1 Korinte 11:1-34
11 Njitembwinineni, ngecilika yange munjili na kutembwinina Kristu.
2 Njimishangazala mwafwa mu byuma byoshe muli na kunjanuka, co muli na kunyunga byuma binjamilekele kwesekesa bene nomu munjamilekelelebyo.
3 Oloni njishaka muzibuke ngweni mutwe wa munalume woshe napu Kristu. Co mutwe wa munakazi napu munalume. Co mutwe wa Kristu napu Njambi.
4 Munalume woshe alombela nambe apolofweta oku nazala cuma ku mutwe, ashaula mutwe wendi.
5 Oloni munakazi woshe alombela nambe apolofweta oku kazalele cuma ku mutwe, ashaula mutwe wendi, mwafwa napu lika ngwe uje nakongobola mutwe wendi.
6 Mwafwa nga munakazi kazala cuma ku mutwe wendi, co atehuleni binkambu byendi. Oloni nga cinapu ca shwamwa kuli munakazi kutehula binkambu byendi nambe kukongobola mutwe wendi, co azale cuma ku mutwe wendi.
7 Munalume kapandele kuzala cuma ku mutwe wendi mwafwa napu cifwa ca Njambi na bumpau bwendi, oloni munakazi napu bumpau bwa munalume.
8 Mwafwa munalume katundile kuli munakazi, oloni munakazi watundile kuli munalume.
9 Kutundaho lalo, munalume kubamutangele mwafwa ya munakazi, oloni munakazi bamutangele mwafwa ya munalume.
10 Mukemwo munakazi napande kuzala cuma ku mutwe wendi mangana cipwe cizibukiso ca kumwesa ngwaco nalyaka kwisi mwafwa ya tungelo.
11 Kutundaho lalo, kutalesa kuli Mwata, munakazi kasa kukalako kwa kujeneka munalume, co lalo munalume kasa kukalako kwa kujeneka munakazi.
12 Ngecilika omwo munakazi watunda kuli munalume, munalume nendi waija kwitila muli munakazi. Oloni byuma byoshe byatunda kuli Njambi.
13 Akuleni yeni babenya: Kuma kunapande munakazi alombe kuli Njambi kwa kujeneka kuzala cuma ku mutwe wendi ndi?
14 Kuma kwesekesa na cisemwa, kumwalilongesele ngweni nga munalume ali na binkambu byabilaha, bimushawisa,
15 oloni nga munakazi ali na binkambu byabilaha binapu bumpau kuli ikeye ndi? Mwafwa banamwana binkambu kutubakana kumwana cuma ca kuzala ku mutwe.
16 Oloni nga munu ashaka kulinga bimata mu kushaka kwimanena futisi yeka, yetu tumukumbulula ngwetu kutwesi na futisi yeka yahi, na mu bikungulukilo bya Njambi bene yahimo.
17 Oloni munjili na kumyana awa mashiko, kunjesi na kumishangazala embwe, mwafwa kulikungulula hamo kweni kukwesi na kunena bubwa embwe, oloni kuli na kunena bukalu.
18 Cakulibanga, njinazibi ngwabo mumukalikungulula mu cikungulukilo, mukati keni mukakala kulyangununa, nange njinataba.
19 Mwafwa cili bene mukati keni mukala lalo na tubibunga twa kulimanena mangana baje bakazibisa Njambi kubwaha bamoneke.
20 Mwafwa mumukalikungulwila mu mwela umolika, kumwesi kulikungulwila ngweni mulye kulya ca Mwata ca Mangwezi.
21 Mwafwa muikete simbu ya kulya eci kulya ca Mwata, munu na munu akalila cimweja kulya cendi ca mangwezi, ngeci muwana ngweni umo ali na njala mukwabo napende.
22 Kuma kumwesi na binjibo kumwasa kulila na kunwila ndi? Indi mushaka kulumbilisa cikungulukilo ca Njambi na kuzibisa shwamwa baje kubesi na byuma ndi? Bikoni binjinapande kwendeka? Kuma njimishangazale ndi? Embwe. Ha cuma ecini kunjimishangazala.
23 Mwafwa binjatambwile kuli Mwata bikebyo binjamilekele neni nawa, ngwange Mwata Yesu, ha butsiki buje bubalingile ngwabo bamwenda bungungu, wambatele likende,
24 co mwamanesele kulombela, walimungwile na kwendeka ngwendi: “Eli likende limanena mubila wange uje ubana mwafwa yeni. Twaleleleniho kulinga eci mu kunjanuka.”
25 Walingile cuma ca kulifwa lalo na ku nganja munima ya kulya ca mangwezi, co wendekele ngwendi: “Ei nganja imanena cikumiiyo caciha cije cikalako mwafwa ya maninga ange. Twaleleleniho kulinga eci, simbu yoshe imunwa ei nganja, mu kunjanuka.”
26 Mwafwa simbu yoshe imulya eli likende na kunwa ei nganja, muli na kutwalelelaho kwambulula kutsa kwa Mwata, kweta noho hakezila.
27 Ngeci, woshe alya eli likende na kunwa ei nganja ya Mwata oku kapandele, akala na mulonga ha mubila wa Mwata na ha maninga endi.
28 Munu na munu alilule tahi na kumona ngwendi byali na kulinga binapu byabibwa, co asinoni asa kulya eli likende na kunwa ei nganja.
29 Mwafwa woshe alya na kunwa kwa kujeneka kunanguka biulumbununa ou mubila, alikolomwena cihiso omwo alya na kunwa.
30 Mukemwo babangi mukati keni banazeye, bali na kubinja, co bakupwamo banalala tulo twa kutsa.*
31 Oloni nga tunanguka mutunapu yetu babenya, co kubatusompo.
32 Nameme ngoco, mubatusompa, bali na kutunangula kuli Yehova mangana keti batuhisile kumolika na kaye.
33 Ngeci bandolome bange, omwo mulikungulula hamo ngweni mulye kulya ca Mwata ca mangwezi, libandameneni kweta noho hamukaswila.
34 Nga umo natsi njala, alye ku njibo mangana mumulikungulula hamolika, keti mulile kumisompa. Oloni biñanda bikwabo binasalako, njakubisungamesa bwino munjija okwo.
Majwi a kwinikila
^ Hamo kulumbununa kutsa kwa ku sipilitu.
