1 Korinte 15:1-58
15 Hanwoni bandolome, njimyanukisa bya muzimbu waubwa unjamyambulwilile, uje umwatambwile, uje lalo unamilingisa mukolese.
2 Nga mukakateya ku muzimbu waubwa unjamyambulwilile, co mwoboka. Oloni nga kumulingi ngoco, co mwalisinine ngoco kupwa baka-kutaba.
3 Mwafwa byuma byakulibanga bimo binjamilekele, nange lalo bikebyo bibanjilongesele, bya kwendeka ngwabyo, Kristu watsililile bubi bwetu ngwe mubyendeka Bisoneka.
4 Bamutsindile, co bamusangwile ku batsi ha litangwa lyamucitatu ngwe mubyendeka Bisoneka.
5 Washolokele kuli Kefasi, co washoloka na kuli baje 12.
6 Kutundaho, washolokele ku bandolome ba kutubakana 500 ha simbu imolika, bwingi bwabo bacili netu, nameme bamo banalala mu tulo twa kutsa.
7 Kutundaho lalo, washolokele kuli Jemusi, co washoloka na ku tupositolo boshe.
8 Mamaneselelo wakusholokele na kuli yange, ngeci njinapu ngwe mbututu uje nasemuka bubishu.
9 Mwafwa yange wamundondo ku tupositolo boshe, co kunjafwililile kunjisana kapositolo, mwafwa njayandesele cikungulukilo ca Njambi.
10 Oloni mu ngozi yakama ya Njambi, njinapu muno munjinapu, co ngozi yendi yakama yananjana kuyaile mwangoco, oloni njafwitanganene manene kutubakana boshe. Nameme ngoco, keti yange njafwitanganene, oloni ngozi yakama ya Njambi ije injili nayo ikeyo yafwitanganene.
11 Ipwe bene yange njamilongesele nambe bakwetu, ou ukewo muzimbu utukambulula, co ebi bikebyo bimwatabele.
12 Nga tuli na kwambulula ngwetu Kristu bamusangwile ku batsi, co kwija batyoni bamo mukati keni bendeke ngwabo kusanguka ku batsi kucakeleko?
13 Nga cili bene kusanguka ku batsi kucakeleko, co na Kristu bene kubamusangwile ku batsi.
14 Oloni nga Kristu kubamusangwile ku batsi, co kwambulula kwetu kunapu kwangoco, co na likulahelo lyeni nalyo linapu lyangoco.
15 Co lalo netu tunapu bakaleho ba Njambi bamakuli, mwafwa tunana bukaleho bwa makuli hali Njambi mutunendeka ngwetu wasangwile Kristu ku batsi okuni ikeye kamusangwile nga cili bene batsi kubakabasangula.
16 Mwafwa nga batsi kubakabasangula, co na Kristu nendi kubamusangwile.
17 Co lalo nga Kristu kubamusangwile, co likulahelo lyeni linapu lyangoco, mutwalelelaho kukala mu bubi bweni.
18 Co boshe baje banatsila kuli Kristu bananyongo.
19 Nga lilabelelo lyetu muli Kristu linapu lika lya muno mu kuyoya, co tuzibisa manene ngozi kutubakana banu boshe.
20 Oloni Kristu banamusangula ku batsi, ikeye bushuka bwakulibanga kuli baje banalala tulo twa kutsa.
21 Ha kuwana ngwe kutsa kwezile kwitila muli munu umolika, na kusanguka nakwo kwija kwitila muli munu umolika.
22 Mwafwa ngecilika boshe mubali na kutsa mwafwa ya Adama, mu ngila imolika, boshe bakayoya kwitila muli Kristu.
23 Oloni munu na munu akasanguka ha simbu yendi kwesekesa nomu mubanabwahesela byuma: Wakulibanga* Kristu, kutundaho baje banakundama kuli Kristu bakasanguka ha simbu ya kukalako kwendi.
24 Co kumamaneselelo, akelwisa Bumwene kuli Njambi yendi na Ishe, mwakamanesa kunyongesa bifulumende byoshe na moko yoshe na nzili yoshe.
25 Mwafwa napande kuyula ngwe mwene kweta noho Njambi akaka bitozi boshe mwisi ya mendi endi.
26 Co kutsa, cije capwa citozi wamamaneselelo, bakacinyongesa.
27 Mwafwa Njambi wakele byuma byoshe mwisi ya mendi a Kristu, oloni Njambi mwanendeka ngwendi wakele byuma byoshe mwisi ya Kristu, oku kukulumbununa ngwabo na Njambi uje wakele byuma byoshe mwisi ya Kristu nendi ali mwisi ya Kristu.
28 Oloni Njambi mwakaka byuma byoshe mwisi ya Kristu, co Mwana nendi akalyaka kwisi ya Njambi uje wakele byuma byoshe mwisi ya Kristu, mangana Njambi apwe byuma byoshe ku banu boshe.
29 Nga batsi kubakabasangula, co bika bikalingiwa kuli baje babali na kumbwitikila kutsa? Bika bibali na kubambwitikila na cimbwitiko ca cifweci?
