Mateu 4:1-25
4 Sipilitu yatwalele Yesu mu mambo mangana Liyabolo akamweseke.
2 Mwalibindikile kulya ha matangwa 40 butsiki na mutanya, wazibile njala.
3 Liyabolo wezile na kumweseka, co wamulekele ngwendi: “Nga u Muna Njambi, leka awa mamanya apwe makende.”
4 Oloni Yesu wamukumbulwile ngwendi: “Banasoneka ngwabo: ‘Munu kapandele kuyoya makende lika, oloni napande kuyoya na majwi a kutunda mu kanwa ka Yehova.’”
5 Co Liyabolo wamutwalele mu nganda ya kujela na kukamwimika helu ya cibumbe ca tempele,
6 co wamulekele ngwendi: “Nga u Muna Njambi, lyumbile hasi, mwafwa banasoneka ngwabo: ‘Akashika tungelo bendi,’ co ‘Bakakukabwila mu maboko abo mangana limanya keti likapwesule lindi lyobe.’”
7 Yesu wamukumbulwile ngwendi: “Banasoneka lalo ngwabo: ‘Keti weseke Yehova Njambi yobe.’”
8 Co lalo Liyabolo wamutwalele ha munkinda waulaha manene na kumumwesa bumwene bwoshe bwa muno mu kaye na bumpau bwabwo.
9 Co wamulekele ngwendi: “Njikwana ebi byuma byoshe nga unjitsikamena na kunjilemesa nambe lumolika.”
10 Co Yesu wamukumbulwile ngwendi: “Tundaha obe Satana! Mwafwa banasoneka ngwabo: ‘Yehova Njambi yobe ikeye iunapande kulemesa, co ikeye lika iunapande kupangela cipangi ca kujela.’”
11 Liyabolo wamusezele, co tungelo bezile na kushangumuka kumupangela.
12 Yesu mwazibile ngwabo Iwano banamukutu, waile ku Galileya.
13 Co mwatundile mu Nazaleta, wakakele mu nganda ya Kapenamu mu mitambela ya Zebuloni na Nafutali kuyehi na kalunga-ndonga
14 mangana ashulisilile majwi endekele kapolofweto Isaya ngwendi:
15 “Obe lifuti lya Zebuloni na lifuti lya Nafutali, yeni mwakala mu ngila ya kuya ku kalunga-ndonga, musambwa lya Jodani, Galileya ya baka-mafuti.
16 Banu baje bakele mu lisusulungu bamwene ceke cakama, co lalo baje bakele mu mutambela wa munzinze wa butsi, ceke cabatwililile.”
17 Kutunda haje bene, Yesu washangumukile kwambulula ngwendi: “Tengulukeni, mwafwa Bumwene bwa mwilu buli muyehi.”
18 Yesu mwakele na kwita kumukulo wa kalunga-ndonga wa Galileya, wamwene Simoni uje ibasana lalo ngwabo Pita na ndolome yendi Andru bali na kuta bwanda mu kalunga-ndonga, mwafwa bapwile baka-kuta bisi.
19 Wabalekele ngwendi: “Njikabangeyeni, co njikamipwisa baka-kuta banu.”
20 Haje bene basezele manda abo, co bamukabangeyeye.
21 Mwatundile kuje, wamwene lalo Jemusi na ndolome yendi Iwano, bana ba Zebedi. Bakele mu bwato na ishabo Zebedi oku bali na kutungulula manda abo, co Yesu wabasanene.
22 Haje bene basezele bwato na ishabo, co bamukabangeyeye.
23 Yesu waile na kuzenguluka mu Galileya mwoshe, co wakele na kulongesa mu masinagogi abo na kwambulula muzimbu waubwa wa Bumwene na kukangwisa baka-mishongo yoshe na baka-kubinja boshe.
24 Byuma byalingile byajalakanene mu Siria mwoshe, ngeci bamunenelele baje bakele na mabezi a kuliseza-seza na baje bakele na kuyanda na mishongo ya kuliseza-seza na baje bakele na badimona na baka-kushinya na baka-kalepa, co boshe wabakangwisile.
25 Co banu babangi bamukabele. Batundile ku Galileya na ku Dekapoli* na ku Jelusalema na ku Judeya na musambwa lya Jodani.
Majwi a kwinikila
^ Nambe “Mutambela wa Binganda 10.”
