1 Korinte 10:1-33
10 Bandolome, hano njishaka muzibuke ngweni bakukulwila betu boshe bakele mwisi ya lishelwa, co boshe betile mu kalunga-ndonga,
2 co boshe babambwitikile muli Mosesa kwitila mu lishelwa na mu kalunga-ndonga,
3 co boshe balile byakulya bya ku sipilitu bya kulifwa,
4 co boshe banwile byakunwa bya ku sipilitu bya kulifwa, mwafwa bakele na kunwa ku limanya lya ku sipilitu lije lyakele na kubakaba, co lije limanya lyemanenene* Kristu.
5 Nameme ngoco, bwingi bwabo kubazibisile Njambi kubwaha, mukemwo wabatsiilile mu mambo.
6 Ebi byuma binapu bilongesa kuli yetu mangana keti tushungwiye byuma byabibi ngwe mubabishungwiiye bakebo.
7 Keti tupwe baka-kulemesa tumponya ngwe mubalingile bamo babo, ngwe mubanasoneka ngwabo: “Banu batumamene hasi na kulya na kunwa. Co bakatukile na kushangumuka kulizibisa kubwaha.”
8 Keti tulinge-linge bupangala* ngwe mubalingile bupangala* bamo babo, co kwatsile banu 23,000 mu litangwa limolika.
9 Keti tweseke Yehova ngwe mubamwesekele bamo babo, co banyonga ku manyoka.
10 Keti tupwe baka-kuyayabala ngwe mubayayabalele bamo babo, co babanyongesa kuli muka-kunyongesa.
11 Ebi byuma byalingiwile kuli bakebo binapu byakumwenako kuli yetu, co babisonekele mangana banangule yetu tuli na kuyoya kumamaneselelo a tutumameno twa myaka ino.
12 Ngeci, uje asinganyeka ngwendi nemana anyanyame mangana keti awe.
13 Ceseko coshe cimuliwana naco, na bakweni nabo banaliwana naco. Njambi wapwa wa kulongwa, kasa kumyecelela muliwane na ceseko cije kumwasa kukolesela. Nga muliwana na ceseko, Njambi amishokolwela ngila mangana mwase kukolesa omwo mu ceseko.
14 Ngeci eni banjazema, teweni ku kulemesa tumponya.
15 Njili na kwendeka ngwe uje endeka ku banu baje bali na cashu ca kunanguka. Akuleni yeni babenya byuma binjili na kwendeka.
16 Kuma nganja ya cibezikiso itukakandelela kuitulingisa tuwane bukwasi mu maninga a Kristu ndi? Kuma likende litukamungula kulitulingisa tuwane bukwasi mu mubila wa Kristu ndi?
17 Mwafwa kuli likende limolika nameme yetu tubabangi tunapu mubila umolika, mwafwa tubaboshe tuli na kulya eli bene likende limolika.
18 Acisinganyekeni hali Isalele wa ku situ: Kuma baje bakali milambu kubesi kulipangela na mutula ndi?
19 Bikoni binjili na kwendeka? Kuma njili na kwendeka ngwange bibalambula ku kamponya binapu bya seho, nambe ngwange kamponya napu wa seho ndi?
20 Embwe. Oloni njili na kwendeka ngwange byuma bibakalambula baka-mafuti, bakabilambula ku badimona, keti kuli Njambi embwe. Co kunjishaka ngwange mulipangele na badimona.
21 Kumwasa kunwa mu nganja ya Yehova na kunwa mu nganja ya badimona. Kumwasa kulya ku “mesa ya Yehova” na kulya ku mesa ya badimona.
22 Kuma ‘tushaka tuzibise Yehova lifuwa ndi’? Kuma tuli na nzili kutubakana ikeye ndi?
23 Byuma byoshe babitabesa, oloni keti byuma byoshe bikwasa. Byuma byoshe babitabesa, oloni keti byuma byoshe bitunga.
24 Munu na munu keti atonde bije bikwasa ikeye babenya, oloni atonde bije bikwasa mukwabo.
25 Lyeni byoshe bibalandesa ha maliketi ya situ kwa kujeneka kwihula, mwafwa ya citakutaku ceni,
26 mwafwa “kaye na byuma byoshe bilimo byapwa bya Yehova.”
27 Nga munu wa kujeneka kutaba amilanya, co mushaka kuya, lyeni byoshe byamyana kwa kujeneka kwihula mwafwa ya citakutaku ceni.
28 Oloni nga munu amileka ngwendi, “Ei situ banayanene ku tumponya,” co keti muilye mwafwa ya uje namileke na mwafwa ya citakutaku.
29 Kunjesi na kulumbununa citakutaku ceni, oloni ca mukweni. Mwafwa kunjishaka ngwange nga njinapangesa kupatuka ngwange, co munima nawa munu anjisompe na citakutaku cendi.
30 Nameme njikandelela Njambi ha byakulya binjilya, kuma njinapande kubilya nga bilingisa bakwetu banjisompelebyo ndi?
31 Ngeci, nameme muli na kulya nambe muli na kunwa nambe muli na kulinga cuma coshe-coshe, lingeni byuma byoshe mu kwana Njambi bumpau.
32 Keti mupwe citanwiso ku Bajuda na ku Bagriki na ku cikungulukilo ca Njambi,
33 ngwe nange munjili na kwesekela mwoshe munjasela kuzibisa banu boshe kubwaha mu byuma byoshe. Kunjesi na kutonda byuma bije bizibisa yange kubwaha, oloni bije bizibisa banu babangi kubwaha mangana bakoboke.
