1 Korinte 12:1-31
12 Co kutalesa ku bwana bwa ku sipilitu, kunjishaka ngwange mukale kunzimba bandolome.
2 Muzibuka ngweni mumwapwile banu ba ku mafuti,* mwalumbukile na kungumuka na tumponya ba kujeneka kwendeka, mwakele na kubakaba kwoshe kubakele na kumitwala.
3 Co hano njishaka muzibuke ngweni naumo wahi ibatwamenena ku sipilitu ya Njambi endeka ngwendi: “Yesu napu wakusingiwa!” Co lalo naumo wahi endeka ngwendi: “Yesu napu Mwata!” kubanga sipilitu ya kujela imutwamenene.
4 Kuli bwana bwa kuliseza-seza, oloni sipilitu imolika.
5 Kuli bipangi bya kuliseza-seza, oloni Mwata umolika.
6 Kuli byakulinga bya kuliseza-seza, oloni Njambi umolika uje ali na kulinga ebi bipangi byoshe muli munu na munu.
7 Oloni bipangi bya sipilitu banabyana munu na munu mangana bikwase banu.
8 Mwafwa umo banamwana kwendeka* na mana kwitila mu sipilitu, mukwabo banamwana kwendeka na mangana kwitila mu sipilitu ya kulifwa,
9 mukwabo banamwana likulahelo kwitila mu sipilitu ya kulifwa, mukwabo banamwana bwana bwa kukangwisa kwitila muli ei bene sipilitu,
10 mukwabo banamwana kupanga bipangi bya nzili, mukwabo banamwana kupolofweta, mukwabo banamwana kunanguka byendeka bya kuhwiminina, mukwabo banamwana kwendeka bindaka* bya kuliseza-seza, mukwaboco banamwana kulumbununa bindaka.
11 Bipangi byoshe ebi, bili na kulingiwa kwitila muli ei bene sipilitu ya kulifwa. Munu na munu banamwana cashu kwesekesa nomu muishakela sipilitu ya Njambi.
12 Mubila wapwa umolika, oloni wakala na bilyo byabingi, co bilyo byoshe bikebyo byapwa ou mubila, nameme byapwa byabingi, byapwa mubila umolika, na Kristu bene mukemwo mwafwa.
13 Mwafwa kwitila mu sipilitu imolika, tubaboshe batumbwitikile mu mubila umolika, ipwe tu Bajuda nambe tu Bagriki nambe tu bindungo nambe tu bakupatuka, co tubaboshe batunwisile sipilitu imolika.
14 Cili bene, mubila kuwakele na cilyo cimolika, oloni wakala na bilyo byabingi.
15 Nga lindi lyendeka ngwalyo, “Yange keti nji mutamba wa mubila mwafwa keti nji liboko,” eci kucilingisa lindi lijeneke kupwa mutamba wa mubila.
16 Co nga litwi lyendeka ngwalyo, “Yange keti nji mutamba wa mubila mwafwa keti nji lisho,” eci kucilingisa litwi lijeneke kupwa mutamba wa mubila.
17 Ngwe mubila woshe wapwile lisho, ngwe munu akazibila kuli? Ngwe mubila woshe wapwile litwi, ngwe munu akazibila kuli bweko?
18 Oloni Njambi naka cilyo na cilyo ca mubila kwesekesa nomu mwashakelele.
19 Ngwe byoshe byapwile cilyo cimolika, mubila ngwe uli kuli?
20 Oloni kuli bilyo byabingi, mubilani umolika.
21 Lisho kulyasa kuleka liboko ngwalyo, “Kunjikutondo,” co lalo mutwe kuwasa kuleka mendi ngwawo, “Kunjimitondo.”
22 Oloni bilyo bya mubila bije bikamoneka ngwe bya kuzeya, nabyo bya seho,
23 co bilyo bya mubila bije bitukamono ngwe keti bya bulemu manene, tukabyana bulemu bwakama, co bilyo byetu bije kubisholoka mwamubwa, tukabisingimika manene.
24 Oloni bilyo byetu bije bikasholoka mwamubwa, kutwesi kubisingimika manene. Nameme ngoco, Njambi natanga mubila mu ngila ije ilingisa cilyo cije cili mu bujene bacisingimike manene,
25 mangana mu mubila keti mukale kulyangununa, oloni bilyo byawo bilyake mbunge cimo na cikwabo.
26 Nga cilyo cimo ciyanda, bilyo bikwabo byoshe biyanda hamo naco. Nga cilyo cimo bacana bumpau, bilyo bikwabo byoshe bibwahelela hamo naco.
27 Yeni mubila wa Kristu, co umo na umo weni napu cilyo cou mubila.
28 Njambi nana banu bipangi bya kuliseza-seza mu cikungulukilo: bakulibanga tupositolo, bamucibali tupolofweto, bamucitatu balongesi, co kwakako baje bali na kupanga bipangi bya nzili, baje bali na bwana bwa kukangwisa, baje bali na kupanga bipangi bya kukwasa bakwabo, baje bali na cashu ca kutwamenena, na baje bali na bwana bwa kwendeka bindaka bya kuliseza-seza.
29 Kuma boshe bapwa tupositolo ndi? Kuma boshe bapwa tupolofweto ndi? Kuma boshe bapwa balongesi ndi? Kuma boshe bakapanga bipangi bya nzili ndi?
30 Kuma boshe bakakangwisa ndi? Kuma boshe bakendeka mu bindaka ndi? Kuma boshe bakalumbununa* bindaka ndi?
31 Oloni twaleleleniho kutonda* manene bwana bwakama. Nameme ngoco, njimimwesa ngila ije itubakana bingila byoshe.
Majwi a kwinikila
^ Kulumbununa, baka-kujeneka kutaba.
^ Nambe “muzimbu.”
^ Nambe “miyati.”
^ Nambe “bakanungulula.”
^ Nambe “kushakezeka.”
