1 Korinte 2:1-16
2 Ngeci, munjezile na kwambulula lihungu lya kujela lya Njambi kuli yeni bandolome, kunjapangesele majwi a kukomokesa nambe kulimwesa ngwe nji muka-mana.
2 Mwafwa njalyangwilile ngwange keti njizibuke cuma nambe cimo mukati keni, kubanga Yesu Kristu lika na bya kumutsiila ha citi ca kuyandesela.
3 Munjezile kuli yeni njapwile wa kuzeya, co njakele na kujaja na lyoba.
4 Co majwi ange, nebi binjakele na kwambulula, kubyapwile bya majwi a kukokweya na mana, oloni byamwesele nzili ya sipilitu ya Njambi,
5 mangana keti mukulahele mana a banu, oloni mukulahele nzili ya Njambi.
6 Co hano tuli na kwendeka bya mana mukati ka baje banakolo, keti mana a katumameno ka myaka ino* nambe a baka-kuyula ba mu katumameno ka myaka ino baje bakanyonga.
7 Oloni tuli na kwendeka bya mana a Njambi aje ali mu lihungu lya kujela, lije linapu mana a kushwekesa, lije lyayongwelele cimweja Njambi simbu kanda tutumameno twa myaka ino tukaleko, mangana yetu tukawane bumpau.
8 Awa mana akewo aje kubazibukile baka-kuyula ba mu katumameno ka myaka ino* mwafwa ngwe bawazibukile, ngwe kubatsiile* Mwata wa bumpau.
9 Oloni kunapu lika ngwe mubanasoneka ngwabo: “Lisho kulyamwene, litwi kulyazibile, co lalo munu kasinganyekele byuma bya Njambi bije byanabwahesela banu baje bamuzema.”
10 Mwafwa Njambi natujombolwelabyo kwitila mu sipilitu yendi, mwafwa sipilitu ikatondesesa mu byuma byoshe, nameme bene mu byuma bya kuloba bya Njambi.
11 Mwafwa iya asa kuzibuka byuma bya mukwabo? Munu azibuka lika byuma bili mu mbunge yendi. Mu ngila imolika, naumo wahi nazibuka byuma bya Njambi, kubanga kwitila mu sipilitu ya Njambi.
12 Yetu kutwatambwile sipilitu ya kaye, oloni tunatambula sipilitu ya kutunda kuli Njambi mangana tuzibuke byuma byanatwana Njambi mu ngozi yendi.
13 Ebi byuma netu tuli na kubyendeka, oloni kutwesi na kupangesa majwi a bilongesa bya mana a bunu, tuli na kupangesa majwi a bilongesa bya sipilitu omwo tulumbununa byuma bya ku sipilitu kupangesa majwi a ku sipilitu.
14 Oloni munu wa ku situ kasa kutambula byuma bya sipilitu ya Njambi, mwafwa kuli ikeye binapu bulema, co kasa kubizibuka mwafwa bakabilula na byuma bya ku sipilitu.
15 Oloni munu wa ku sipilitu elula byuma byoshe, oloni ikeye naumo wahi amwilula.
16 Mwafwa “iya nazibuka bisinganyeka bya Yehova mangana amulongese?” Oloni yetu tuli na bisinganyeka bya Kristu.
Majwi a kwinikila
^ Taleni Majwi Abanalumbununa.
^ Taleni Majwi Abanalumbununa.
^ Nambe “kubatsiilile ha citi ca kuyandesela.”
