1 Korinte 1:1-31
1 Yange Paulu ibanasana kupwa kapositolo ka Kristu Yesu kwesekesa nomu mwaya cizango ca Njambi. Njili hamo na ndolome yetu Sosteni.
2 Njili na kusonekela cikungulukilo ca Njambi cije cili mu Korinte, yeni babanajelesa mu kulikwatasana na Kristu Yesu, yeni babanasana kupwa bakujela, hamolika na boshe baje bali na kusana ha lizina lya Mwata wetu Yesu Kristu, Mwata wabo na Mwata wetu ngwange:
3 Ngozi yakama na kwoloka bya kutunda kuli Njambi Tate yetu na kuli Mwata Yesu Kristu bikale neni.
4 Simbu yoshe njikakandelela kuli Njambi mwafwa ya ngozi yakama ya Njambi yanamimwesa kwitila muli Kristu Yesu.
5 Mwafwa mu byuma byoshe banamifukisa muli ikeye, mu cashu coshe ca kwendeka na mu mangana oshe,
6 ngwe mubunazamena bukaleho bwa Kristu mukati keni,
7 mangana keti mujeneke bwana bwoshe-bwoshe simbu mucili na kubandamena manene kusholoka kwa Mwata wetu Yesu Kristu.
8 Co lalo ikeye amikanyamesa kweta na kumamaneselelo mangana keti mukale naha hakumyanena mulonga mu litangwa lya Mwata wetu Yesu Kristu.
9 Njambi wapwa wa kulongwa, ikeye wamisanene mulikwatasane na Munendi Yesu Kristu, Mwata wetu.
10 Co njimishongangeya bandolome, kwitila mu lizina lya Mwata wetu Yesu Kristu ngwange mubaboshe mulitombole mu byuma bimwendeka mangana mukati keni keti mukale kulyangununa, oloni mulikwatasane manene mu biyongola bimo na bisinganyeka bimo.
11 Mwafwa bakunjibo ya Kulowi bamo bananjileke byeni bandolome bange, ngwabo mukati keni muli bimata.
12 Binjilumbununani ebi: Bamo beni bali na kwendeka ngwabo: “Yange nji wa Paulu.” Bakwabo ngwabo: “Yange nji wa Apolo.” Aba ngwabo: “Yange nji wa Kefasi.”* Beka ngwabo: “Yange nji wa Kristu.”
13 Kuma Kristu nalyangununa ndi? Kuma Paulu ikeye wamitsililile ha citi ca kuyandesela ndi? Indi bamimbwitikile mu lizina lya Paulu?
14 Njikandelela bene Njambi mwafwa kunjambwitikile umo hakati keni, kubanga Krispasi na Gayasi,
15 mangana keti kukale umo endeka ngwendi bamumbwitikile mu lizina lyange.
16 Njambwitikile lalo na bakunjibo ya Stefanasi, oloni kuli aba bakwabo kunjanuka mwamubwa indi njambwitikileko umo.
17 Mwafwa Kristu kanjitumine ngwendi njimbwitike banu embwe, oloni wanjitumine ngwendi njambulule muzimbu waubwa. Kunjapangesele endekesi ya kunyanyama,* kutewa citi ca kuyandesela* ca Kristu cipwa cangoco.
18 Mwafwa muzimbu wa citi ca kuyandesela* unapu bulema kuli baje banyonga, oloni kuli yetu twoboka unapu nzili ya Njambi.
19 Mwafwa banasoneka ngwabo: “Njikanyongesa mana a baka-mana, co njikabyana* mana a baka-kulilongesa.”
20 Muka-mana ali kuli? Muka-kusoneka* ali kuli? Muka-bimata wa mu katumameno ka myaka ino* ali kuli? Kuma Njambi kapwisile mana a kano kaye kupwa bulema ndi?
21 Mwafwa mu mana a Njambi, kaye konowele kuzibuka Njambi mu mana ako, oloni Njambi wabwahelelele kwobola baje batabele muzimbu ubamwene bamo ngwabo bulema.
22 Mwafwa Bajuda balomba bizibukiso, Bagriki batonda mana,
23 oloni tuli na kwambulula ngwetu Kristu bamutsiilile ha citi ca kuyandesela. Ou muzimbu unapu citanwiso ku Bajuda, ku baka-mafuti unapu bulema.
24 Oloni kuli baje babanasana, Bajuda na Bagriki, Kristu napu nzili ya Njambi na mana a Njambi.
25 Mwafwa cuma ca bulema ca Njambi cinapu ca mana kutubakana banu, co cuma ca kuzeya ca Njambi cinapu ca kukanyama kutubakana banu.
26 Bandolome, neni munamono ngweni hali yeni babanasana kuli Njambi, keti babangi banapu ba kunyanyama mu kumona kwa bunu, keti babangi bali na nzili, keti babangi batunda ku binaanga bya bulemu,
27 oloni Njambi wangwile byuma bya bulema bya kaye mangana azibise shwamwa baka-mana. Co lalo Njambi wangwile byuma bya kuzeya bya kaye mangana azibise shwamwa byuma bya kukanyama.
28 Co Njambi wangwile byuma bya kujeneka seho bya kaye na byuma bibakalumbilisa banu, bije bibamona ngwabo byangoco mangana bipwise bije bibamona ngwabo bya seho kupwa byangoco,
29 mangana keti kukale umo* alishasha ku mesho a Njambi.
30 Oloni mwafwa ya Njambi mukemwo munalikwatasana na Kristu Yesu uje natunenela mana a kutunda kuli Njambi, co lalo kwitila muli Kristu, Njambi natupwisa ba kusungama na ba kujela na kutupatula kwitila mu ndando ya kupatula,
31 mangana kupwe lika ngwe mubanasoneka ngwabo: “Uje alishasha, alishashele hali Yehova.”
Majwi a kwinikila
^ Ibasana lalo ngwabo Pita.
^ Nambe “endekesi ya mana.”
^ Taleni Majwi Abanalumbununa.
^ Taleni Majwi Abanalumbununa.
^ Nambe “njikanakwila kumukulo.”
^ Kulumbununa, uje azibuka manene Lishiko.
^ Taleni Majwi Abanalumbununa.
^ Lijwi na lijwi “situ.”