30 Mwafwa bika netu simbu yoshe tuli mu bushonde?
31 Njili na kulitala na kutsa ha litangwa na litangwa. Bandolome, eci cinapu ca busunga ngwe mukunapu kulisamba kwange hali yeni mwafwa ya busamba bweni na Kristu Yesu Mwata wetu.
32 Nga ngeci mwa bakwetu,* nange njalwile na bikashama ba mu Efeso, co bikoni binjiwanaho nga batsi kubakabasangula, co “tulyeni na kunwa mwafwa imene tutsa.”
33 Keti bamyungumune, kulikwatasana na banu bababi kubiisa bilinga byabibwa.*
34 Singanyekeni mwamubwa na kulinga byakusungama, co keti mulinge-linge bubi mwafwa bamo kubesi na mangana a kuzibuka Njambi. Njili na kwendeka ebi mangana shwamwa imikole.
35 Nameme ngoco, munu asa kwihula ngwendi: “Batsi bakabasangula bati? Mubila wa cifwa muka ubakasanguka nawo?”
36 Obe munu wa kujeneka kuzibisisa, biukuna kubiyoyo kubanga bicibange tahi kutsa.
37 Co bije biukuna kuukunu mubila uje ukola, oloni ukuna lika nona, ipwe ya tiliku nambe ya mbuto ya muyati weka.
38 Oloni Njambi akana nona mubila kwesekesa nomu mwanashakela, co akana mbuto na mbuto mubila wayo.
39 Keti situ yoshe yapwa ya kulifwa, oloni kwakala ya banu, kwakala situ ya bingombe, kwakala situ ya tuzila, nei ya bisi.
40 Kuli mibila ya mwilu na mibila ya hasi, oloni bumpau bwa mibila ya mwilu bwapwa bwa cifwa ceka, co lalo na bumpau bwa mibila ya hasi nabwo bwapwa bwa cifwa ceka.
41 Bumpau bwa litangwa bwapwa bwa cifwa ceka, co bumpau bwa ngonde nabwo bwapwa bwa cifwa ceka, co lalo bumpau bwa bingongonosi bwapwa bwa cifwa ceka. Nameme bene bumpau bwa ngongonosi imo bwaliseza na bumpau bwa ngongonosi ikwabo.
42 Omu mukemwo mukunafu na kusanguka kwa batsi. Mubila baukuna mu kubola, bausangula mu kujeneka kubola.
43 Baukuna mu kushauka, bausangula mu bumpau. Baukuna mu kuzeya, bausangula mu nzili.
44 Baukuna oku unapu mubila wa situ, bausangula oku unapu mubila wa sipilitu. Nga kuli mubila wa situ, co kuli nawa na mubila wa sipilitu.
45 Mukemwo banasoneka ngwabo: “Munu wakulibanga, Adama, wapwile munu wa kuyoya.” Adama wamamaneselelo wapwile sipilitu ije yana kuyoya.
46 Oloni mubila wa sipilitu keti ukewo walibangele, mubila wa situ ukewo walibangele, co asinoni kwije mubila wa sipilitu.
47 Munu wakulibanga watunda hasi, co bamutangele ha likungu. Munu wamucibali watunda mwilu.
48 Baje babatangele ha likungu banapu ngwe uje ibatangele ha likungu, co baje ba mwilu banapu ngwe uje wa mwilu.
49 Ngecilika mutunalifu na uje ibatangele ha likungu, tukalifwa lalo na uje wa mwilu.
50 Oloni njimileka eci bandolome, ngwange situ na maninga kubyasa kuswana Bumwene bwa Njambi, co lalo kubola kucasa kuswana kujeneka kubola.
51 Taleni! Njimileka lihungu lya kujela ngwange: Keti tubaboshe tukalala mu tulo twa kutsa, oloni tubaboshe tukatenguluka,
52 mu kasimbu kakandondo lika, mu kukemuna kwa lisho mulukohya lupembo lwamamaneselelo. Mwafwa lupembo lukohya, co batsi bakabasangula na mibila ije kuyasa kubola, co tukatenguluka.
53 Mwafwa mubila ou ubola unapande kuzala kujeneka kubola, co mubila ou utsa unapande kuzala kujeneka kutsa.
54 Oloni ou mubila ubola muuzala kujeneka kubola, co lalo ou mubila utsa muuzala kujeneka kutsa, co byuma bibinendeka Bisoneka bikalishulisilila, ngwabyo: “Kutsa bakacilehula myaka yoshe.”
55 “Obe kutsa kuhyana kwobe kuli hali? Obe kutsa nzili yobe ya kuzibisa kubabala ili hali?”
56 Bubi bunapu nzili ije izibisa kubabala, ije ikanene kutsa. Bubi bukawana nzili mu Lishiko.
57 Oloni tukandelela kuli Njambi mwafwa ikeye akatulingisa tuhyane kwitila muli Mwata wetu Yesu Kristu!
58 Ngeci bandolome bange banjazema, imaneni mbe, keti mushwene, simbu yoshe kaleni na byabingi byakulinga mu cipangi ca Mwata, mwafwa muzibuka ngweni kufwitangana kweni muli Mwata kukwesi na kuya mwangoco.
Majwi a kwinikila
^ Lijwi na lijwi “Bushuka bwakulibanga.”
^ Nambe hamo “mu kumona kwa bunu.”
^ Nambe “futisi yaibwa.”
