1 Korinte 16:1-24
16 Co kutalesa ku ñanda ya kukungulula bimbongo bya bakujela, mwasa kukabangeya byuma binjalekele bikungulukilo bya mu Galatiya.
2 Ha litangwa lyakulibanga, mu calumingo na calumingo, umo na umo weni akeko cimo ku mukulo kwesekesa nomu mwasela, mangana keti kukale bya kukungulula bimbongo nga njinete.
3 Oloni munjija okwo, njakutuma banalume baje bamushangala mu mikanda yeni, bambate bwana bumunana kutunda kwisi ya bimbunge byeni, babutwale ku Jelusalema.
4 Oloni nga kunapande ngwabo nange njakuye, co bakuya nange.
5 Oloni njija kuli yeni nga njineti mu Masedonia, mwafwa njita mu Masedonia.
6 Co hamo njakukalako neni matangwa amo, nambe njakukala neni kweta bene na kumamaneselelo a cisika, mangana mwakunjisindikiyeko kamandondo kunja kuya.
7 Mwafwa kunjishaka kumimona lika mu bwasi-bwasi na kuya, mwafwa njinalabelela kwa kukalako neni nga Yehova atabesa.
8 Oloni njicikalako tahi mu Efeso kweta na ha cilika ca Pentekosti,
9 mwafwa bananjishokolwela cikolo cakama ca bipangi, oloni kuli baka-kulwisa babangi.
10 Co nga Timothi aijokwo, mutambuleni mwamubwa mangana ashubuluke, keti alishoshomwene ha cuma cimo mwakala neni, mwafwa ali na kupanga cipangi ca Yehova ngwe munjili na kulinga yange.
11 Ngeci, keti kukale nambe umo amulumbilisa. Musindikiyeni mu kwoloka mangana aije kuli yange, mwafwa njili na kumubandamena na bandolome.
12 Co kutalesa kuli ndolome yetu Apolo, njamulambelelele manene ngwange aije kuli yeni na bandolome. Ikeyeni te kayongwele ngwendi aije hano bene, oloni aija mwawana simbu.
13 Toneni, kanyameni mu likulahelo, pweni ngwe banalume,* kaleni na nzili.*
14 Byuma byoshe bimulinga bilingeni mu cizemo.
15 Bandolome, muzibuka ngweni bakunjibo ya Stefanasi bakebo bushuka bwakulibanga mu Akaya, muzibuka lalo ngweni balyanene bakebo babenya kupangela bakujela.
16 Twaleleleniho kulyaka kwisi ya banu ba cifweci na kuli boshe baje bali na kulikwatasana na baje bali na kupanga na nzili.
17 Oloni njabwahelela mwafwa Stefanasi na Fotunasi na Akekasi bali hamo nange kuno, mwafwa bali na kumimanenako.
18 Mwafwa banahwimisa sipilitu yange nei yeni. Ngeci, kandeleleni banu ba cifweci.
19 Bikungulukilo bya mu Asia binamimeneka. Akwila na Priska na cikungulukilo cije cikakungulukila mu njibo yabo banamimeneka manene muli Mwata.
20 Bandolome boshe banamimeneka. Limenekeni umo na mukwabo na kulitsemba ca kujela.
21 Yange Paulu, tambuleni mitende yange injinasoneka na liboko lyange.
22 Woshe kazemene Mwata apwe wakusingiwa. Obe Mwata wetu, ija!
23 Ngozi yakama ya Mwata Yesu Kristu ikale neni.
24 Cizemo cange cikale neni mubaboshe, yeni munalikwatasana na Kristu Yesu.
