1 Korinte 8:1-13
8 Co hano njili na kumisonekela ha byakulya bibanana ku tumponya ngwange: Tuzibuka ngwetu tubaboshe tuli na mangana. Mangana anena kulijundula, oloni cizemo citunga.
2 Nga munu asinganyeka ngwendi azibuka cuma cimo, co kanda acizibuke ngwe mwanapande kucizibukila.
3 Oloni nga munu wazema Njambi, ou munu bamuzibuka kuli Njambi.
4 Co kutalesa ku byakulya bibanana ku tumponya, tuzibuka ngwetu kamponya napu cuma cangoco mu kaye, co kukwesi Njambi weka kubanga umolika.
5 Nameme kuli byuma bibasana ngwabo binjambi, ipwe mwilu nambe hasi, ngwe muje bene mubakendeka banu babangi ngwabo kwakala “binjambi” babangi na “bimyata” babangi,
6 oloni kuli yetu Njambi umolika, uje napu Tate, kuli ikeye kukekwo kwatunda byuma byoshe, co tuli na kuyoyela ikeye. Co lalo kuli yetu Mwata umolika Yesu Kristu, uje byuma byoshe binaija kwitila muli ikeye, co netu tuli na kuyoya kwitila muli ikeye.
7 Nameme ngoco, keti banu boshe bali nawa mangana, mwafwa bamo bakele na kulemesa tumponya, co nga balya byakulya bibanana ku tumponya, baliziba ngwe bali na kulemesa tumponya, co citakutaku cabo cibapaya, mwafwa cinapu ca kuzeya.
8 Byakulya keti bikebyo bitushwenesa kuli Njambi. Keti ngwabo tubiisa nga kutuli, co lalo keti ngwabo tubwahesa nga tulya.
9 Oloni nyanyameni mangana nzili yeni ya kwangula keti ipwe citanwiso kuli baje banazeye.
10 Nga yobe uli na mangana a kuzibuka ngwobe tumponya banapu byuma byangoco, ulya byakulya mu tempele ya kamponya, co uje ali na citakutaku ca kuzeya akumona, kuma oho kuumulingisa alye byakulya bibanana ku tumponya ndi?
11 Ngeci mangana obe abiisa ndolome yobe wa kuzeya uje yatsililile Kristu.
12 Nga ulinga bubi kuli ndolome yobe mu ngila ei, na kubulumuna citakutaku cendi ca kuzeya, uli na kulinga bubi kuli Kristu.
13 Mukemwo njalyangwila ngwange nga byakulya bitanwisa ndolome yange, kunjikali lalo situ mangana keti njitanwise ndolome yange.
