yendi. Oloni Yesu wabalekele ngwendi: “Kapolofweto bakamusingimika kweka, keti ku mutambela kwatunda na mu njibo yendi.”
58 Co kalingilileko bipangi bya nzili byabingi mwafwa kubakele na likulahelo.
Majwi a kwinikila
^ Taleni Majwi Abanalumbununa.
^ Kambuto kakandondo kakala mu Palestine. Kasa kukola kupwa muti wa kweta ku mamita 4.
^ Nambe “cimela.”
^ Lijwi na lijwi “cipimo ca siya.” Siya imo yapwile malita 7.33.
^ Nambe hamo “hakashangumukilile kukalako kaye.”
^ Taleni Majwi Abanalumbununa.
^ Taleni Majwi Abanalumbununa.
^ Tuma twa seho twa mubundungulu twa kufwa ngwe mamanya tuje tukakala mu mañofwi ba ku kalunga-ndonga.
^ Taleni Majwi Abanalumbununa.
